Bibilia nĩ ĩtaarĩirie atĩ mũthuri wa tene wetagwo Ayubu ndaarĩ “na ũcuke na kũrũngĩrĩra aarĩ o mũrũngĩrĩru.” (Ayubu 1:1) Loti nake eetirũo ‘mũndũ mũthingu.’ (2 Petero 2:8) Nake Daudi eerirũo atĩ eekaga “o maũndũ marĩa monagwo magĩrĩire” maitho-inĩ ma Ngai. (1 Athamaki 14:8) O na kũrĩ ũguo, reke tũthuthurie mũtũũrĩre wa o ũmwe wa acio twagweta. Nĩ tũkuona atĩ (1) nĩ maahĩtagia, (2) no twĩrute maũndũ maingĩ kuumana na kĩonereria kĩao, na (3) andũ matarĩ akinyanĩru no mahote gũkenia Ngai kũna.

Ayubu nĩ aagereire moritũ maingĩ marũmanĩrĩire marĩa monekaga ta matarĩ ma kĩhooto. Nĩ ũndũ wa kwaga kũmenya ũrĩa gwathiaga, nĩ eeihũrĩirie atĩ Ngai ndaamakagio kana nĩ atũũrĩtie wĩtĩkio harĩ We kana ca. (Ayubu 9:20-22) Ayubu aarĩ na ũma atĩ we nĩ mũthingu ũũ atĩ o na akĩaria, andũ angĩ maiguaga ta areyona arĩ mũthingu gũkĩra Ngai.—Ayubu 32:1, 2; 35:1, 2.

 Loti nĩ aagire mĩtũkĩ ya gũtua itua rĩonekaga rĩrĩ ihũthũ na rĩa ĩmwe kwa ĩmwe. Nĩ aatangĩkaga mũno nĩ kuona ciĩko njũru mũno cia ũra thoni, cia andũ arĩa maatũũraga Sodomu na Gomora, o na “ngoro yake thingu nĩyaiguithagio ruo” nĩ mĩtugo yao. (2 Petero 2:8) Ngai nĩ aanĩrĩire atĩ nĩ ekũniina matũũra macio maarĩ na waganu mũingĩ, na akĩhe Loti na famĩlĩ yake kamweke ga kũhonokio. Wahota gwĩciria atĩ Loti nĩwe ũngĩarĩ wa mbere kuuma kũndũ kũu. No ihinda-inĩ rĩrĩ rĩa bata mũno, nĩ kũgonderera aagondagĩrĩra. Araika arĩa maatũmirũo mamũhonokie matiarĩ na ũndũ ũngĩ tiga kũmanyita moko marĩ na famĩlĩ yake makĩmaruta nja ya itũũra rĩu.—Kĩambĩrĩria 19:15, 16.

Daudi nake hĩndĩ ĩmwe nĩ aagire kwĩgirĩrĩria na agĩtharia na mũtumia wene. Ũndũ wa kũmakania-rĩ, akĩgeria kũhitha ũndũ ũcio, Daudi nĩ aabangire ũrĩa mũthuri wa mũtumia ũcio ekũragwo. (2 Samueli mũrango wa 11) Bibilia yugaga atĩ ũndũ ũrĩa Daudi ekire “nĩwarakaririe Jehova.”—2 Samueli 11:27.

Ayubu, Loti, na Daudi, othe nĩ maahĩtirie, na mahĩtia mamwe maarĩ maritũ mũno. No o ta ũrĩa tũkuona, maarĩ na wendi mũnene wa gwathĩkĩra Ngai na ngoro yao yothe. Nĩ meeharĩirie kuonania atĩ nĩ maherete na nĩ metĩkagĩra kũgarũrĩra mĩthiĩre yao ũndũ-inĩ o wothe kũngĩabataranirie. Nĩ ũndũ ũcio, Ngai nĩ aametĩkĩrire, na mbica ĩrĩa Bibilia ĩrutaga ĩmegiĩ nĩ atĩ maarĩ athuri ehokeku.

Nĩ ũndũ wa kwaga gũkinyanĩra, tũtingĩĩthema biũ gwĩka mahĩtia. (Aroma 3:23) No rĩrĩa twahĩtia, nĩ twagĩrĩirũo kuonania atĩ nĩ tũherete, na ningĩ twĩrutanĩrie kũgarũrĩra.

Hihi Ayubu, Loti, na Daudi meekire atĩa nĩguo marũnge mahĩtia mao? Ngoro-inĩ yake, Ayubu aarĩ  mũndũ mũrũngĩrĩru. Thutha wa Ngai kũmũteithia, Ayubu nĩ aarũngire mwĩcirĩrie wake ũrĩa warĩ na mahĩtia na akĩĩrira nĩ ũndũ wa maũndũ marĩa oigĩte. (Ayubu 42:6) Mawoni ma Loti megiĩ mĩtugo ya ũra thoni ya andũ a Sodomu na Gomora nĩ maringanĩte biũ na ithimi cia Ngai. Thĩna wake warĩ o kwaga mĩtũkĩ ihinda-inĩ rĩu. Thutha-inĩ biũ nĩ eehereire matũũra macio maatuĩrĩirũo kũniinwo, na akĩhonoka kũniinanĩrio hamwe namo. Nĩ ũndũ wa gwathĩka, o na ndehũgũrire kuona indo iria aatigire na thutha. O na gũtuĩka Daudi nĩ eekire rĩhia iritũ mũno nĩ kuuna watho wa Ngai, nĩ onanirie kĩrĩa kĩarĩ ngoro-inĩ yake kũgerera kũhera, na kũhoya Ngai amũiguĩre tha.—Thaburi 51.

Gwĩtĩkĩrĩka gwa athuri acio harĩ Ngai nĩ kũringaine na ũndũ ũrĩa erĩgagĩrĩra kuuma kũrĩ andũ matarĩ akinyanĩru. Ngai “nĩoĩ ũũmbe ũrĩa twombirũo; nĩaririkanaga atĩ ithuĩ tũrĩ o rũkũngũ.” (Thaburi 103:14) Kwogwo angĩkorũo Ngai nĩ oĩ atĩ tũtingĩhota gwĩthema mahĩtia biũ-rĩ, hihi erĩgagĩrĩra ũndũ ũrĩkũ kuuma kũrĩ ithuĩ?

Ũtaaro wa Daudi harĩ mũrũwe Suleimani nĩ ũtũteithagia kũmenya ũrĩa tũngĩkenia Ngai. “Wee Suleimani, mũrũ wakwa, tũũra ũmenyete Ngai wa thoguo, na ũmũtungatagĩre na ngoro yaku yothe.” (1 Maũndũ ma Matukũ ma Tene 28:9) Hihi gũtungatĩra Ngai na ngoro yothe nĩ kuuga atĩa? Gũtungatĩra Ngai na ngoro yothe nĩ gũkorũo na ngoro yendete Ngai na ĩgatua itua rĩa kũmwathĩkĩra na gwĩka wendi wake. Ti ngoro nginyanĩru, no nĩ ĩrĩa ĩriragĩria gũtungatĩra Ngai na wathĩki mũingĩ na nĩ ĩtĩkagĩra kũrũngwo. Nĩ ũndũ wa wendo wao harĩ Ngai, na wendi wa gwathĩka, Ngai onire Ayubu atarĩ na “ũcuke,” Loti arĩ “mũthingu,” na Daudi ‘eekaga o maũndũ marĩa monagwo magĩrĩire’ maitho-inĩ ma Ngai. O na gũtuĩka nĩ maahĩtagia, nĩ maahotire gũkenia Ngai.

Kwogwo tũngĩgĩa na meciria moru, kana tuuge ũndũ ũngĩtũma tũconoke, kana twĩke maũndũ mangĩtũma twĩrire thutha-inĩ, ngerekano icio twarĩrĩria no itũhe ũmĩrĩru. Ngai nĩ oĩ atĩ ihinda-inĩ rĩrĩ tũtirĩ akinyanĩru. O na kũrĩ ũguo, nĩ erĩgagĩrĩra tũmwende, na twĩrutanĩrie kũmwathĩkĩra. Tũngĩka ũguo na ngoro iitũ yothe, no tũkorũo na ma atĩ o na ithuĩ no tũkenie Ngai.