Andũ milioni nyingĩ thĩinĩ wa thĩ nĩ maigĩte mwĩhoko wao harĩ Ũthamaki wa Ngai. Marũmagĩrĩra kĩonereria kĩa Jesu ũrĩa warutire arũmĩrĩri ake mahoyage ũũ, “Ũthamaki waku ũũke. O ũrĩa wendete Wee, nĩwĩkagwo gũkũ thĩ.”—Mathayo 6:10.

O na kũrĩ ũguo, andũ aingĩ nĩ mendaga kũmenya ũhoro wa Ũthamaki wa Ngai, no ndini nyingĩ itiĩkagĩrĩra ũndũ ũcio. Mũthomi ũmwe wĩtagwo H. G. Wells nĩ oonanirie ũrĩa Jesu “eekĩrĩire. . . ũrutani wa Ũthamaki wa Igũrũ,” ĩndĩ ũrutani ũcio “nduonagwo ũrĩ wa bata o na hanini nĩ . . . makanitha maingĩ ma Gĩkristiano.”

Ngũrani na kanitha icio, Aira a Jehova nĩ mekĩrĩire mũno Ũthamaki wa Ngai. Ta wĩcirie ũhoro wa ngathĩti ĩno ũrathoma, ĩcabagwo na thiomi 220. Hakuhĩ ngathĩti milioni 46 nĩ icabagwo o riuma, na kwoguo nĩyo ngathĩti ĩrĩa ĩkinyagĩra andũ aingĩ mũno thĩinĩ wa thĩ. Nĩ ũhoro ũrĩkũ ngathĩti ĩno yaragĩrĩria mũno? Kĩongo kĩayo nĩ: Mũrangĩri Yanagĩrĩra Ũthamaki wa Jehova.  *

Nĩkĩ gĩtũmaga Aira a Jehova merutanĩrie mũno kũhunjia ũhoro wa Ũthamaki wa Ngai? Gĩtũmi kĩmwe nĩ atĩ, nĩ twĩtĩkĩtie atĩ Ũthamaki wa Ngai nĩguo ndũmĩrĩri ĩrĩa nene ya Bibilia, ibuku rĩrĩa rĩa bata mũno thĩinĩ thĩ. Makĩria ma ũguo, nĩ twĩtĩkĩtie biũ atĩ Ũthamaki wa Ngai noguo tu kĩhonia kĩa ma kĩa mathĩna marĩa magũmĩire andũ ũmũthĩ.

Nĩguo mateithie andũ mamenye ũhoro wa Ũthamaki wa Ngai, Aira a Jehova merutanagĩria kũrũmĩrĩra kĩonereria kĩa Jesu. Rĩrĩa aarĩ gũkũ thĩ, nĩ oonanirie atĩ kũhunjia ũhoro wa Ũthamaki wa Ngai nĩguo warĩ ũndũ ũrĩa wa bata mũno ũtũũro-inĩ wake. (Luka 4:43) Nĩkĩ gĩatũmaga Jesu one Ũthamaki ũrĩ wa bata mũno? Na Ũthamaki ũcio ũngĩkũguna atĩa? Nĩ tũgũkũũria ũcarie ũrĩa Bibilia ĩcoketie ciũria icio, ta ũrĩa icunjĩ iria irũmĩrĩire cionanĩtie.