KUUMA NGOTHI-INĨ | ŨRĨA ŨNGĨKENERA WĨRA WAKU
Wĩra Mũritũ—Hihi no Tũũkenere?
Alex akahũmũka o rĩrĩ aroya ithandũkũ rĩngĩ aigĩrĩre igũrũ wa rori ya kambũni ya gũkua mĩrigo ĩrĩa ĩmwandĩkĩte. Akeyũria atĩrĩ, ‘Ngũtũũra wĩra-inĩ ũyũ ũtarĩ handũ ũngĩndwara nginya rĩ? Nĩ rĩ ngagwĩra wĩra mwega? Ũtũũro wakwa no ũkorũo ũrĩ mwegega korũo ndiraruta wĩra ta ũyũ!’
O ta Alex, andũ aingĩ ũmũthĩ matikenagĩra kũruta wĩra mũritũ. Aaron ũrĩa ũrutaga wĩra wa makanika oigire ũũ: “Andũ aingĩ ũmũthĩ meciragia atĩ kũruta ‘wĩra o ũguo wa moko’ nĩ kwĩyagĩra kĩene. Moigaga ũũ: ‘Ndĩraruta wĩra ũyũ kamũira nyonete ũndũ ũngĩ mwegega wa gwĩka.’”
Nĩ kĩĩ gĩtũmaga andũ aingĩ mone ta matagĩrĩire kũruta wĩra mũritũ? No kũhoteke makoragwo mathũkĩtio nĩ nyũmba cia mohoro, iria kaingĩ cionanagia atĩ “ũtũũro mwega” nĩ mũndũ gũikara egangarĩte na atekũnoga. Matthew, ũrĩa ũrutaga wĩra wa gũthondeka nyũmba kũrĩa ĩthũkĩte, oigire ũũ: “Andũ meciragia atĩ o ũrĩa ũraruta wĩra mũritũ nĩguo wone gĩa kũrĩa, noguo mũndũ agaga kũgaacĩra.” Shane, ũrĩa ũrutaga wĩra wa kũramata na gũtheria nyũmba nĩ eyoneire ũndũ o ta ũcio. Oigire ũũ: “Andũ matirenda rĩngĩ kũruta wĩra ũringaine na mbeca iria marenda kũrĩhwo.”
O na kũrĩ ũguo, andũ aingĩ arĩa magaacĩrĩte nĩ makenagĩra kũruta wĩra mũritũ. Daniel, ũrĩa ũrĩ na mĩaka 25, na ũrutaga wĩra wa mĩako oigire ũũ: “Ngwĩciria atĩ wĩra mũritũ nĩ ũrĩ moimĩrĩro mega mũno, makĩria rĩrĩa mũndũ araũruta arĩ na muoroto mwega.” Nake Andre, ũrĩa ũrĩ na mĩaka 23, nĩ eetĩkanirie na ũndũ ũcio. Oigire ũũ: “Njĩtĩkĩtie atĩ wĩra nĩ ũtũmaga mũndũ aigue akenete. Kwĩyũa wĩra gũtingĩrehera mũndũ gĩkeno gĩa gũtũũra, no kũmũreheire kwaga kũiganĩra!”
Andũ ta Daniel na Andre mahotete atĩa kũgĩa na mwerekera ũrĩa wagĩrĩire wĩgiĩ wĩra? Nĩ na njĩra ya kũhũthĩra ũtaaro wa Bibilia ũtũũro-inĩ wao. Handũ ha kuonania atĩ wĩra mũritũ ti mwega, Bibilia ĩkagĩra andũ ngoro mekĩre kĩyo na makorũo na ũkirĩrĩria. Makĩria ma gũtwĩra tũrute wĩra, harĩ na ũndũ ũngĩ Bibilia ĩtwĩraga. Nĩ ĩtuonagia ũrĩa tũngĩkenera wĩra witũ.
Nĩ motaaro marĩkũ ma Bibilia mangĩgũteithia ũiguage ũiganĩire wĩra-inĩ waku? Tũrakũũria ũthuthurie mamwe mamo, ta ũrĩa marĩrĩirio gĩcunjĩ-inĩ kĩrĩa kĩrũmĩrĩire.
