Eric: Niĩ ndiĩkĩrĩire mũno maũndũ ma ndini. Kwoguo ndirona ta tũkũiguithania nawe.

Brian: Nĩ ngatho nĩ ũndũ wa kũnjĩra ũguo. Ha rĩĩtwa, njĩtagwo Brian. Ĩ wee wĩtagwo atĩa?

Eric: Njĩtagwo Eric.

Brian: Eric nĩ ndakena mũno nĩ gũcemania nawe.

Eric: O ũndũ ũmwe.

Brian: Hihi no njũrie atĩrĩ, ũrereirũo ndini-inĩ?

Eric: Ĩĩ. No kuuma rĩrĩa ndoimire mũciĩ ngĩthiĩ korenji, nĩ ta ndoimanirũo na maũndũ ma ndini.

Brian: Nĩ ndaigua. Na wathomeire kĩĩ korenji?

Eric: Ndeekire Social studies na historĩ. Nĩ nyendete historĩ mũno, ũhoro wĩgiĩ ũtũũro wa andũ gũkũ thĩ.

Brian: Historĩ ĩkoragwo ĩrĩ njega mũno. No gũkorũo nĩ ũĩ atĩ Bibilia nĩ ibuku rĩa historĩ. Hihi wanahũthĩra Bibilia gwĩka ũthuthuria waku?

Eric: Aca. Nĩ njũĩ nĩ ibuku rĩega, no ndirĩ ndeciria atĩ nĩ rĩarĩrĩirie maũndũ ma historĩ.

Brian: Nĩ ndĩrakenio mũno nĩ muonere waku wa maũndũ. Ũngĩhe ndagĩka nini tu, no nguonie ngerekano cigana ũna ironania atĩ maũndũ marĩa Bibilia yarĩtie ma historĩ nĩ ma ma.

Eric: Hatirĩ thĩna. No ndirĩ na Bibilia.

Brian: Ndũkamake. Nĩ tũkũhũthĩra yakwa. Ngerekano ĩmwe ĩ haha thĩinĩ wa 1 Maũndũ ma Matukũ ma Tene mũrango wa 29, mũhari wa 26 na wa 27. Mĩhari ĩno yugĩte ũũ: “Na rĩrĩ, Daudi, mũrũ wa Jesii, aathamakagĩra Aisiraeli othe. Na rĩo ihinda rĩrĩa aathamakĩire Isiraeli rĩarĩ mĩaka mĩrongo ĩna; no rĩrĩ, mĩaka mũgwanja aathamakire arĩ Hebironi, nayo mĩaka mĩrongo ĩtatũ na ĩtatũ agĩthamaka arĩ Jerusalemu.”

Eric: Hau haronania atĩa atĩ historĩ ya Bibilia nĩ ya ma?

Brian: Andũ amwe manekĩrĩra nganja kana hihi Mũthamaki Daudi aarĩ kuo.

Eric: Nĩguo? Mangĩkĩrĩra nganja nĩkĩ hihi?

Brian: Gũtiarĩ na ũira mũingĩ wa kuonania atĩ Daudi aarĩ mũndũ watũũraga, tiga ũrĩa ũrĩ thĩinĩ wa Bibilia. No kũrĩ mwaka-inĩ wa 1993, athuthuria a matigari ma indo cia tene nĩ maathikũririe ihiga rĩa tene rĩandĩkĩtwo ciugo iria ciataũrũo ciugĩte, “Nyũmba ya Daudi.”

Eric: Nĩ ndaigua!

Brian: Mũndũ ũngĩ ũgwetetwo thĩinĩ wa Bibilia wanekĩrĩrũo nganja, nĩ Pontio Pilato ũrĩa wathanaga arĩ barũthi kana ngavana hĩndĩ ya Jesu. Agwetetwo haha thĩinĩ wa Luka mũrango wa 3 mũhari wa 1​​—⁠hamwe na aruti angĩ a wĩra a thirikari a hĩndĩ ĩo.

Eric: Nĩ ndona. Yoiga atĩ: “Hĩndĩ ĩo, nĩ Pontio Pilato warĩ barũthi wa gwathaga Judea, nake Herode aarĩ mũthamaki wa Galili.”

Brian: Nĩguo. Kwa ihinda rĩa mĩaka mĩingĩ, athomi amwe manekĩrĩra nganja kana nĩ ma nĩ gwatũũraga mũndũ wetagwo Pontio Pilato. Thutha ũcio, mĩaka  ta 50 mĩhĩtũku, nĩ kuonekire ihiga rĩcongetwo wega rĩĩtwa rĩake, kũũrĩa Asia ya Gatagatĩ.

Eric: Ndirĩ ndaigua ũhoro ta ũcio rĩngĩ.

Brian: Nĩ ndakena tondũ nĩ wahe mweke wa gũkwĩra.

Eric: Kwaria ũhoro wa ma, nĩ nyonaga atĩ Bibilia nĩ yandĩkĩtwo wega mũno, no ndirĩ ndona ũhoro wayo ta ũngĩhutia mahinda maya. Maũndũ marĩa yarĩtie ma historĩ no makorũo marĩ ma ma, no ndirona ta ĩngĩtũguna na njĩra o yothe.

Brian: Andũ aingĩ mũno no metĩkanie na ũguo woiga. No niĩ ndĩ na mawoni ngũrani. Gĩtũmi nĩ tondũ, maũndũ ma mũthingi marĩa andũ mabataraga maticenjagia. Kwa ngerekano, hingo ciothe nĩ tũbataraga irio, nguo, na ha gũikara. Nĩ tuiguaga nĩ tũrabatara kwaranĩria na andũ arĩa angĩ, na kũgĩa na famĩlĩ ĩrĩ na gĩkeno. Na githĩ to tuuge atĩ ithuothe nĩ tuonaga bata wa maũndũ macio?

Eric: Nĩ ma.

Brian: Bibilia no ĩtũteithie maũndũ-inĩ macio mothe. No tũmĩĩte ibuku rĩa tene, ĩndĩ rĩrĩ na ũguni mahinda maya.

Eric: Ũrenda kuuga atĩa?

Brian: Ndĩrenda kuuga atĩrĩrĩ: Bibilia ĩkoragwo na motaaro ma bata matũgunaga ũmũthĩ o ta ũrĩa maakoragwo na ũguni rĩrĩa yandĩkagwo mĩaka mĩingĩ mĩhĩtũku.

Eric: Maũndũ-inĩ ta marĩkũ?

Brian: Ta rĩu ũhoro-inĩ wĩgiĩ gũkorũo na mawoni marĩa magĩrĩire megiĩ mbeca, kũgĩa na famĩlĩ ĩrĩ na gĩkeno, kana mũndũ gũkorũo arĩ mũrata mwega, motaaro ma Bibilia no matũteithie. Bibilia no ĩtuonie ũrĩa tũngĩka nĩguo tũgaacĩre ũtũũro-inĩ. Kwa ngerekano, ngwĩciria no wĩtĩkanie na niĩ atĩ gũtuĩka mũthuri mwega, na kũhota gũtongoria famĩlĩ mahinda-inĩ maya ti ũndũ mũhũthũ.

Eric: Nĩ ma, hau ndingĩrega. Niĩ na mũtumia wakwa tũkoretwo thĩinĩ wa kĩhiko ihinda rĩa mwaka ũmwe ũguo, na ndũkoretwo ũrĩ ũndũ mũhũthũ kũiguithania.

Brian: No ũhoro mwega nĩ atĩ, Bibilia ĩrĩ na motaaro mahũthũ mangĩtũteithia. Kwa ngerekano ta wĩcirie ibuku rĩa Aefeso mũrango wa 5. Reke tũthome mũhari wa 22, 23, na 28. Ũngĩenda no ũthome mĩhari ĩno.

Eric: Reke thome. Ĩroiga ũũ: “Inyuĩ atumia, athĩkagĩrai athuri anyu inyuene, o ta ũrĩa mũngĩathĩkagĩra Mwathani. Tondũ mũndũ mũrũme nĩwe mũtwe wa mũtumia, o ta ũrĩa Kristo nake arĩ we mũtwe wa kanitha, akĩrĩ o we mũhonokia wa mwĩrĩ ũcio.” Naguo mũhari wa 28 ũkoiga: “O ũguo noguo athuri nao maagĩrĩirũo nĩ kwendaga atumia ao ene, o ta arĩ o mĩĩrĩ yao ene. Mũndũ ũrĩa wendaga mũtumia wake, nĩwe wĩendaga.”

Brian: Nĩ ngatho nĩ gũthoma wega. Ũkuona atĩa? Andũ arĩa mahikanĩtie mangĩgeria kũhũthĩra ũtaaro ũcio-rĩ, na githĩ famĩlĩ to ĩgaacĩre?

Eric: Nĩ ma no ĩgaacĩre. Ĩndĩ kuuga ũguo nĩ ũndũ mũhũthũ gũkĩra gwĩka.

Brian: Ũrĩa kũrĩ nĩ atĩ, gũtirĩ mũndũ mũkinyanĩru. Ũngĩhumbũria tũratathi tũigana ũna mbere ya hau twathoma, no wone mũhari wĩkĩraga andũ ngoro gũkiranagĩrĩria. * Ũrata o wothe nĩ ũbataraga andũ makorũo na ũigananĩru na magakiranagĩrĩria. Tũrĩ na mũtumia wakwa nĩ tuonete atĩ Bibilia no ĩtũteithie kũgĩa na ũigananĩru.

Eric: Ũcio nĩ ũndũ mwega.

Brian: Aira a Jehova nĩ makoragwo na Website ĩrĩ na ũhoro mwega wĩgiĩ kĩhiko na ũtũũro wa famĩlĩ. Ũngĩhe ndagĩka cigana ũna, no nguonie ũndũ ũmwe ũrĩ thĩinĩ wa Website ĩyo.

Eric: No ũhũthĩre ndagĩka cigana ũna.

Brian: Nĩ wega. Andirethi cia Website ĩyo nĩ www.pr418.com/ki. Ũũ nĩguo ĩhaana.

Eric: Kaĩ ĩkĩrĩ na mbica thaka atĩa?

Brian: Mbica ici nĩ cia andũ marĩ wĩra-inĩ ũrĩa tũrutaga wa kũhunjia thĩinĩ wa thĩ yothe. Harĩ na kĩongo haha gĩtĩtwo “Mabuku.” Ũngĩhihinya ho, nĩ ũkuona ngathĩti njerũ na mabuku mangĩ marĩrĩirie maũndũ  mwanya mwanya hamwe na megiĩ ũtũũro wa famĩlĩ. Kwa ngerekano, reke tũrore broshua ĩno ĩretwo Ũhoro Mwega Kuuma Kũrĩ Ngai! Ithomo rĩmwe thĩinĩ wa broshua ĩno nĩ “Famĩlĩ Yaku Ĩngĩgĩa na Gĩkeno Atĩa?”

Eric: Rĩu no rĩkorũo rĩrĩ ithomo rĩega mũno. No nyende kuona ũrĩa riugĩte!

Brian: Ithomo rĩrĩ nĩ rĩonanĩtie maũndũ maigana ũna mangĩgũteithia kũgĩa na gĩkeno kĩhiko-inĩ gĩaku. Ta reke tũthiĩ kĩbungo-inĩ gĩkĩ kĩrĩ rungu rwa kĩũria gĩa 2. Hihi no wende gũthoma raini ici igĩrĩ cia mũthia?

Eric: Ĩĩ reke thome. Iroiga ũũ: “Athuri na atumia ao magĩrĩirũo kuonanagia wendo na kũheanaga gĩtĩo. Tondũ athuri na atumia ti akinyanĩru, kwĩruta kuohanagĩra nĩ hitho ya gĩkeno kĩa famĩlĩ.” Nĩ ndona, ũcio nĩ ũhoro wa ma.

Brian: Nĩ ngatho nĩ ũndũ wa gũthoma. Rĩandĩko rĩa Aefeso 5:33 nĩ rĩmwe rĩa marĩa monanĩtio haha. Bibilia yakwa ĩrĩ o haha, hihi no wende kũrĩthoma?

Eric: Rĩroiga ũũ: “No rĩrĩ, o na gwatuĩka nĩ ũguo-rĩ, inyuĩ na inyuĩ, o mũndũ nĩendage mũtumia wake, o ta ũrĩa eendete we mwene: o nake mũtumia ndakaage gwĩtigĩra mũthuriwe.”

Brian: Hihi nĩ wona atĩ kĩrĩa kĩrekĩrĩrũo mũno nĩ mũndũ kũheana kĩrĩa angĩenda o nake kũheo?

Eric: Ndiranyita ũrĩa ũrenda kuuga.

Brian: Na githĩ ti ũhoro wa ma atĩ mũthuri nĩ endaga kuona akĩheo gĩtĩo nĩ mũtumia wake? Nake mũtumia githĩ ndendaga kwĩragwo kaingĩ nĩ mũthuri wake atĩ nĩ amwendete?

Eric: Nĩ ma, ũguo nĩguo kũrĩ.

Brian: Mũthuri angĩethaga kaingĩ mĩeke ya kuonagia mũtumia wake atĩ nĩ amwendete, no ũkorũo ũrĩ ũndũ mũhũthũ harĩ mũtumia kũmũhe gĩtĩo.

Eric: Nĩ ndetĩkania nawe.

Brian: O na gũtuĩka mũhari ũcio twathoma thĩinĩ wa Bibilia wandĩkirũo mĩaka ta 2,000 mĩhĩtũku, nĩ warĩrĩirie kĩrĩa mũthuri na mũtumia mabataraga, na ũkamahe motaaro marĩa mangĩkorũo na ũguni harĩ o mangĩmahũthĩra.

Eric: Hĩ, nĩ ndona atĩ Bibilia ĩrĩ na maũndũ maingĩ mũno ma bata gũkĩra ũrĩa ndĩreciragia.

Brian: Nĩ ndakena mũno kũigua ũguo, Eric. No nyende tũcemanie haha rĩngĩ njigue mawoni maku megiĩ kĩũria gĩkĩ gĩa 3 thĩinĩ wa ithomo rĩrĩ, “Hihi nĩ mwagĩrĩirũo kweheranĩra kĩhiko kĩanyu kĩngĩaga gĩkeno?” *

Eric: Hatirĩ thĩna. Nĩ tũkũhathoma hamwe na mũtumia wakwa.