Gĩkuũ nĩ thũ ya gwĩtigĩrũo. Tũrũaga nakĩo na njĩra ciothe. Rĩmwe o na nĩ tũremagwo gwĩtĩkia atĩ mũndũ tũrendete ndarĩ ho. Ningĩ andũ ethĩ mationaga ta kũrĩ hĩndĩ magaakua.

Firauni a Misiri ya tene meetĩkĩtie atĩ no matũũre tene na tene. Maahũthagĩra ũtũũro wao hakuhĩ wothe, na wa ndungata ciao makĩgeria kũrũa na gĩkuũ. Piramĩdi iria maakire nĩ cionanagia ũrĩa maageragia kũrũa na gĩkuũ, o na gũtuĩka no maakuire.

Athamaki a tene a China, o nao nĩ maageririe kũrũa na gĩkuũ o na gũtuĩka o maahũthagĩra mĩthaiga. Mũthamaki ũmwe wetagwo Qin Shi Huang, aathĩte ataramu ake mathondeke mũthaiga ũngĩagirĩrĩirie gĩkuũ. Mĩthaiga ĩrĩa maathondekire yatũkanĩtio na indo njũru, na no kũhoteke nĩyo yaamũragire.

Karine-inĩ ya 16, mũthuthuria ũmwe wa Spain wetagwo Juan Ponce de León, aathire nginya Amerika ya gatagatĩ gwetha gĩthima mũndũ angĩethambĩire atũũre arĩ mwĩthĩ. Arĩ rũgendo-inĩ rũu nĩrĩo aaguũririe gĩtarũ kĩa Florida, Amerika, no thutha wa kahinda kanini agĩkua makĩrũa na aikari a kuo. No gũtirĩ gĩthima kĩa mũthemba ũcio kĩonekire.

Firauni, athamaki, na athuthuria acio, othe maageragia kũrũa na gĩkuũ. O na ithuĩ hihi twanageria kũrũa na gĩkuũ na njĩra ĩmwe kana ĩrĩa ĩngĩ. Ũrĩa kũrĩ nĩ atĩ, gũtirĩ o na ũmwe witũ ũthũire gũtũũra matukũ maingĩ.

Nĩ kĩĩ gĩtũmaga tũrũe na gĩkuũ? Bibilia nĩ ĩtaaragĩria gĩtũmi. Yugaga ũũ ũhoro-inĩ wĩgiĩ Jehova Ngai, * Mũũmbi witũ: “Ombire kĩndũ o gĩothe gĩthakare hĩndĩ yakĩo; o na ningĩ agĩĩkĩra [“ũhoro wa tene na tene,” New World Translation] ngoro-inĩ ciao.” (Kohelethu 3:11) Ithuothe  tũngĩenda gũtũũra tũkenagĩra ũthaka wa thĩ, na to ihinda rĩa mĩaka 80 tu, ĩndĩ, nĩ tene na tene. (Thaburi 90:10) Macio nĩmo merirĩria ma ngoro citũ.

Nĩkĩ gĩatũmire Ngai ekĩre “ũhoro wa tene na tene” ngoro-inĩ citũ? Hihi no getha twĩriragĩrie gũtũũra tene na tene ũndũ ũrĩa ũtangĩhotekeka? Jehova ndangĩka ũguo. Ithenya rĩa ũguo, nĩ eranĩire atĩ, ica ikuhĩ nĩ egũtooria gĩkuũ. Maandĩko maingĩ ma Bibilia, nĩ monanĩtie kĩĩranĩro kĩa Ngai gĩa gũkaaniina gĩkuũ, na kũhe andũ muoyo wa tene na tene.​—Rora rungu rwa,  “Ngai nĩ Agaatooria Gĩkuũ.”

Jesu Kristo oigire ũũ: “Naguo muoyo wa tene na tene nĩ atĩrĩ, nĩ makũmenye wee Ngai ũrĩa ũmwe wa ma, na mamenye ũrĩa warekirie, na nĩwe Jesu Kristo.” (Johana 17:3) Kwoguo, gĩkuũ no gĩtoorio. O na kũrĩ ũguo, Jesu onanirie atĩ no Ngai ũngĩhota gũgĩtooria.