Ndaciarĩirũo taũni ya Baku, bũrũri-inĩ wa Azerbaijan. Twaciarĩtwo tũrĩ erĩ, ndĩ kĩhinga nda. Baba aarĩ Mũithĩramu, na mami aarĩ Mũyahudi. Aciari akwa nĩ meendanĩte na o mũndũ nĩ aatĩĩte wĩtĩkio wa ũrĩa ũngĩ. Mami nĩ aanyitaga baba mbaru hĩndĩ ya kwĩhinga mweri-inĩ wa Ramathani, nake baba akamũnyita mbaru hĩndĩ ya Bathaka. Gwitũ mũciĩ nĩ twarĩ na Korani, mabuku ma Kĩyahudi metagwo Torah, na Bibilia.

Niĩ ndeetaraga ndĩ Mũithĩramu. O na gũtuĩka ndiarĩ na nganja atĩ Ngai e kuo, nĩ kwarĩ maũndũ maandigithagia mũno. Ndeyũragia atĩrĩ, ‘Ngai ombire andũ nĩkĩ, na hakĩrĩ bata ũrĩkũ mũndũ atũũre anyamarĩkaga na marigĩrĩrio aikio icua-inĩ atũũre ahĩaga tene na tene?’ Tondũ andũ moigaga atĩ ũndũ wothe wĩkĩkaga nĩ wendi wa Ngai, ndaarigagwo atĩrĩ, ‘Hihi Ngai nĩwe ũrehagĩra andũ mathĩna acoke akenerere makĩnyamarĩka?’

Ndakinyia mĩaka 12, ngĩambĩrĩria kũhoyaga mahoya matano ma Gĩithĩramu metagwo namaz, marĩa marutagwo o mũthenya. Ihinda-inĩ o rĩu, Baba agĩtũtwara cukuru ya Kĩyahudi tũrĩ na mwarĩ wa maitũ. Mathomo marĩa twarutagwo, nĩ hamwe na ũndũire wa Kĩyahudi, na rũthiomi rwa Kĩhibirania. O mũthenya tũtanambĩrĩria gũthoma, no mũhaka tũngĩahoire kũringana na ũndũire wa Kĩyahudi. Kwoguo ndĩ mũciĩ rũcinĩ, ndaahoyaga mahoya ma namaz, na thutha ũcio ndĩ cukuru nganyitanĩra mahoya-inĩ ma Kĩyahudi.

Nĩ ndaanyotagĩra mũno kuona macokio ma ciũria ciakwa. Maita maingĩ ndĩ cukuru, nĩ ndoragia arutani a maũndũ ma Kĩyahudi ũũ: “Ngai ombire andũ nĩkĩ? Na tondũ baba nĩ Mũithĩramu-rĩ, hihi Ngai amuonaga atĩa? We nĩ mũndũ mwega, no nĩ kĩĩ gĩtũmaga oneke ta atarĩ mũtheru? Ngai aamũmbire nĩkĩ?” Ndiaiguire ndaiganĩra nĩ macokio marĩa ndaheirũo.

Wĩtĩkio wakwa harĩ Ngai nĩ wathingithirio mwaka-inĩ wa 2002. Twakoretwo o hĩndĩ twathamĩra Njĩrĩmani, na thutha wa kiumia kĩmwe  baba akĩrwara mũrimũ wa gũkua ciĩga na agĩikara atekwĩigua. Kwa ihinda iraihu nĩ ndakoretwo ngĩhoera famĩlĩ iitũ ĩkorũo na ũgima mwega wa mwĩrĩ na ĩgaacĩre. Tondũ nĩ ndetĩkĩtie biũ atĩ Mwene Hinya Wothe nowe ũrĩ na ũhoti igũrũ rĩa muoyo na gĩkuũ, nĩ ndaamũthaithaga o mũthenya igũrũ rĩgiĩ baba. Ndeĩraga atĩrĩ, ‘Ngai ndangĩona arĩ hinya kũhingia merirĩria ma kairĩtu kanini.’ Ndaarĩ na ma atĩ nĩ ekũigua gũthaithana gwakwa. No baba nĩ aakuire.

Nĩ ndaakuire ngoro mũno kuona atĩ Ngai ndaarũmbũirie ũndũ ũcio. Ngĩĩra atĩrĩ, ‘No gũkorũo nĩ niĩ ndĩrahoya ũrĩa gũtagĩrĩire, kana, gũtirĩ Ngai.’ Ngĩtukanĩrũo nginya ngĩremwo kũhoya mahoya ma namaz rĩngĩ. Ndiakenagio nĩ ndini iria ingĩ, na nĩ ũndũ ũcio ngĩtua atĩ gũtirĩ Ngai.

Mĩeri ĩtandatũ thutha ũcio, Aira a Jehova magĩceera gwitũ mũciĩ. Na tondũ tũtiakenagio nĩ Akristiano-rĩ, tũrĩ na mwarĩ wa maitũ twendaga kũmonia na njĩra ya gĩtĩo atĩ nĩ mahĩtĩtie. Tũkĩmooria ũũ: “Nĩ kĩĩ gĩtũmaga Akristiano mahoe Jesu, mũtharaba, Mariamu, na mĩhianano ĩngĩ, na Maathani marĩa Ikũmi nĩ maregete ũndũ ũcio?” Ahunjia acio nĩ maahũthĩrire Maandĩko gũtuonia wega atĩ Akristiano matiĩtĩkĩrĩtio kũhoya mĩhianano, na atĩ no Ngai wiki tu wagĩrĩire kũhoywo. Ũndũ ũcio nĩ wangegirie.

Tũgĩcoka tũkĩmooria ũũ: “Ĩ naguo ũhoro wĩgiĩ Ũtatũ? Angĩkorũo Jesu nĩ Ngai-rĩ, kũngĩahotekire atĩa aikare gũkũ thĩ na oragwo nĩ andũ?” O rĩngĩ, makĩhũthĩra Bibilia gũtũtaarĩria atĩ Jesu ti Ngai na o na ndaiganaine Nake. Magĩtũtaarĩria atĩ o matiĩtĩkĩtie Ũtatũ nĩ ũndũ wa gĩtũmi kĩu. Ũndũ ũcio nĩ wangegirie nginya ngĩĩra atĩrĩ, ‘Aya nĩ Akristiano marĩ kĩriga.’

O na kũrĩ ũguo, nĩ ndeendaga kũmenya kĩrĩa gĩtũmaga andũ makue na kĩrĩa gĩtũmaga Ngai etĩkĩrie mĩnyamaro. Aira acio a Jehova makĩnyonia ibuku rĩĩtagwo Ujuzi Uongozao Kwenye Uhai Udumuo Milele, * rĩrĩa rĩarĩ na icunjĩ ciacokagia ciũria ciakwa. O rĩo ngĩambĩrĩria kwĩruta Bibilia hamwe nao.

Hĩndĩ ciothe tũkĩĩruta, nĩ ndagĩaga na macokio mega ma ciũria ciakwa kuuma Bibilia-inĩ. Ngĩrĩkia kũmenya atĩ Ngai etagwo Jehova. (Thaburi 83:18) Na ngumo yake ĩrĩa nene nĩ wendo. (1 Johana 4:8) Ombire andũ tondũ nĩ eendaga o nao makenere kĩheo kĩa muoyo. Nĩ ndataũkĩirũo atĩ o na gũtuĩka Ngai nĩ etĩkagĩria mĩnyamaro, nĩ amĩthũire na nĩ arĩmĩniina kaimana. Ngĩĩruta atĩ ũremi wa Adamu na Hawa nĩguo ũreheire andũ moimĩrĩro mooru. (Aroma 5:12) Moimĩrĩro macio nĩ hamwe na gũkua kwa endwa aitũ, o hamwe na baba. O na kũrĩ ũguo, Ngai nĩ arĩgarũrania maũndũ macio mothe thĩinĩ wa thĩ njerũ, kũrĩa andũ arĩa makuĩte magacoka muoyo rĩngĩ.—Atũmwo 24:15.

Bibilia nĩ yaaheire macokio ma ciũria ciakwa. Ngĩambĩrĩria gwĩtĩkia rĩngĩ atĩ nĩ kũrĩ Ngai. O ũrĩa ndathiaga ngĩmenyaga Aira a Jehova wega makĩria, nĩ ndonire atĩ makoragwo na ũrũmwe thĩinĩ wa thĩ yothe. Ũrũmwe na wendo ũrĩa makoragwo naguo nĩ wangenirie mũno. (Johana 13:34, 35) Maũndũ marĩa ndeerutire megiĩ Jehova nĩ maatũmire nyende kũmũtungatĩra, kwogwo ngĩtua itua rĩa gũtuĩka Mũira wa Jehova. Ngĩbatithio Janũarĩ 8, mwaka wa 2005.

Macokio mega ma Bibilia nĩ maagarũrire na makĩagĩria muonere wakwa wa maũndũ ũtũũro-inĩ. Maũndũ ma kwĩhokeka marĩa Bibilia ĩtaaragĩria nĩ mandehagĩra thayũ wa meciria. Nĩ ngenaga mũno na ngomĩrĩrio nĩ kĩĩrĩgĩrĩro gĩa gũkoona baba rĩngĩ kũgerera kũriũka kũrĩa Ngai eranĩire thĩinĩ wa Kiugo gĩake.—Johana 5:28, 29.

Kwa ihinda rĩa mĩaka ĩtandatũ, niĩ na Jonathan mũthuri wakwa mwĩtigĩri Ngai tũkoretwo kĩhiko-inĩ kĩrĩ na gĩkeno. Ithuerĩ nĩ twĩrutĩte atĩ ma ĩrĩa ĩkoniĩ Ngai nĩ njega na hũthũ, no nĩ mũthithũ wa goro mũno. Nĩkĩo tũkenagĩra kũhunjĩria andũ ũhoro wĩgiĩ wĩtĩkio witũ na kĩĩrĩgĩrĩro giitũ kĩa magegania. Rĩu nĩ ndĩkĩtie kũmenya atĩ Aira a Jehova, ti andũ marĩ “kĩriga” no nĩ Akristiano a ma.