Ndaarereirũo taũni-inĩ ya Alicante, gĩcũa-inĩ kĩa mwena wa irathĩro wa Sipania. Famĩlĩ itũ nĩ yaharaganĩte biũ na kwoguo mahinda marĩa maingĩ ndĩ mũndũ mwĩthĩ ndiatindaga mũciĩ. Hakuhĩ na kũrĩa ndaikaraga haarĩ na handũ haathingagĩrũo magũrũ ma ngaari. Nĩ twatumire ũrata na mũndũ ũmwe waandĩkĩtwo ho wetagwo José María. Aarĩ mũndũ ũrĩ wendo na nĩ aanũmbũyagia mũno, ũndũ ũrĩa itonagio thĩinĩ wa famĩlĩ itũ. Ndĩ na thĩna aakoragwo arĩ ta mũrũ wa maitũ, kana mũrata wa ma, o na gũtuĩka aarĩ mũkũrũ kũngĩra na mĩaka 20.

Hĩndĩ ĩyo José María nĩ aambĩrĩirie kwĩruta Bibilia na Aira a Jehova. Nĩ ndonaga atĩ nĩ eendete Maandĩko, na nĩ aahunjagĩria ũhoro wa ma cia Bibilia kaingĩ. Ndaamũthikagĩrĩria na gĩtĩo, no ndioyaga na ũritũ maũndũ marĩa oigaga. Ngoro yakwa ndĩ mũndũ mwĩthĩ yaiyũirũo nĩ maũndũ mangĩ. No ũndũ ũcio warĩ hakuhĩ kũgarũrũka.

Ndiendete kwaria mũno ũhoro wa aksidenti ĩyo ya barabara. Ũrĩa nguuga nĩ atĩ nĩ ndaagire kũhũthĩra ũũgĩ na ngĩaga kwĩmenyerera. Ũtũũro wakwa wagarũrũkire biũ na mũthenya ũmwe. Ndaarĩ mwanake ũrĩ hinya mũingĩ, no o rĩmwe ciĩga ciakwa hakuhĩ ciothe igĩkua na ngĩĩkora ngomete thibitarĩ. Ũndũ ũrĩa warĩ mũritũ mũno nĩ kwĩĩtĩkĩra ũguo ndatariĩ. Ndaikaraga ngĩĩyũragia ũũ: ‘Harĩ bata wa gũthiĩ na mbere gũtũũra?’

José María nĩ ookire kũnyona thibitarĩ na akĩbanga Aira a Jehova kuuma kĩũngano kĩrĩa kĩarĩ hakuhĩ moke maanjerere. Nĩ ndahutirio ngoro mũno nĩ ũndũ wa gũceererũo maita maingĩ. Rĩrĩa mwĩrĩ wakwa waagagĩrire nĩ ndambĩrĩirie kwĩruta Bibilia. Nĩ ndaamenyire kĩrĩa gĩtũmaga andũ manyamarĩke na makue na kĩrĩa gĩtũmaga Ngai etĩkĩrie maũndũ moru mekĩke. Ningĩ nĩ nderutire ũhoro wa ciĩranĩro cia Ngai cia mahinda mokĩte rĩrĩa thĩ ĩkaiyũrũo nĩ andũ akinyanĩru gũtarĩ mũndũ ũkuuga: “Ndĩ mũrũaru.” (Isaia 33:24) Riita rĩa mbere ũtũũro-inĩ wakwa, ngĩambĩrĩria kũgĩa na kĩĩrĩgĩrĩro kĩa magegania.

Rĩrĩa ndoimire thibitarĩ, nĩ ndaathire na mbere kwĩruta Bibilia ndĩ na kĩyo makĩria. Ngĩhũthĩra gakaari ga gũtindĩkwo, rĩmwe nĩ ndaathiaga gĩthomo kĩa Aira a Jehova na nganyitanĩra harĩ wĩra wao wa kũhunjia. Kũrĩ Novemba 5, 1988, nĩ ndaabatithirio na njĩra ya kũrindwo maĩ-inĩ ndĩ na mĩaka 20. Jehova Ngai nĩ andeithĩtie kũgĩa na mawoni marĩa magĩrĩire megiĩ ũtũũro. No hihi ingĩekire atĩa nĩguo nyonanie ngatho ciakwa?

Nĩ ndatuĩte atĩ ndingĩarekire wonje wakwa ũtũme ndige kwĩrutanĩria o ũrĩa wothe ingĩahotire ũtungata-inĩ wa Jehova. Nĩ ndendaga gũthiĩ na mbere. (1 Timotheo 4:15) Ũndũ ũcio ndwarĩ mũhũthũ tondũ andũ a famĩlĩ itũ matiakenagio nĩ wĩtĩkio ũcio ndagĩte naguo. No nĩ ndaarĩ na aarĩ na ariũ a Ithe witũ a kĩĩroho. Maatigagĩrĩra atĩ hingo ciothe nĩ ndathiĩ gĩthomo na ndanyitanĩra harĩ wĩra wa kũhunjia.

No o ũrĩa mahinda maathiaga, ngĩona atĩ nĩ ndabataraga kũrũmbũiyo na njĩra ya mwanya mathaa mothe. Thutha wa gũcaria kwa ihinda iraihu, nĩ ndonire kũndũ kwega andũ marĩ na wonje maarũmbũyagio taũni-inĩ ya Valencia, kilomita 160 mwena wa rũgũrũ wa Alicante. Kũu nĩkuo gwatuĩkire mũciĩ.

O na gũtuĩka ndihotaga kwĩyumia ũrĩrĩ, nĩ nduĩte itua rĩa gũthiĩ na mbere gũtungatĩra Jehova. Nĩ ndaahũthĩrire tũbeca tũrĩa tũheagwo andũ marĩ na wonje na tũngĩ ndeigĩire, kũgũra kompiuta na ĩkĩigwo hakuhĩ na ũrĩrĩ wakwa. Ningĩ nĩ ndagũrire thimũ. Hĩndĩ ciothe rũcinĩ, ũrĩa ũnũmbũyagia nĩ anjakagĩria kompiuta na thimũ. Nĩguo hote kũhũthĩra kompiuta, hũthagĩra kamacini ndwarithagia na kĩreru. Ningĩ nĩ ngoragwo na kamũtĩ nyitaga na kanua karĩa kandeithagia kwandĩka maũndũ kompiuta-inĩ na kũhihinya namba thimũ-inĩ.

Tekinolonjĩ ĩno ĩndeithĩtie atĩa? Nĩ ĩhotithagia kũingĩra thĩinĩ wa Website ya jw.org na ningĩ Ũthuthuria INTANETI-INĨ. Indo icio ikoretwo irĩ ũteithio mũnene mũno harĩ niĩ. Kaingĩ nĩ hũthagĩra mathaa maingĩ o mũthenya gũthuthuria mabuku mehocetie harĩ Bibilia nĩguo thiĩ na mbere kwĩruta ũhoro wa Ngai na ngumo ciake cia magegania. Na rĩrĩa ndaigua ihooru kana nguĩte ngoro, ndiagaga kĩndũ gĩa kũnjĩkĩra ngoro thĩinĩ wa Website ĩyo.

Ningĩ kompiuta yakwa nĩ ĩhotithagia gũthikĩrĩria na kũnyitanĩra gĩthomo-inĩ kĩa Aira a Jehova. Nĩ njokagia ciũria, ngahoithia, ngaruta mĩario, na ngathoma ngathĩti ya Mũrangĩri rĩrĩa ndagaĩrũo gwĩka ũguo. O na gũtuĩka ndihotaga gũthiĩ Nyũmba ya Ũthamaki, nĩ njiguaga ndĩ o wa kĩũngano gitũ.

Ningĩ thimũ na kompiuta nĩ ihotithagia kũnyitanĩra biũ harĩ wĩra wa kũhunjia. Nĩ ma, ndingĩhota gũthiĩ nyũmba kwa nyũmba ta ũrĩa Aira a Jehova aingĩ mekaga, no ti kuuga ndingĩhunjia. Kũgererera indo icio nĩ hotaga kwĩra andũ arĩa angĩ ũhoro wa wĩtĩkio wakwa. Nĩ ngenagĩra mũno kũhunjia na thimũ nginya athuri a kĩũngano gitũ makanjĩĩhokera kũrũgamĩrĩra wĩra ũcio. Wĩra ũcio wa kũhunjia na thimũ nĩ ũteithĩtie mũno makĩria Aira a Jehova arĩa matahotaga kuuma kwao mĩciĩ.

No ũtũũro wakwa nĩ ũkoragwo na maũndũ mangĩ tiga macio ma tekinolonjĩ. O mũthenya nĩ njeeragĩrũo  nĩ arata. Arata acio mokaga na andũ a famĩlĩ ciao na arata ao arĩa makoragwo na wendi wa kwĩruta Bibilia. Kaingĩ manjĩraga nyambĩrĩrie ndeereti cia Bibilia hamwe nao. Ningĩ rĩmwe na rĩmwe nĩ njeeragĩrũo nĩ famĩlĩ na nganyitanĩra nao harĩ ũthathaiya wao wa famĩlĩ. Makĩria nĩ ngenaga mũno rĩrĩa twana twaikara thĩ hakuhĩ na niĩ ũrĩrĩ-inĩ tũkĩnjĩra itũmi ciatuo cia kwenda Jehova.

Nĩ ngenaga mũno nĩ gũceererũo nĩ andũ aingĩ. Rumu yakwa ĩkoragwo ĩiyũire arata a kũraya na a gũkuhĩ. O na arĩa manũmbũyagia nĩ magegagio nĩ wendo ũcio andũ manyonagia. O mũthenya nĩ njokagĩria Jehova ngatho nĩ ũndũ wa kũnjĩtĩkĩria ngorũo ndĩ ũmwe wa Aira a Jehova arĩa makoragwo na ũrũmwe mũnene.

Hĩndĩ ciothe mũndũ angĩngeithia na anjũrie ũrĩa ndĩrathiĩ na mbere, ndĩmwĩraga, “Ndĩ o ho, na no ndĩrarũa!” Nĩ menyaga atĩ to niĩ nyiki ndĩrarũa na thĩna ta ũyũ. O ũrĩa maũndũ maitũ mangĩkorũo matariĩ, o na kana moritũ marĩa tũracemania namo, Akristiano othe makoragwo mbaara-inĩ, “mbaara ĩrĩa njega ya kũrũĩrĩra maũndũ marĩa metĩkĩtio.” (1 Timotheo 6:12) Nĩ kĩĩ kĩndeithĩtie gũthiĩ na mbere kũrũa kwa ihinda rĩa mĩaka mĩingĩ ũguo? Hoyaga Jehova o mũthenya na ngamũcokeria ngatho nĩ ũndũ wa gũtũma ũtũũro wakwa ũgĩe na muoroto. Ningĩ nĩ ndĩĩrutanagĩria mũno gũikara ndĩ na kĩyo ũtungata-inĩ wa Ngai, o njũthĩrĩirie kĩĩrĩgĩrĩro kĩrĩa kĩrĩ mbere.

Kaingĩ nĩ ndĩciragia ũhoro wa thĩ njerũ na ũrĩa ngaiguaga ngĩteng’era na ngarũgarũga rĩngĩ. Rĩmwe na rĩmwe tũrĩ na mũrata wakwa José María, ũrĩa ũkoragwo na mũrimũ wa polio, nĩ tũthekaga tũkĩrana ũrĩa tũgaateng’era marathoni. Na niĩ ngamũũria, “Nũ ũgaacinda ũrĩa ũngĩ?” Nake akanjĩra, “Gũtiramakania nũ ũgaacinda. Ũndũ ũrĩa wa bata nĩ gũgaakorũo thĩinĩ wa thĩ njerũ tũteng’ere ihenya rĩu.”

Ndũkoretwo ũrĩ ũndũ mũhũthũ kwĩĩtĩkĩra ũguo ndariĩ. Nĩ menyaga atĩ hĩndĩ ĩrĩa ndaarĩ tinĩnja nĩ ndeekire ũndũ wa ũrimũ, na nĩ ũtũmĩte ngorũo na ihinda iritũ mũno. No nĩ njokagia ngatho mũno tondũ Jehova ndaandiganĩirie. Aaheete maũndũ maingĩ mũno—famĩlĩ nene ya kĩĩroho, wendi wa gũtũũra, gĩkeno gĩa gũteithia andũ angĩ, na kĩĩrĩgĩrĩro kĩa magegania kĩa mahinda mokĩte. Ingiuga na ciugo nini ũrĩa njiguaga, ngwĩciria ingiuga atĩ hatarĩ nganja Jehova nĩ aheete makĩria ma kĩrĩa njagĩrĩirũo.