Andũ milioni nyingĩ thĩinĩ wa thĩ makũngũyagĩra Krismasi nĩ ũndũ wa itũmi itiganĩte. Amwe makenagĩra mahinda macio ma thigũkũ hamwe na arata na famĩlĩ ciao. Angĩ meciragia ũhoro wa Ngai kana makahũthĩra mahinda mao gũteithia athĩni kana arĩa matehotete. Ma nĩ atĩ, maũndũ macio mothe ti moru. No rĩrĩ, nĩ mathũkagio nĩ maũndũ moru marĩa makonainie na thigũkũ ĩyo.

Wa mbere, andũ aingĩ arĩa makũngũyagĩra Krismasi metĩkĩtie atĩ ĩyo nĩ thigũkũ ya gũciarũo kwa Jesu. O na kũrĩ ũguo, aandĩki aingĩ a historĩ nĩ metĩkanagĩria atĩ mũthenya ũrĩa Jesu aciarirũo ndũĩkaine. Ibuku rĩĩtagwo The Christian Book of Why, riugaga atĩ, “Akristiano a tene nĩ maaregire kwamũra mũthenya mũna ũtuĩke nĩguo Jesu aaciarirũo,” nĩ ũndũ “nĩ meendaga kwĩyamũrania na mĩtugo ya ndini ciothe cia maheeni.” Ũndũ wa mwanya nĩ atĩ, gũtirĩ handũ Bibilia yonanĩtie atĩ Jesu nĩ aakũngũĩire gũciarũo gwake o na kana kwa mũndũ ũngĩ o wothe. Handũ ha ũguo, eerire arũmĩrĩri ake maririkanage gĩkuũ gĩake.—Luka 22:19.

Wa kerĩ, athomi aingĩ nĩ metĩkanagia atĩ maũndũ maingĩ marĩa mekagwo hĩndĩ ya Krismasi, kĩhumo kĩamo nĩ ndini itarĩ cia Gĩkristiano na ũndũire wa ndini cia maheeni. Maũndũ macio nĩ ta Santa Claus, mũtĩ wa Krismasi, kũheana iheo, gwakia mĩcumaa, kũgemia nyũmba, na kũina nyĩmbo cia Krismasi. Ibuku rĩĩtagwo The Externals of the Catholic Church riugĩte ũũ ũhoro-inĩ wĩgiĩ mĩtugo ĩmwe ta ĩyo: “Rĩrĩa tũraheana na tũkaamũkĩra iheo cia Krismasi, na tũgacuuria mahũa mĩciĩ-inĩ o na makanitha-inĩ, hihi nĩ aigana harĩ ithuĩ mamenyaga atĩ tũkoragwo tũkĩrũmĩrĩra mĩtugo ya ndini cia maheeni?”

No hihi wahota kwĩyũria atĩrĩ, “harĩ ũru ũrĩkũ kũrũmĩrĩra mĩtugo ĩyo na ndĩkĩonekaga ta ĩrĩ mĩũru?” Macokio no moneke harĩ ũndũ ũyũ wa gatatũ. Ngai ndetĩkĩrĩtie mĩtugo ya ndini cia maheeni ĩtukanio na ũthathaiya wa ma. Kũgerera mũnabii Amosi, Jehova Ngai eerire ndungata ciake iria ciaregenyũkĩte thĩinĩ wa Isiraeli ya tene ũũ: ‘Ciathĩ cianyu iria mũthiaga nĩndĩcithũire na ngacirega, ta thengeriai kĩrurumĩ kĩa nyĩmbo cianyu.’—Amosi 5:21, 23.

Nĩ kĩĩ gĩatũmire ameere ciugo nditũ ũguo? Ta rora wone maũndũ marĩa andũ a ũthamaki wa mwena wa rũgongo wa Isiraeli ya tene meekaga. Jeroboamu ũrĩa warĩ mũthamaki wao wa mbere, aakithirie njaũ cia thahabu itũũra-inĩ rĩa Dani na Betheli, na akĩheenereria andũ macithathayagie handũ ha gũthathaiya Jehova Ngai ũrĩa kwagĩrĩire hekarũ-inĩ ĩrĩa yarĩ Jerusalemu. Ningĩ mũthamaki ũcio nĩ aambĩrĩirie ikũngũĩro na akĩamũra athĩnjĩri-ngai mateithagĩrĩrie andũ gũcikũngũĩra.—1 Athamaki 12:26-33.

Maũndũ macio andũ a Isiraeli meekire no moneke ta maarĩ na muoroto mwega. Ningĩ-rĩ, na githĩ matiekaga maũndũ macio mothe nĩguo mathathaiye Ngai na mamũkenie? Ciugo nditũ iria Ngai aaririe kũgerera Amosi na anabii arĩa angĩ nĩ cionanirie wega ũrĩa onaga mĩtugo ta ĩyo. Ngai oigire ũũ kũgerera mũnabii Malaki: “Niĩ ndigarũrũkaga.” (Malaki 3:6) Na githĩ ũndũ ũcio ndũtuonagia ũrĩa Ngai aiguaga igũrũ rĩgiĩ ikũngũĩro iria ciĩkagwo cia Krismasi?

Thutha wa gũtaũkĩrũo nĩ maũndũ macio twarĩrĩria, andũ aingĩ nĩ matuaga itua rĩa kwaga gũkũngũĩra Krismasi. Handũ ha ũguo, nĩ makenaga na makaigua maiganĩire kũhũthĩra mahinda hamwe na famĩlĩ na arata, na gũteithia athĩni na arĩa matehotete ihinda o rĩothe thĩinĩ wa mwaka.