NDEERETI HAMWE NA MŨIRA WA JEHOVA

Twagĩrĩirũo Kũririkana Gĩkuũ kĩa Jesu Nĩkĩ?

THAAKA

Gĩcunjĩ gĩkĩ nĩ kĩonereria kĩa ndeereti ĩrĩa Mũira wa Jehova angĩkorũo nayo hamwe na mũndũ ũngĩ. Ta reke tũtue atĩ Mũira wa Jehova wĩtagwo Megan nĩ aceera kwa mũtumia wĩtagwo Sarah.

“ĨKAGAI ŨŨ NĨ GETHA MŨNDIRIKANAGE”

Megan: Ũhoro waku Sarah. Nĩ ndĩrakenire mũno gũkuona Kĩririkano-inĩ gĩa gĩkuũ kĩa Jesu Kristo kiumia kĩu kĩrathirire. * Wonire kũhaana atĩa?

Sarah: Nĩ ndakeneire mũno gũkorũo kuo, no kwaria ma, ndingiuga atĩ nĩ ndaanyitire ũhoro wothe ũrĩa waheanagwo. Nĩ njũĩ atĩ andũ aingĩ nĩ mekĩrĩire mũno kũririkana gũciarũo kwa Jesu mũthenya wa Krismasi, gũkĩra ũrĩa mekĩrĩire kũririkana gĩkuũ gĩake. Hihi no ũndaarĩrie o rĩngĩ nĩkĩ nĩ harĩ bata tũririkanage gĩkuũ kĩa Jesu?

Megan: Nĩ ũhoro wa ma atĩ andũ aingĩ nĩ makũngũyagĩra Krismasi. No Aira a Jehova nĩ monaga atĩ mũthenya ũrĩa wa bata mũno kũririkana nĩ wa gĩkuũ kĩa Jesu. Angĩkorũo wĩ na ndagĩka nini, no nyende gũcokera na njĩra nguhĩ nguonie bata na itũmi cia gwĩka ũguo.

Sarah: Hatirĩ thĩna no ũnyonie.

Megan: Gĩtũmi kĩnene kĩrĩa gĩtũmaga Aira a Jehova maririkane gĩkuũ kĩa Jesu nĩ tondũ we mwene nĩ eerire arũmĩrĩri ake mekage ũguo. Ta wĩcirie ũndũ ũrĩa wekĩkire ũtukũ wake wa mũthia mbere ya akuĩte. Hihi nĩ ũrĩ waigua ũhoro wa irio cia mwanya iria aarĩanĩire na arũmĩrĩri ake ehokeku?

Sarah: Irio cia Hwaĩ-inĩ cia Mwathani?

Megan: Ĩĩ. Irio cia Hwaĩ-inĩ cia Mwathani. Hĩndĩ ĩrĩa maarĩaga irio icio, Jesu nĩ aataarĩirie arũmĩrĩri ake wega ũrĩa marĩĩkaga. Hihi no wende gũthoma ciugo ciake thĩinĩ wa Luka 22:19?

Sarah: Ĩĩ. “Agĩcoka akĩoya mũgate, na aarĩkia gũcokeria Ngai ngatho, akĩwenyũranga, akĩmane, akiuga atĩrĩ, Ũyũ nĩguo mwĩrĩ wakwa ũkũneanwo nĩ ũndũ wanyu: ĩkagai ũũ nĩ getha mũndirikanage.”

Megan: Nĩ ngatho. Ta rora ciugo cia Jesu iria irarĩkĩrĩria rĩandĩko-inĩ rĩu: “Ĩkagai ũũ nĩ getha mũndirikanage.” Na ataneera arũmĩrĩri ake mamũririkanage, nĩ aamerire wega kĩrĩa marĩririkanaga kĩmwĩgiĩ. Oigire atĩ akaaruta muoyo wake nĩ ũndũ wa arũmĩrĩri ake. Jesu aataarĩirie ũndũ ũcio kũgerera ciugo ingĩ o ta icio iria irĩ thĩinĩ wa Mathayo 20:28. Mũhari ũcio uugaga ũũ: “O ta ũrĩa Mũrũ wa mũndũ atokire gũtungatĩrũo no atungatanĩre, na arute muoyo wake ũtuĩke wa gũkũũra andũ aingĩ.” Na njĩra nguhĩ, nĩkĩo gĩtũmaga Aira a Jehova macemanie o mwaka tarĩki ĩringaine na ĩrĩa Jesu aakuire—nĩguo maririkane igongona rĩa ũkũũri rĩrĩa aarutire. Gĩkuũ gĩake no gĩtũme andũ arĩa othe aathĩki makoona muoyo.

IGONGONA RĨA ŨKŨŨRI RĨBATARĨKANAGA NĨKĨ?

Sarah: Nĩ njiguaga andũ makiuga atĩ Jesu aakuire nĩguo tũkona muoyo. No kwaria ma, ndirĩ ndamenya ũndũ ũcio ũhotekaga atĩa.

Megan: Na towe wiki Sarah. Ũrutani wĩgiĩ ũrĩa Jesu aarutire ũkũũri nĩ mũrikĩru. No ningĩ nĩ ũmwe wa morutani marĩa matũcanjamũraga mũno marĩ thĩinĩ wa Kiugo kĩa Ngai. No thiĩ na mbere gũgũtaarĩria?

Sarah: Harĩ na ndagĩka cigana ũna no tũthiĩ na mbere.

Megan: Nĩ ngatho. Ica ikuhĩ nĩ ngoretwo ngĩthoma ũhoro wĩgiĩ ũkũũri, na nĩ ngũgeria gũgũtaarĩria na njĩra hũthũ.

Sarah: No guo.

Megan: Nĩguo tũtaũkĩrũo nĩ ũkũũri, tũrabatara kwamba kũmenya ũndũ ũrĩa warehirũo nĩ Adamu na Hawa hĩndĩ ĩrĩa meehirie mũgũnda-inĩ wa Edeni. Nĩguo tũhote gũtaũkĩrũo nĩ ũndũ ũcio wega, reke twambe tũthome Aroma 6:23. No wende gũthoma rĩandĩko rĩu?

Sarah: No thome. Rĩroiga ũũ: “Mũcara wa wĩhia nĩ gĩkuũ, no kĩheo kĩrĩa Ngai aheanaga kiumanĩte na Wega wake nĩ muoyo wa tene na tene, ũrĩa wĩ thĩinĩ wa Kristo Jesu Mwathani witũ.”

Megan: Nĩ wega. Reke tũthuthurie ciugo icio. Wa mbere, rora ciugo iria ciambĩrĩirie mũhari ũcio: “Mũcara wa wĩhia nĩ gĩkuũ.” Ũcio nĩ ũndũ Ngai oigire kuuma o kĩambĩrĩria kĩa historĩ ya andũ—mũcara, kana ituĩro rĩa mehia, nĩ gĩkuũ. Nĩ ma, kĩambĩrĩria-inĩ gũtirĩ mũndũ warĩ mwĩhia. Adamu na Hawa moombirũo marĩ akinyanĩru, kwoguo ciana ciao ciothe ingĩarĩ nginyanĩru. Nĩ ũndũ ũcio hatingĩarĩ na gĩtũmi kĩa mũndũ o wothe gũkua. Adamu na Hawa o hamwe na njiarũa ciao maarĩ na kĩĩrĩgĩrĩro gĩa gũtũũra tene na tene marĩ na gĩkeno. Na githĩ tũtikĩũĩ ũguo tiguo kwahaanire?

Sarah: Ĩĩ. Adamu na Hawa nĩ maarĩire itunda rĩrĩa maagirĩtio.

Megan: Hau nĩ ma. Na hĩndĩ ĩrĩa Adamu na Hawa meekire ũguo, nĩ kwĩhia meehirie, tondũ nĩ maagire gwathĩka. Na njĩra ĩngĩ, maathurire gũkorũo matarĩ akinyanĩru, magĩtuĩka ehia. Itua rĩao nĩ rĩamareheire moimĩrĩro moru marĩ hamwe na njiarũa ciao.

Sarah: Ũrenda kuuga atĩa?

Megan: Reke ngũtaarĩrie na ngerekano. Hihi wee nĩ wendete kũruga keki kana mĩgate?

Sarah: Ĩĩ! Nĩ nyendete mũno.

Megan: Ta reke tũtue atĩ wĩna karaĩ kerũ ga kũruga keki na mĩgate. No ũtanakahũthĩra o na rita rĩmwe, gakagwa na mwena ũmwe ũkahondera. Hihi mĩgate ĩrĩa ũngĩruga na karaĩ kau ĩngĩkorũo ĩhaana atĩa? Na githĩ o nayo ndĩgũkorũo ĩrĩ o mĩhonderu?

Sarah: Ĩĩ nĩguo.

Megan: Na njĩra o ta ĩyo, rĩrĩa Adamu na Hawa maathurire kwaga gwathĩkĩra Ngai, nĩ meekĩrirũo “kĩrema” nĩ mehia na kwaga gũkinyanĩra. Na tondũ meehirie matagĩte ciana, njiarũa ciao ciothe ikoragwo irĩ na “kĩrema” o ta kĩu. Othe maciaragwo marĩ ehia. Thĩinĩ wa Bibilia, kiugo “mehia” gĩtionanagia o gĩĩko tu, no nĩ nginya ũndũ ũrĩa twagaire. Moimĩrĩro nĩ atĩ, o na gũtuĩka tũtiekĩte ũndũ mũru, tondũ o na tũtiakĩrĩ aciare, rĩrĩa Adamu na Hawa meehirie, nĩ maatwendirie ũtũũro-inĩ wa mehia na kwaga gũkinyanĩra, na marigĩrĩrio-inĩ tũgakua. O ta ũrĩa twathoma rĩandĩko-inĩ rĩa Aroma 6:23, mũcara wa mehia nĩ gĩkuũ.

Sarah: Na kĩu no kĩhooto? Andũ othe mangĩkĩnyamarĩka nĩkĩ nĩ ũndũ wa mehia ma Adamu na Hawa?

Megan: Nĩ ma no honeke ta hatarĩ kĩhooto. No nĩ harĩ ũndũ ũngĩ makĩria ma ũguo. Tondũ kĩhooto gĩake nĩ gĩkinyanĩru, Ngai oigire atĩ no nginya Adamu na Hawa makue nĩ ũndũ wa mehia mao, no ithuĩ tũrĩ njiarũa ciao tũtiatigirũo tũtarĩ na mwĩhoko. Ngai nĩ aaharĩrĩirie njĩra ya gũtũruta thĩna-inĩ ũyũ. Na hau nĩho igongona rĩa ũkũũri rĩa Jesu rĩũkagĩra. Rora o rĩngĩ rĩandĩko rĩa Aroma 6:23. Thutha wa kũgweta atĩ “mũcara wa mehia nĩ gĩkuũ,” mũhari ũcio woiga: “No kĩheo kĩrĩa Ngai aheanaga kiumanĩte na Wega wake nĩ muoyo wa tene na tene, ũrĩa wĩ thĩinĩ wa Kristo Jesu Mwathani witũ.” Kwoguo gĩkuũ kĩa Jesu nĩkĩo gĩtũhingũragĩra njĩra ya gũkũũrũo kuuma kũrĩ mehia na gĩkuũ. *

ŨKŨŨRI —KĨHEO KĨA NGAI KĨNENE MAKĨRIA

Megan: Harĩ kaũndũ kangĩ thĩinĩ wa rĩandĩko rĩrĩ ingĩenda gũgũtaarĩria.

Sarah: Nĩ karĩkũ?

Megan: Ta rora wone atĩ mũhari ũcio ũroiga: “No kĩheo kĩrĩa Ngai aheanaga kiumanĩte na Wega wake nĩ muoyo wa tene na tene, ũrĩa wĩ thĩinĩ wa Kristo Jesu Mwathani witũ.” Angĩkorũo Jesu nĩwe wanyamarĩkire na agĩkua nĩ ũndũ witũ-rĩ, hihi nĩ kĩĩ kĩratũma mũhari ũcio uge atĩ ũkũũri nĩ “kĩheo kĩrĩa Ngai aheanaga”? Mũhari ũcio ũraaga kuuga nĩ “kĩheo kĩrĩa Jesu aheanaga” nĩkĩ? *

Sarah: Hau ndiũĩ.

Megan: Ngai ombire Adamu na Hawa, na nĩ we maahĩtĩirie rĩrĩa maagire gwathĩka mũgũnda-inĩ wa Edeni. No mũhaka akorũo nĩ aatuurirũo mũno rĩrĩa ciana icio ciake igĩrĩ ciamũremeire. Ĩndĩ, o rĩo Jehova nĩ aagwetire ũndũ ũrĩa ũkaarehe kĩhonia. * Nĩ aaharĩrĩirie ũrĩa ũmwe wa ciũmbe ciake cia roho angĩgoka gũkũ thĩ, atũũre arĩ mũndũ mũkinyanĩru, acoke arute muoyo wake ũrĩ igongona rĩa ũkũũri. Nĩ ũndũ ũcio, ũkũũri nĩ kĩheo kuuma kũrĩ Ngai. No nĩ harĩ ũndũ ũngĩ ũtũmaga ũkũũri ũkorũo ũrĩ kĩheo kuuma kũrĩ Ngai. Hihi nĩ ũrĩ weciria ũrĩa Ngai aiguire rĩrĩa Jesu oragirũo?

Sarah: Aca, ndirĩ ndeciria ũhoro ũcio.

Megan: Ndĩrona tũindo twa gũthaka twa ciana gũkũ. Kwahoteka wĩ na ciana.

Sarah: Ĩĩ nĩ ndĩ ciana igĩrĩ, kahĩĩ na kairĩtu.

Megan: Wĩ ta mũciari-rĩ, ta wĩcirie ũrĩa Ithe wa Jesu, Jehova Ngai, aiguire mũthenya ũrĩa Jesu aakuire. Ndĩrenda kuuga atĩrĩrĩ, hihi Ngai aiguire atĩa arĩ igũrũ kuona Mũrũ wake endete akĩnyitwo, akĩnyũrũrio, na akĩhũrũo? Na hihi aiguire atĩa rĩrĩa mũriũ aahũragĩrũo mĩcumarĩ mũtĩ-inĩ na agĩkua gĩkuũ gĩa kahora na kĩa ruo?

Sarah: Hĩ! No mũhaka akorũo nĩ aatuurirũo mũno.Ndirĩ ndeciria ũndũ ũcio!

Megan: Ũhoro wa ma nĩ atĩ, tũtingĩhota gũtaarĩria wega ũrĩa Ngai aaiguire mũthenya ũcio. Ũrĩa tũũĩ nĩ atĩ nĩ ahutagio mũno nĩ maũndũ marĩa marekĩka, na nĩ tũũĩ kĩrĩa gĩatũmire arekererie ũndũ ũcio wĩkĩke. Gĩtũmi kĩu nĩ gĩtaarĩirio wega thĩinĩ wa rĩandĩko rĩa Johana 3:16. No wende kũrĩthoma?

Sarah: Ĩĩ. Rĩroiga ũũ: “Amu Ngai, tondũ wa ũrĩa endete kĩrĩndĩ gĩa gũkũ thĩ, nĩaarutire Mũrũ wake wa mũmwe, nĩ getha mũndũ o wothe ũmwĩhokete ndakore, no agĩe muoyo wa tene na tene.”

Igongona rĩa ũkũũri nĩyo njĩra ĩrĩa nene Ngai oonanirie wendo nayo

Megan: Nĩ ngatho. O rĩngĩ ta rora ciugo cia mbere cia mũhari ũcio. Iroiga: “Amu Ngai, tondũ wa ũrĩa endete kĩrĩndĩ gĩa gũkũ thĩ.” Wendo nĩguo gĩtũmi. Wendo nĩguo watũmire Ngai atũme Mũrũ wake gũkũ thĩ akue nĩ ũndũ witũ. Hatarĩ nganja, igongona rĩa ũkũũri nĩyo njĩra ĩrĩa nene Ngai oonanirie wendo nayo. Na ũcio nĩguo ũndũ ũrĩa ũtũmaga Aira a Jehova macemanie o mwaka tarĩki ĩrĩa ĩringaine na mũthenya ũrĩa Jesu aakuire, nĩguo maũririkane. Hihi ũhoro ũcio twarĩrĩria na njĩra nguhĩ nĩ wagũteithia?

Sarah: Ĩĩ, nĩ wa ndeithia. Nĩ ngatho nĩ ũndũ wa kũhũthĩra mahinda maku kũmenyithia ũndũ ũcio.

Hihi nĩ harĩ ũrutani mũna wa Bibilia waneyũria ũhoro waguo? Nĩ harĩ maũndũ ũngĩenda kũmenya megiĩ wĩtĩkio kana morutani ma Aira a Jehova? Angĩkorũo nĩ harĩ, ndũkaigue hinya kũũria Mũira wa Jehova. Nĩ egũkena mũno kwarĩrĩria nawe maũndũ ta macio.

^ kĩb. 5 Rita rĩmwe o mwaka, Aira a Jehova nĩ macemanagia tarĩki ĩringaine na mũthenya ũrĩa Jesu aakuire nĩguo maririkane gĩkuũ gĩake na igongona rĩrĩa aarutire. Mwaka ũyũ, tarĩki ĩyo ĩraringana na mũthenya wa Njumaa, Ĩpuro 3.

^ kĩb. 32 Gĩcunjĩ kĩngĩ ta gĩkĩ kĩrĩũka thĩinĩ wa ngathĩti ĩno nĩ gĩgataarĩria ũrĩa igongona rĩa ũkũũri rĩa Jesu rĩtũkũũraga kuuma mehia-inĩ na ũrĩa twagĩrĩiruo gwĩka nĩguo tũgunĩke.

^ kĩb. 36 Kũringana na Bibilia, Ngai na Jesu nĩ andũ erĩ ngũrani. Nĩguo wone ũhoro makĩria, thoma gĩcunjĩ gĩa 4 kĩa ibuku Bibilia Ĩrutanaga Atĩa Kũna? rĩrĩa rĩcabĩtwo nĩ Aira a Jehova.

^ kĩb. 38 Thoma Kĩambĩrĩria 3:15.