Macokio ma Ciũria cia Bibilia
Mũthenya wa Cira nĩ kĩĩ?
Mũthenya wa Cira Ũgakorũo ũrĩ wa Gĩkeno Nĩkĩ?
Mahinda-inĩ ma Bibilia, Ngai aahũthagĩra atiirĩrĩri bũrũri (kana acirithania) kũhonokia andũ ake kuumana na wagi wa kĩhooto. (Atiirĩrĩri Bũrũri 2:18) Bibilia ĩtaaragĩria atĩ Mũthenya wa Cira ũgaakorũo ũrĩ ihinda rĩa gĩkeno, rĩrĩa Jehova Mũcirithania mũnene wa thĩ yothe, akaahonokia andũ kuumana na wagi wa kĩhooto.—Thoma Thaburi 96:12, 13; Isaia 26:9.
Ngai nĩ athuurĩte Jesu agaatuanĩra cira na kĩhooto, kũrĩ arĩa me muoyo o hamwe na arĩa akuũ. (Atũmwo 10:42; 17:31) Andũ aingĩ nĩ makuĩte matamenyete Ngai. Mũthenya ũcio wa gũcirithania, Jesu nĩ akamariũkia nĩguo mamenye Ngai ũrĩa wa ma, na hihi mamwende.—Thoma Atũmwo 24:15.
Mũthenya wa Cira ũgakorũo ũrĩ wa mĩaka ngiri ĩmwe nĩkĩ?
Arĩa akuũ makaariũkio ihinda-inĩ rĩu rĩa mĩaka ngiri ĩmwe. (Kũguũrĩrio 20:4, 12) Nĩ makaabatara ihinda rĩa kwĩruta wendi wa Ngai na kũmwathĩkĩra. Mũgarũ na ũrĩa andũ aingĩ moigaga, Bibilia yonanagia atĩ andũ magaacirithio kũringana na ũrĩa mageka thutha wa kũriũkio.—Thoma Aroma 6:7.
Bibilia ningĩ nĩ ĩtaaragĩria mũthenya ũngĩ wa cira ũrĩa ũgoka o rĩmwe andũ materĩgĩrĩire, mĩaka ĩyo ngiri ĩmwe ĩtanambĩrĩria. Mũthenya ũcio nĩguo wĩtagwo ihinda rĩa ithirĩro, o ta ũrĩa warĩrĩirio icunjĩ-inĩ cia mbere cia ngathĩti ĩno. Mũthenya ũcio, Ngai nĩ akaaniina andũ othe arĩa oru na matamwĩtigĩrĩte. (2 Petero 3:7) Kwoguo, nĩ twagĩrĩirũo kwĩrutanĩria kuonania wendo witũ harĩ Ngai.—Thoma 2 Petero 3:9, 13.
