Ndaarereirũo gĩcigo-inĩ kĩarĩ na ũthĩni mũingĩ taũni-inĩ ya Montreal. Baba aakuire ndĩ na mĩeri ĩtandatũ, na nĩ ũndũ ũcio mami agĩtigĩrũo mũrigo wothe wa kũrũmbũiya famĩlĩ iitũ. Twarĩ ciana inyanya na nĩ niĩ ndaarĩ kĩhinga nda.

Ndĩ mũnini-rĩ, nĩ ndambĩrĩirie kũnyua ndawa cia kũrebia, gũũtha kamarĩ, maũndũ ma ũhinya, o na nganyitanĩra na eki naĩ. Ndĩ na mĩaka ikũmi, nĩ ndambĩrĩirie kũrutithania wĩra na ahũri maraya na andũ arĩa maheanaga lũni rũtetĩkĩrĩkĩte kĩĩwatho. Nĩ ndaahenanagia kaingĩ na njĩra o yothe ingĩahotire na ngahũthĩra andũ ũru itekũmaka. Ũndũ ũcio nĩ ta warĩ thakame-inĩ yakwa.

Ngĩkinyia mĩaka 14, nĩ ndaahotete gũthondeka njĩra ingĩ cia wara cia kũheenia andũ. Kwa ngerekano, nĩ ndaagũraga thaa, bangili cia moko na mbete ciarĩ na gacunjĩ kanini mũno ga thahabu, ngacihũũra mũhũri atĩ nĩ cia thahabu, ngacoka ngacienderia andũ barabara-inĩ na nja ya matuka manene kũrĩa ngari irũgamagio. Nĩ ndaakenagĩra mũno gũthũkũma mbeca cia na ihenya. Hĩndĩ ĩmwe, ndaathũkũmire dola 10,000 cia Canada na mũthenya ũmwe.

Ndĩ na mĩaka 15, nĩ ndaingatirwo cukuru ĩrĩa ndaathomagĩra ya gũteithia andũ magĩe na mĩtugo mĩega, na ndiarĩ na kũndũ gwa gũikara. Ndaakomaga nja ya matuka, kũrĩa andũ mahurũkaga, kana mĩciĩ ya arata arĩa maanjĩtĩkagĩria rĩmwe na rĩmwe njikare kwao.

Kaingĩ nĩ ndaahũngagũo mahũri nĩ thigari nĩ ũndũ wa maũndũ marĩa ndeekaga ma kũheenia andũ. No tondũ ndiendagia indo cia kũiya, ndioimire njohetwo. O na kũrĩ ũguo, nĩ ndaahũragũo faĩni nene nĩ ũndũ wa kwenderia andũ indo cia maheeni, gwĩtua andũ angĩ, na kwendia indo itarĩ na marũa. Tondũ gũtirĩ mũndũ ndeetigagĩra, nĩ ndeetagĩria andũ arĩa maheanaga lũni rũtetĩkĩrĩkĩte kĩĩwatho mbeca ciao. Ũcio warĩ ũgwati, na rĩmwe nĩ ndaakuaga mũcinga. Mahinda-inĩ mamwe, ndaarutithanagia wĩra na ikundi cia wĩki-naĩ.

Ndaiguire ũhoro wa Bibilia rĩa mbere ndĩ na mĩaka 17, rĩrĩa mũirĩtu  twaikaraga nake na twarĩ ndũgũ aambĩrĩirie kwĩruta Bibilia na Aira a Jehova. No ndietĩkanirie na morutani ma Bibilia megiĩ mĩtugo, kwoguo ngĩmũtiga na ngĩthiĩ gũikara na mũirĩtu o ũngĩ twarĩ ndũgũ.

Maũndũ maacenjirie rĩrĩa mũirĩtu ũcio o nake aambĩrĩirie kwĩruta Bibilia na Aira a Jehova! Nĩ eekire mogarũrũku mũtũũrĩre-inĩ wake, na nĩ ndaakenirio nĩ ũrĩa aathiaga agĩtuĩkaga mũndũ mũhoreri na mũkirĩrĩria. Aira a Jehova nĩ maanyitire ũgeni gĩthomo-inĩ kĩao thĩinĩ wa Nyũmba ya Ũthamaki, na niĩ ngĩtĩkĩra. Maarĩ andũ eega na atugi. Ũndũ ũcio warĩ ngũrani mũno na ũrĩa ndamenyerete! Ndaiguaga menetwo nĩ famĩlĩ iitũ; ũnyinyi-inĩ wakwa wothe, ndirĩ hĩndĩ ndĩ ndaigua nyendetwo. Wendo ũrĩa Aira a Jehova maanyonirie, nĩ taguo ndeeriragĩria. Rĩrĩa maanjũririe kana no twĩrute Bibilia hamwe-rĩ, ndeetĩkĩrire ngenete.

Kwahoteka maũndũ marĩa ndeerutaga kuuma Bibilia-inĩ, nĩ maahonokirie muoyo wakwa. Twabangaga gũthiĩ kũiya tũrĩ atatũ, nĩguo hote kũrĩha mathirĩ makwa maria moimanĩte na gũũtha kamarĩ–makĩria ma dola 50,000 cia Canada. No nĩ ngenaga mũno tondũ nĩ ndeyeheririe mũbango-inĩ ũcio! Arĩa twabangaga gũthiĩ kũiya nao nĩ maathire na mbere na mũbango ũcio. Ũmwe wao akĩnyitwo, na ũcio ũngĩ akĩũragwo.

O ũrĩa ndaathire na mbere na kwĩruta Bibilia, noguo ndonaga nĩ ndabataraga gwĩka mogarũrũku maingĩ. Kwa ngerekano, nĩ nderutire ũrĩa Bibilia yugĩte thĩinĩ wa 1 Akorintho 6:​10: “Aici, kana andũ a riitho iraya, kana arĩa arĩu, kana arumani, o na kana ahahanyi-rĩ, acio othe gũtirĩ ũkagaya Ũthamaki wa Ngai.” Rĩrĩa ndaathomire mũhari ũcio, no kũrĩra ndaarĩrire nĩ kuona ũritũ wa mehia makwa. Ngĩmenya atĩ nĩ ndĩrabatara gũcenjia mũtũũrĩre wakwa biũ. (Aroma 12:2) Ndaarĩ mũndũ wa mbaara na marakara, na ndaatũũragio nĩ maheeni.

O na kũrĩ ũguo, nĩ nderutire kuuma Bibilia-inĩ atĩ Jehova nĩ mũigua tha na nĩ ohanagĩra. (Isaia 1:​18) Nĩ ndaahoire mũno, ngĩthaitha Jehova andeithie gũtigana na mũtũũrĩre wakwa wa hau kabere. Ndĩ na ũteithio wa Ngai, nĩ ndahotire o kahora kũgarũra mĩtugo yakwa. Ikinya rĩa bata ndoire nĩ kwandĩkithia kĩhiko gitũ na mũirĩtu ũcio.

Ndaarĩ na mĩaka 24 na nĩ ndaahikanĩtie na ngagĩa ciana ithatũ. No mũhaka rĩu ingĩethire wĩra wĩtĩkĩrĩkĩte nĩ watho. Ĩndĩ ndaarĩ na gĩthomo kĩnini na ndiarĩ na maratathi ma kuonania nginya harĩa thomete. O rĩngĩ, ngĩhoya Jehova. Ngĩcoka ngĩthiĩ gwetha wĩra. Ndeeraga andũ arĩa ndoragia wĩra atĩ ndĩrenda kũgarũrĩra mũtũũrĩre wakwa, ndutage wĩra ũtarĩ wa ũtunyani. Rĩmwe na rĩmwe, nĩ ndaamataaragĩria atĩ nĩ ndĩreruta Bibilia, na atĩ nĩ ndĩrerirĩria mũno gũkorũo ndĩ raiya mwega. Ĩndĩ aingĩ nĩ maaregire kũnyandĩka. No hĩndĩ ĩmwe ngĩhoywo ũhoro nĩ mwandĩkani ũmwe, nĩ ndaaheanire ũhoro wakwa wothe wĩgiĩ mũtũũrĩre wakwa wa hau kabere. Mwandĩkani ũcio oigire ũũ: “Ndirĩ na ma nĩ kĩĩ, no nĩ harĩ ũndũ ũranjĩra atĩ nĩ harĩ bata ngũhe wĩra.” Njĩtĩkĩtie atĩ macio maarĩ macokio ma mahoya makwa. Thutha wa ihinda, twĩ na mũtumia wakwa tũkĩbatithio tũgĩtuĩka Aira a Jehova.

Ũmũthĩ ũyũ ndĩ muoyo nĩ ũndũ wa kũrũmĩrĩra motaaro ma Bibilia na gũikara mũtũũrĩre wa Gĩkristiano. Ndĩ na famĩlĩ yakwa njega. Ndĩ na ma atĩ Jehova nĩ aanjoheire, na nĩ ngenagĩra gũkorũo na thamiri theru.

Kwa ihinda rĩa mĩaka 14 mĩhĩtũku, ngoretwo ngĩhũthĩra mathaa 70 o mweri ngĩhunjĩria andũ, ngateithia angĩ merute Bibilia, na ica ikuhĩ mũtumia wakwa nĩ arambĩrĩirie kũhunjia mathaa o ta macio. Ihinda-inĩ rĩa mĩaka 30 mĩhĩtũku, nĩ ngoretwo na gĩkeno gĩa gũteithia andũ 22 harĩ arĩa tũrutithanagia wĩra nao mambĩrĩrie gũthathaiya Jehova. No thiaga matuka-inĩ, no ti gũtunya andũ ta ũrĩa ndeekaga tene. No rĩu ndathiĩ kũu kaingĩ nĩ ndĩmahunjagĩria. Nyendaga kũmahe kĩndũ: mwĩhoko wa gũtũũra thĩinĩ wa thĩ njerũ, ĩrĩa ĩtagaakorũo na atunyani.​—Thaburi 37:​10, 11.