Ta hũra mbica ya mũthuri akĩaria na kahĩĩ gake ka mĩaka mũgwanja. Agakeera, “Tene tene mũno, Ngai nĩ ombire thĩ na indo ciothe iria irĩ thĩinĩ wayo, akĩũmba riũa, mweri na njata.” Kahĩĩ kau gageciria hanini gagacoka gakamũũria, “Baba, na nũũ wombire Ngai?”

Ithe agagacokeria ũũ: “Gũtirĩ mũndũ wombire Ngai, atũire kuo kuuma tene.” Mũrũwe akaiganĩra nĩ macokio macio ma ithe. No akũrakũra, akaambĩrĩria rĩngĩ kwĩyũria kĩuria kĩu. Akaaga gũtaũkĩrũo nĩ ũrĩa mũndũ angĩkorũo atarĩ na kĩambĩrĩria. Akeyũria, ‘Angĩkorũo thĩ na igũrũ nĩ irĩ kĩambĩrĩria-rĩ, we Ngai oimire kũ?’

Bibilia ĩcoketie atĩa kĩũria kĩu? Ĩcoketie o ta ũrĩa mũthuri ũcio acoketie. Musa aandĩkire ũũ: “Mwathani, . . . o mbere irĩma itaanaciarũo, o ũtaanomba thĩ na mabũrũri, kuuma o tene na nginya tene, wee ũrĩ o Mũrungu.” (Thaburi 90:1, 2) Ũguo noguo mũnabii Isaia o nake oigire: ‘Anga wee ndũrĩ wamenya, o na kana ũkĩigua, atĩ Ngai ũrĩa ũtũũraga tene na tene, Jehova, nĩ we ũrĩa wombire ituri ciothe cia thĩ?’ (Isaia 40:28) Ũndũ ũmwe na ũguo, marũa ma Judasi moigĩte atĩ Ngai aatũire kuo “o mbere ya mĩndĩ na mĩndĩ.”—Judasi 25.

Maandĩko macio monanĩtie o ũrĩa mũtũmwo Paulo oigĩte atĩ, Ngai nĩwe “Mũthamaki ũrĩa ũtũũraga tene na tene.” (1 Timotheo 1:17) Ũguo nĩ kuuga atĩ, Ngai atũũire kuo hĩndĩ ciothe, o na tũngĩcoka na thutha mĩaka ĩigana. Na o na mahinda mokĩte egũtũũra arĩ o kuo hĩndĩ ciothe. (Kũguũrĩrio 1:8) Kwoguo, ũhoro wa gũtũũra arĩ o kuo tene na tene nĩ ngumo ya mwanya ya Ngai Mwene-Hinya-Wothe.

No nĩ kĩĩ gĩtũmaga tuone ũndũ ũcio ũrĩ mũritũ gũtaũkĩrũo nĩguo? Nĩ gũkorũo tũtũũraga mĩaka mĩnini, kwoguo tuonaga mahinda na njĩra ngũrani mũno na ũrĩa Jehova amonaga. Tondũ Jehova atũũraga tene na tene, mĩaka ngiri harĩ we no ta mũthenya ũmwe. (2 Petero 3:8) Kwa ngerekano: Hihi gĩtono kĩrĩa gĩtũũraga matukũ 50 tu, no kĩhote gũtaũkĩrũo atĩ andũ matũũraga mĩaka 70 kana 80? No hinya! Bibilia yugaga atĩ tũhaana o ta itono tũkĩringithanio na Mũũmbi witũ. O na mwĩcirĩrie wake wĩ kũraya mũno na witũ. (Isaia 40:22; 55:8, 9) Nĩkĩo tũtangĩhota gũtaũkĩrũo nĩ maũndũ mothe megiĩ Jehova.

O na gũtuĩka nĩ ũndũ mũritũ mũno gũtaũkĩrũo nĩ ũrĩa Ngai atũũraga tene na tene, nĩ tuona atĩ ũndũ ũcio no ũhoteke. Angĩkorũo nĩ kũrĩ mũndũ wombĩre Ngai, mũndũ ũcio nĩwe ũngĩrĩ Mũũmbi. No, Bibilia yugaga atĩ Jehova nĩwe “wombire indo ciothe.” (Kũguũrĩrio 4:11) Makĩria ma ũguo, nĩ tũũĩ atĩ kũrĩ hĩndĩ gũtaarĩ thĩ o na igũrũ. (Kĩambĩrĩria 1:1, 2) Ciakiumire kũ? Ũrĩa waciũmbire no mũhaka angĩakorirũo arĩ kuo itanombwo. Aarĩ kuo mbere ya andũ na araika, o na mbere ya Mũrũ wake wa mũmwe. (Ayubu 38:4, 7; Akolosai 1:15) Ũguo nĩ gũkĩonania atĩ, nowe watũũraga kuo arĩ wiki mbere ya mũndũ kana kĩndũ kĩngĩ o gĩothe. Tondũ gũtirĩ kĩndũ kĩarĩ kuo mbere yake kĩngĩamũmbire; ndangĩakĩũmbirũo.

Gũkorũo tũrĩ muoyo na gũkorũo kũrĩ na thĩ o na igũrũ, kuonanagia atĩ nĩ kũrĩ Ngai ũtũũraga tene na tene. Ũrĩa wombire indo ciothe iria irĩ kũrĩa igũrũ, o Ũrĩa waciigĩire mawatho ma kũrũmagĩrĩra, no mũhaka angĩakorirũo arĩ kuo hĩndĩ ciothe. No we ũngĩahotire kũhe kĩrĩa gĩothe gĩtũũraga muoyo, mĩhũmũ.—Ayubu 33:4.