No wende kũmenya ũrĩa ũtũũro waku ũkaahana mahinda mokĩte? Andũ aingĩ nĩ meriragĩria mũno kũmenya. Kũrĩ andũ marathaga ũrĩa maũndũ magakorũo mahaana, no makaaga kũhinga. Ta wĩcirie ngerekano ici:

• ATHOMI A SAYANISI nĩ mahũthagĩra macini cia hinya mũno na mbia nyingĩ, makĩgeria kũratha maũndũ marĩa marĩ mbere ũhoro-inĩ wĩgiĩ rĩera kana ũrĩa thĩ ĩgũthiĩ ĩthũkĩte.

• ATHUTHURIA A MAŨNDŨ nĩ mageragia kũratha maũndũ megiĩ biacara na ũteti. Warren Buffett mũndũ ũmwe mũtongu mũno thĩinĩ wa thĩ, na ũthuthuragia maũndũ megiĩ biacara, atuĩtwo rĩĩtwa mũragũri, nĩ ũndũ wa ũrĩa biacara ciake igaacĩrĩte. Nate Silver nĩ athuthuragia maũndũ, nĩguo ahote kũratha ũhoro wĩgiĩ ũteti na maũndũ mangĩ matiganĩte megiĩ Amerika ya U.S.

• INDO CIA TENE nĩ ihũthĩrĩtwo nĩ andũ amwe harĩ kũratha. Andũ amwe monaga maũndũ marĩa marekĩka ũmũthĩ, ta arĩ marĩa maandĩkirwo nĩ Nostradamus karine-inĩ ya 16. Amwe nao mooigaga atĩ gũthira gwa kalenda ya Maya ĩrĩa yaathirire Dicemba 21, 2012, kĩarĩ kĩonania kĩa mũthiro wa thĩ.

• ATONGORIA A NDINI rĩmwe nĩ marathaga atĩ kũrĩ maũndũ moru megwĩkĩka nĩguo andũ metigĩre na mamarũmĩrĩre. Harold Camping ũrĩa ũrathaga maũndũ ta macio, marĩ na arũmĩrĩri ake nĩ maahunjirie na gĩkĩro kĩnene mũno makiugaga atĩ thĩ ĩngĩathirire mwaka wa 2011. Ĩndĩ tiguo gwathiire.

• ARAGŨRI moigaga nĩ marĩ ũhoti wa kũratha mahinda mokĩte. Edgar Cayce na Jeane Dixon nĩ maarathire maũndũ mangĩekĩkire karine-inĩ ya 20. O na gũtuĩka harĩ mamwe meekĩkire, maingĩ nĩ marĩa mataahingire. Kwa mũhiano, Dixon aarathĩte atĩ Mbaara ya Gatatũ ya Thĩ ĩngĩatuthũkire mwaka wa 1958, nake Cayce akĩratha atĩ taũni ya New York nĩ ĩngĩahorokeire iria-inĩ mĩaka-inĩ ya 1970.

Hihi nĩ kũrĩ mũndũ ũngĩtwĩra ũhoro wa mahinda mokĩte atekũhĩtia? Kĩũria kĩu nĩ kĩa bata tondũ ũngĩmenya maũndũ marĩa marĩ mbere, no ũtue matua marĩa magĩrĩire.