KUUMA NGOTHI-INĨ | ŨTHAMAKI WA NGAI
Ũthamaki wa Ngai— Nĩ wa Bata Harĩ Jesu Nĩkĩ?
Hĩndĩ ya ũtungata wake gũkũ thĩ, Jesu nĩ aaragia igũrũ rĩgiĩ maũndũ matiganĩte. Kwa ngerekano, nĩ arutire arutwo ake ũrĩa magĩrĩirũo nĩ kũhoya, ũrĩa mangĩkenia Ngai, na ũrĩa mangĩgĩa na gĩkeno kĩa ma. (Mathayo 6:5-13; Mariko 12:17; Luka 11:28) No ũhoro ũrĩa Jesu eendete kwaria igũrũ rĩaguo makĩria, na warĩ ngoro-inĩ yake, nĩ wa Ũthamaki wa Ngai.—Luka 6:45.
Ta ũrĩa tuona gĩcunjĩ-inĩ kĩu kiuma hau mbere, ũndũ ũrĩa Jesu eekĩrĩire mũno ũtũũro-inĩ wake warĩ, ‘kũhunjia Ũhoro-ũrĩa-Mwega wa Ũthamaki wa Ngai.’ (Luka 8:1) Nĩ eerutanagĩria mũno, agathiĩ magũrũ kũndũ kũraihu mũno bũrũri-inĩ wa Isiraeli nĩguo arute andũ ũhoro wĩgiĩ Ũthamaki wa Ngai. Ũtungata wa Jesu wandĩkĩtwo mabuku-inĩ marĩa mana ma Injiri, marĩa magwetete ũhoro wa Ũthamaki makĩria ma maita 100. Maũndũ maingĩ marĩa maandĩkĩtwo nĩ ciugo iria Jesu aaririe, na no mũhaka akorũo maũndũ macio no gacunjĩ kanini tu ka maũndũ marĩa oigire megiĩ Ũthamaki wa Ngai!—Johana 21:25.
Nĩkĩ gĩatũmaga Ũthamaki ũkorũo ũrĩ wa bata mũno harĩ Jesu rĩrĩa aarĩ gũkũ thĩ? Gĩtũmi kĩmwe nĩ atĩ, Jesu nĩ aamenyaga atĩ, Ngai nĩ amũthuurĩte nĩguo atuĩke Mũthamaki wa Ũthamaki ũcio. (Isaia 9:6; Luka 22:28-30) O na kũrĩ ũguo, muoroto wa Jesu ndwarĩ gwĩcarĩria ũnene. (Mathayo 11:29; Mariko 10:17, 18) Ndaaragĩrĩria ũhoro wa Ũthamaki nĩguo egune we mwene. Gĩtũmi kĩnene kĩrĩa gĩatũmaga Jesu akenio nĩ Ũthamaki wa Ngai * nĩ maũndũ marĩa ũgekĩra arĩa endete na nĩ o Ithe wake, na arũmĩrĩri ake ehokeku.
ŨRĨA ŨTHAMAKI ŨGATHERIA RĨĨTWA RĨA NGAI
Jesu nĩ endete mũno Ithe wake wa igũrũ. (Thimo 8:30; Johana 14:31) Nĩ akenagio mũno nĩ ngumo cia Ithe ta wendo wake, kũiguanĩra tha gwake, na kĩhooto gĩake. (Gũcokerithia Maathani 32:4; Isaia 49:15; 1 Johana 4:8) Hatarĩ nganja, no mũhaka Jesu akorũo nĩ arakaraga mũno rĩrĩa aigua maũndũ ma maheeni makoniĩ Ithe magĩtheremio, ta, Ngai ndarũmbũyagia andũ rĩrĩa maranyamarĩka na atĩ Ngai endaga tũnyamarĩke. Na gĩkĩ nĩkĩo gĩtũmi kĩmwe kĩrĩa gĩatũmire Jesu ‘ahunjie Ũhoro-ũrĩa-Mwega wa Ũthamaki’ arĩ na kĩyo tondũ nĩ aamenyaga atĩ, ica ikuhĩ Ũthamaki ũcio nĩ ũgaatheria rĩĩtwa rĩa Ithe. (Mathayo 4:23; 6:9, 10) Na ũgeeka ũguo atĩa?
Kũgerera Ũthamaki , Jehova nĩ akarehe ũgarũrũku ũrĩa ũkaaguna ndungata ciake njĩhokeku. ‘Nĩakamagiria maithori’ na eherie maũndũ marĩa matũmaga maite maithori na atigĩrĩre “gĩkuũ gĩtirĩ hingo gĩgacoka kũgĩa, o na gũtirĩ hingo gũgacoka kũgĩa na kĩeha, kana kĩrĩro, kana ruo.” (Kũguũrĩrio 21:3, 4) Kũgerera Ũthamaki wake, Ngai nĩ akaniina mĩnyamaro yothe. *
Nĩkĩo Jesu aarĩ na kĩyo mũno gĩa kwĩra andũ ũhoro wa Ũthamaki! Nĩ aamenyaga atĩ wĩra ũcio, nĩ ũngĩateithirie andũ mamenye Ithe nĩ arĩ hinya na nĩ mũiguanĩri tha. (Jakubu 5:11) Ningĩ Jesu nĩ aamenyaga atĩ, Ũthamaki nĩ ũkaguna andũ angĩ endete— arĩa ehokeku.
ŨRĨA ŨTHAMAKI ŨGEEKĨRA ANDŨ ARĨA EHOKEKU
Mbere ya Jesu gũka gũkũ thĩ, nĩ maikarĩte na Ithe igũrũ kwa ihinda iraya. Ithe nĩ aamũhũthĩrire kũũmba indo ciothe, ta igũrũ rĩrĩ njata nyingĩ, thĩ thaka ĩrĩa tũikaraga o hamwe na nyamũ iria irĩ kuo. (Akolosai 1:15, 16) O na kũrĩ ũguo, Jesu ‘aakenagio mũno nĩ rũruka rũa andũ.’—Thimo 8:31.
Ũtungata wa Jesu nĩ woonanirie atĩ nĩ endete andũ mũno. Akĩambĩrĩria ũtungata ũcio, nĩ oonanirie wega atĩ ookĩte gũkũ thĩ nĩguo ahunjie “ũhoro-ũrĩa-mwega.” (Luka 4:18) Jesu to kwaria aaragia tu igũrũ rĩgiĩ gũteithia andũ, no nĩ eekaga maũndũ mangĩ maingĩ. Maita maingĩ nĩ eekire maũndũ ma kuonania atĩ nĩ endete andũ mũno. Kwa ngerekano, hĩndĩ ĩrĩa andũ aingĩ moonganĩte nĩguo mamũthikĩrĩrie, Jesu nĩ ‘aamaiguĩrĩire tha, na akĩhonia arũaru ao.’ (Mathayo 14:14) Rĩrĩa mũndũ ũmwe warĩ na mũrimũ mũru mũno oonanirie wĩtĩkio atĩ Jesu aangĩendire nĩ angĩamũhonirie, Jesu nĩ aatindĩkirũo nĩ wendo. Akĩmũhonia na akĩmwĩra arĩ na tha ũũ: “Nĩngwenda; honio ũthere.” (Luka 5:12, 13) Rĩrĩa Jesu oonire mũratawe Mariamu akĩrĩra nĩ ũndũ wa gĩkuũ kĩa mũrũ wa nyina Lazaro, Jesu “agĩgĩcaya o roho-inĩ,” “agĩtangĩka,” na “akĩrĩra maithori.” (Johana 11:32-36) Thutha ũcio, agĩka ũndũ wa magegania rĩrĩa aariũkirie Lazaro, o na gũtuĩka aikarĩte mbĩrĩra-inĩ thikũ inya!—Johana 11:38-44.
Ma nĩ atĩ, Jesu nĩ aamenyaga atĩ ũteithio ũrĩa aaheaga andũ warĩ wa kahinda kanini tu. Nĩ amenyaga atĩ andũ arĩa aahonirie nĩ mangĩarũarire rĩngĩ na arĩa othe aariũkirie nĩ mangĩacokire makue. O na kũrĩ ũguo, Jesu ningĩ nĩ aamenyaga atĩ Ũthamaki wa Ngai nĩ ũkaniina mathĩna macio mothe tene na tene. Na nĩkĩo Jesu to ciama theri aaringaga no ningĩ nĩ aahunjagia “ũhoro-ũrĩa-mwega wa Ũthamaki.” (Mathayo 9:35) Ciama ciake cionanirie na gĩkĩro kĩnini ũrĩa Ũthamaki wa Ngai ũrĩĩka thĩ yothe ihinda rĩtarĩ kũraya. Ta wĩcirie ũrĩa Bibilia ĩranĩire igũrũ rĩgiĩ ihinda rĩu.
Gũtirĩ hĩndĩ gũgacoka kũgĩa na mĩrimũ.
“Hĩndĩ ĩo maitho ma atumumu nĩmakahingũrũo, o namo matũ ma arĩa mataiguaga nĩmagakunũrũo. Hĩndĩ ĩo mũndũ ũrĩa ũthuaga agacimbicaga o ta thwariga, o naruo rũrĩmĩ rũa ũrĩa ũtahotaga kwaria nĩ kũina rũkaina.” Makĩria ma ũguo, “Nake mũndũ ũrĩa ũtũũraga bũrũri ũcio ndarĩ hingo agacoka kuuga ũũ: ‘Ndĩ mũrũaru.’”—Isaia 33:24; 35:5, 6.
Gũtigakorũo na gĩkuũ.
‘Arĩa athingu nĩo makagaya thĩ, na gũtũũra mamĩtũũre o nginya tene.’—Thaburi 37:29.
“Gĩkuũ nĩ kũng’aria akĩng’arĩtie agakĩnina biũ tene na tene; ningĩ Mwathani Jehova nĩakagiria maithori mothiũ mothe.”—Isaia 25:8.
Arĩa makuĩte nĩ makariũkio.
“Arĩa othe me thĩinĩ wa mbĩrĩra makaigua mũgambo wake, na moime kuo.”—Johana 5:28, 29.
“Kwĩ hĩndĩ gũkariũkio andũ.”—Atũmwo 24:15.
Gũtigakorũo na andũ matarĩ na ũikaro kana matarĩ na wĩra.
‘Nao nĩmagaaka nyũmba, na macitũũre, na mahande mĩgũnda ya mĩthabibũ, o na marĩage maciaro mayo. Matigaaka nyũmba, na icokage gũtũũrũo nĩ andũ angĩ, o na kana mahande irio, icokage kũrĩo nĩ andũ angĩ. . . Nĩmagakenagĩra wĩra wa moko mao ihinda iraya.’—Isaia 65:21, 22.
Gũtikagĩa mbaara rĩngĩ.
“Nĩ mũnini mbaara nginya o gĩturi gĩa thĩ.”—Thaburi 46:9.
“Hĩndĩ ĩo gũtirĩ rũrĩrĩ rũgacoka gũcomorera rũrĩrĩ rũrĩa rũngĩ rũhiũ rũa njora, o na kana ndũrĩrĩ icoke kwĩĩgithia mbaara rĩngĩ o na rĩ.”—Isaia 2:4.
Gũtigakorũo na ng’aragu rĩngĩ.
“Thĩ nĩĩrutĩte uumithio wayo; Ngai, o we Ngai witũ, nĩatũrathimĩte.”—Thaburi 67:6.
Nĩ gũgakorũo na “bũthi wa ngano nginya o irĩma igũrũ; maciaro mayo nĩmagĩthũngũthanage.”—Thaburi 72:16.
Gũtigakorũo na mathĩna rĩngĩ.
“Ũrĩa mwagi ndangĩtũũra o ariganĩire hingo ciothe.”—Thaburi 9:18.
“Nĩ ũndũ mũndũ mũkĩa aakaya, we nĩarĩmũteithũraga, gwata ũrĩa mũthĩnĩki, ũtakĩrĩ na wa kũmũteithia. Ũcio ũtarĩ na hinya, o ũcio mwagi-rĩ, nĩarĩmũiguagĩra tha; andũ acio akĩa, akĩhonokie mĩoyo yao.”—Thaburi 72:12, 13.
Ũngĩciria ciĩranĩro icio ciĩgiĩ Ũthamaki wa Ngai hihi nĩ ũrona kĩrĩa gĩtũmaga Ũthamaki ũkorũo ũrĩ wa bata mũno harĩ Jesu? Rĩrĩa aarĩ gũkũ thĩ, nĩ endete mũno kwaria ũhoro wa Ũthamaki wa Ngai kũrĩ mũndũ o wothe ũngĩathikĩrĩirie, tondũ nĩ aamenyaga atĩ Ũthamaki ũcio nĩguo ũngĩkeheria mathĩna marĩa mothe marĩ kuo ũmũthĩ.
Hihi nĩ ũgucagĩrĩrio nĩ ciĩranĩro cia Ũthamaki iria ĩrĩ Bibilia-inĩ? Angĩkorũo nĩguo-rĩ, ũngĩĩruta makĩria maũndũ megiĩ Ũthamaki ũcio atĩa? Wagĩrĩirũo nĩ gwĩka atĩa nĩguo ũkorũo na ma atĩ nĩ ũkagunĩka nĩ irathimo icio? Gĩcunjĩ kĩrĩa gĩkũrĩkĩrĩria kwarĩrĩria ũhoro wĩgiĩ Ũthamaki ngathĩti-inĩ ĩno nĩ gĩgũcokia ciũria icio.
^ kib. 5 Gĩcunjĩ gĩkĩ kĩraarĩrĩria ũrĩa Jesu aiguaga ihinda-inĩ rĩrĩ, nĩ tondũ arĩ muoyo kũrĩa igũrũ na kuuma acoke kuo, ũhoro wa Ũthamaki ũthiĩte na mbere gũkorũo ũrĩ ũndũ wa bata mũno harĩ we.—Luka 24:51.
^ kib. 8 Nĩ ũndũ wa ũhoro makĩria wĩgiĩ kĩrĩa gĩtũmaga Ngai etĩkĩrie mĩnyamaro kwa ihinda, thoma gĩcunjĩ gĩa 11 kĩa ibuku Bibilia Ĩrutanaga Atĩa Kũna? rĩrĩa rĩcabĩtwo nĩ Aira a Jehova.Ningĩ no ũrĩone thĩinĩ wa www.pr418.com/ki.
