Gũkua kwa Jesu nĩ kuo ũndũ ũrĩa wa bata mũno wanekĩka thĩinĩ wa historĩ, tondũ aakuire nĩguo ũtũũro wa mũndũ ũcoke ũrĩa wagĩrĩire gũkorũo. Mũndũ ndombirũo arĩ na mwerekera wa gwĩka maũndũ moru, arwarage, o na kana akuage. (Kĩambĩrĩria 1:31) No mehia nĩ maingĩrire gũkũ thĩ kũgerera mũndũ wa mbere, nĩwe Adamu. Jesu aakuire nĩguo atũkũũre kuuma kũrĩ mehia na gĩkuũ.​—Thoma Mathayo 20:28; Aroma 6:23.

Ngai nĩ onanirie wendo mũnene rĩrĩa aatũmire Mũrũ wake oke gũkũ thĩ akue nĩ ũndũ witũ. (1 Johana 4:​9, 10) Jesu eerire arũmĩrĩri ake maririkanage gĩkuũ gĩake makĩhũthĩra mũgate na ndibei, igongona-inĩ rĩtarĩ inene. Rĩrĩa tweka ũguo o mwaka, tuonanagia ngatho citũ nĩ ũndũ wa wendo ũrĩa Ngai na Jesu matuonetie.​—Thoma Luka 22:​19, 20.

Riita rĩa mbere rĩrĩa Jesu eerire arutwo ake maririkanage gĩkuũ gĩake, nĩ aaririe ũhoro wa kĩrĩkanĩro. (Mathayo 26:​26-28) Kĩrĩkanĩro kĩu nĩ gĩatũmire arutwo acio na andũ angĩ atare, magĩe na kĩĩrĩgĩrĩro gĩa gũgaatuĩka athamaki na athĩnjĩri Ngai marĩ hamwe nake kũũrĩa igũrũ. O na gũtuĩka andũ milioni nyingĩ nĩ maririkanaga gĩkuũ kĩa Jesu, no arĩa tu marĩ thĩinĩ wa kĩrĩkanĩro kĩu marĩaga mũgate na makanyua ndibei.​—Thoma Kũguũrĩrio 5:10.

Kwa ihinda rĩa hakuhĩ mĩaka 2, 000, Jehova nĩ akoretwo agĩthuura arĩa magaatuĩka athamaki. (Luka 12:32) Andũ acio nĩ anini makĩringithanio na arĩa magaatũũra tene na tene gũkũ thĩ.​—Thoma Kũguũrĩrio 7:​4, 9, 17.