KUUMA NGOTHI-INĨ | HIHI MAHOYA NĨ MATŨGUNAGA?
Hihi nĩ Kũrĩ Ũrĩa Ũthikagĩrĩria?
Andũ amwe monaga atĩ kũhoya no gũteanga mahinda, atĩ gũtikoragwo na wa kũmathikĩrĩria. Angĩ nao manageria kũhoya no makona ta mataracokerio. Mũndũ ũmwe wĩtĩkĩtie atĩ gũtirĩ Ngai eecirĩirie ũrĩa Ngai angĩkorũo atariĩ agĩcoka akĩhoya ũũ: “Heherera o kaũndũ kanini tu.” No oigire atĩ Ngai aaikarire “amũkirĩire ki.”
No Bibilia nĩ ĩtũheaga ũũma atĩ nĩ kũrĩ Ngai na nĩ aiguaga mahoya. Bibilia nĩ ĩkoragwo na ciugo ici iria cierirũo andũ tene: Ngai “aaigua mũgambo waku ũkĩmũkaĩra-rĩ, ndarĩ hingo atagakũiguĩra tha, na rĩrĩa akaũigua, no gũcokia agagũcokeria ũhoro.” (Isaia 30:19) Mũhari ũngĩ wa Bibilia ugaga ũũ: “Mahoya ma andũ arĩa arũngĩrĩru nĩ gũkena amakenagĩra.”
Jesu nĩ aahoire kũrĩ Ithe, na “agĩkĩiguwo.”
Bibilia ningĩ nĩ ĩgwetaga andũ mahoya mao maaiguirũo. Mũhari ũmwe ugaga atĩ Jesu nĩ ‘aathaithire Ngai, o we ũngĩhota kũmũhonokia’ na atĩ nĩ ‘aaiguirũo.’ (Ahibirania 5:7) Ngerekano ingĩ irĩ thĩinĩ wa Danieli 9:21 na 2 Maũndũ ma Matukũ ma Tene 7:1.
Gũkĩrĩ ũguo-rĩ, nĩ kĩĩ gĩtũmaga andũ amwe mone ta mahoya mao mataracokio? Nĩguo mahoya maitũ macokio, no mũhaka tũhoe kũrĩ Jehova, * Ngai ũrĩa ũgwetetwo Bibilia-inĩ, no ti kũrĩ ngai ũngĩ, kana maaguka maitũ ma tene. Ningĩ Ngai endaga tũhoe maũndũ marĩa mamũkenagia na tũhoe na njĩra yaganĩrĩire “na kwenda gwake.” Tũngĩhoya na njĩra ĩyo, Ngai atũheaga ũũma atĩ “nĩatũiguaga.” (1 Johana 5:14) Kwoguo, nĩguo mahoya maitũ maiguagwo, nĩ tũrabatara kũmenya Ngai ũrĩa ũgwetetwo Bibilia-inĩ na twĩrute wendi wake.
Andũ aingĩ metĩkĩtie atĩ mahoya to ũndũ wa ndini wĩkagwo ta mũtugo, no atĩ Ngai nĩ athikagĩrĩria mahoya na agacokia. Isaac kuuma Kenya oigire ũũ: “Ndaahoire ũteithio wa gũtaũkĩrũo nĩ Bibilia. Kahinda kanini thutha ũcio, mũndũ ũmwe agĩũka na akĩĩrutĩra kũhe ũteithio ũrĩa ndaabataraga.” Hilda kuuma Philippines, nĩ eendaga gũtiga kũnyua thigara. Thutha wa kũgeria maita maingĩ akĩremagwo, mũthuri wake akĩmwĩra, “Kaĩ ũtangĩhoya Ngai akũhe ũteithio?” Nĩ aahũthĩrire ũtaaro ũcio, na oigire ũũ: “Nĩ ndagegirio mũno nĩ ũrĩa Ngai aandeithirie. Nĩ ta ndambĩrĩirie kũigua itekwenda kũnyua thigara. Ngĩhota gũtiga.”
Na githĩ to kũhoteke atĩ Ngai nĩ endaga gũgũteithia maũndũ-inĩ maku marĩa maringaine na wendi wake?
^ kĩb. 6 Jehova nĩrĩo rĩĩtwa rĩa Ngai ta ũrĩa rĩguũrĩtio thĩinĩ wa Bibilia.
