MŨTHURI agĩrĩirũo gwĩka atĩa nĩguo mũtumia wake aiguage aiganĩire? Andũ aingĩ makũrĩte moĩ atĩ ũndũ ũrĩa mũnene mũthuri agĩrĩirũo gwĩka nĩ kũhingĩria famĩlĩ yake mabataro ma kĩĩmbeca. O na kũrĩ ũguo, atumia aingĩ arĩa marĩ na mbeca no maiguaga mataiganĩire ngoro-inĩ o na marĩ na kĩeha. Kwa ngerekano, mũtumia ũmwe Mũhisipania wĩtagwo Rosa oigire ũũ igũrũ rĩgiĩ mũthuri ũrĩa aahikĩire, “Aakoragwo arĩ mwega mũno arĩ harĩ andũ arĩa angĩ, no arĩ mũciĩ aakoragwo ahaana nyamũ.” Nake Joy kuuma Nigeria oigaga atĩ, “Rĩrĩa ndaga gwĩtĩkania na mũthuri wakwa, aanjĩraga atĩrĩ, ‘No nginya wĩke ũrĩa wothe ndĩroiga tondũ nĩ niĩ mũthuriguo.’”

Mũthuri angĩhingia itemi rĩake atĩa na njĩra ya wendo? Mũthuri angĩiga mũciĩ wake atĩa nĩguo mũtumia wake aiguage aiganĩire na ũrĩ ‘handũ ha gũikara ahoreire’?—Ruthu 1:9.

O na gũtuĩka maitho-inĩ ma Ngai mũthuri na mũtumia gũtirĩ wa bata gũkĩra ũrĩa ũngĩ, Bibilia yugaga atĩ o mũndũ arĩ na itemi rĩake thĩinĩ wa famĩlĩ. Rĩandĩko rĩa Aroma 7:2 riugaga atĩ mũtumia mũhiku akoragwo rungu rwa ‘watho wa mũthuri wake.’ O ta ũrĩa kambuni nyingĩ ciamũraga mũndũ ũmwe atongoragie maũndũ, noguo Ngai amũrĩte mũthuri atongoragie mũtumia wake. (1 Akorintho 11:3) Athuri nĩ magĩrĩirũo gũtongoria maũndũ thĩinĩ wa mĩciĩ yao.

Inyuĩ athuri-rĩ, mwagĩrĩirũo kũhũthĩra ũtongoria ũcio mũheetwo nĩ Ngai na njĩra ĩrĩkũ? Bibilia yugaga ũũ: “Endagai atumia anyu o ta ũrĩa Kristo nake endire kanitha.” (Aefeso 5:25) O na gũtuĩka Jesu Kristo ndaahikanirie, kĩonereria gĩake no gĩgũteithie ũrĩa ũngĩtuĩka mũthuri mwega. Reke tuone nĩ na njĩra ĩrĩkũ.

Jesu nĩ aacaragia ũrĩa angĩũmĩrĩria arĩa angĩ na kũmateithia. Jesu eerire arĩa othe maahinyĩrĩirio na makaritũhĩrũo nĩ mathĩna mao ũũ: “Ũkai kũrĩ niĩ, . . . na nĩngũmũhurũkia.” (Mathayo 11:28, 29) Kaingĩ nĩ aahũthahũthagĩria andũ mathĩna ma kĩĩmwĩrĩ na akamaruta maũndũ mega ma kĩĩroho. Nĩkĩo andũ aingĩ maaiguaga makĩguucĩrĩrio  harĩ Jesu, tondũ maarĩ na ma atĩ nĩ ekũmahũthahũthĩria mĩrigo.

Ũrĩa athuri mangĩĩgerekania na Jesu. Caragia ũrĩa ũngĩteithia mũtumia waku mawĩra marĩa arĩ namo. Atumia amwe maiguaga o ta Rosa ũrĩa woigire ũũ arĩ na ruo: “Harĩ mũthuri wakwa, ndaahanaga o ta ngombo ya wĩra.” Mũgarũ na ũguo, mũthuri ũmwe wĩtagwo Kweku, ũrĩa kĩhiko gĩake kĩgacĩrĩte oigaga ũũ: “Kaingĩ nĩ njũũragia mũtumia wakwa ũrĩa angĩenda ndĩmũteithie. Tondũ nĩ ndĩmwendete, kaingĩ nĩ ndĩrutagĩra kũmũteithia mawĩra ma mũciĩ.”

Jesu nĩ eeciragia andũ na akamacaĩra. Kwa ihinda rĩa mĩaka 12, mũtumia ũmwe mũthĩni nĩ aakoretwo agĩthumbũrũo nĩ thĩna mũnene wa mwĩrĩ. Rĩrĩa aaiguire ũrĩa Jesu aaringaga ciama, “oigire atĩrĩ, Ingĩhutia o nguo ciake ciiki, ndahona.” Ndaahĩtĩtie. Aakuhĩrĩirie Jesu, akĩhutia gĩcũrĩ kĩa nguo yake, na akĩhona o rĩo. O na gũtuĩka andũ amwe no kũhoteke moonaga mũtumia ũcio ta aarĩ mwĩgerereri, Jesu nĩ onire atĩ nĩ ngoro aakuĩte. * Aamwĩrire ũũ arĩ na wendo: “Mwarĩ ũyũ, . . . thiĩ na ũhoro, ũikare wĩ mũhonu mũrimũ waku.” O na gũtuĩka nĩ aamenyaga  mũrimũ ũrĩa mũtumia ũcio aarwarĩte, nĩ eethemire kũmũconorithia kana kũmũkũma. Na njĩra ĩyo akĩonania atĩ aarĩ mũndũ mũcayanĩri.—Mariko 5:25-34.

Ũrĩa athuri mangĩĩgerekania na Jesu. Rĩrĩa mũtumia waku arathumbũrũo nĩ mwĩrĩ, mũrũmbũyagie na njĩra ya wendo na ũrĩ na wetereri. Geria kwĩĩkĩra iratũ-inĩ ciake na ũtaũkĩrũo nĩ kĩrĩa kĩratũma eke ũndũ mũna. Kwa ngerekano, Ricardo aataarĩirie ũũ: “Ingĩona atĩ mũtumia wakwa nĩ arahiũkĩrũo narua, nĩ ngeragia mũno ndikoige ũndũ ũngĩthũkia ũhoro makĩria.”

Jesu nĩ aaranagĩria na arutwo ake. Jesu nĩ aaragia na arata ake na njĩra ndikĩru. Aamerire ũũ: “Nĩndĩmũmenyithĩtie maũndũ mothe marĩa njiguĩte harĩ Awa.” (Johana 15:15) Hatarĩ nganja, rĩmwe na rĩmwe Jesu nĩ eendaga gũkorũo arĩ wiki nĩguo ecũranie na ahoe. No kaingĩ nĩ eeraga arutwo ake ũrĩa aaiguaga ngoro-inĩ. Ũtukũ ũmwe atanoragwo arĩ ta mwĩkinaĩ, nĩ aamerire atekũhitha atĩ ‘ngoro yake nĩ yaiguaga kĩeha mũno.’ (Mathayo 26:38) O na rĩrĩa arata ake meka maũndũ mataramũkenia, Jesu ndaatigaga kwaranĩria nao.—Mathayo 26:40, 41.

Ũrĩa athuri mangĩĩgerekania na Jesu. Aranagĩria na mũtumia waku kuuma ngoro. Mũtumia no oige atĩ mũthuriwe nĩ aragia rĩrĩa arĩ na andũ arĩa angĩ, no arĩ mũciĩ ndaragia. No ta rora wone ũrĩa mũtumia ũmwe wĩtagwo Ana aiguaga rĩrĩa mũthuriwe amwarĩria kuuma ngoro, oigire ũũ: “Nyonaga atĩ kũna nĩ anyendete, na ngaigua ndĩ hakuhĩ nake.”

Wĩtheme gũkiragĩra mũtumia waku ĩrĩ ta njĩra ya kũmũherithia. Mũtumia ũmwe oigire ũũ: “Ingĩarakaririe mũthuri wakwa, aaikaraga thikũ nyingĩ atekũnjarĩria. Aatũmaga ndĩigue itarĩ kĩene na hĩtĩtie mũno.” No Edwin nĩ ageragia kwĩgerekania na Jesu. Oigire ũũ: “Rĩrĩa ndarakara, handũ ha kũhiũha kwaria, njethaga ihinda rĩrĩa rĩagĩrĩire rĩa kwarĩrĩria ũndũ ũcio na mũtumia wakwa.”

Joy ũrĩa ũkũgwetetwo kĩambĩrĩria-inĩ gĩa gĩcunjĩ gĩkĩ, nĩ onete ũgarũrũku harĩ mũthuri wake kuuma ambĩrĩria kwĩruta Bibilia na Aira a Jehova. Oigire ũũ: “Nĩ agagĩrĩte na nĩ arerutanĩria gũkorũo arĩ mũthuri ũrĩ wendo akĩĩgerekania na Jesu.” Andũ milioni nyingĩ arĩa mahikanĩtie nĩ maragunĩka nĩ gĩthomo kĩu kĩa Bibilia. Hihi wee no wende kũnyitanĩra nao? No ũrie Mũira wa Jehova akũrute Bibilia hatarĩ marĩhi.