KUUMA NGOTHI-INĨ | ŨRĨA GŨTHOMA BIBILIA KŨNGĨKŨGUNA
Maũndũ Marĩa Mangĩtũma ũkenere gũthoma Bibilia
Hihi ũgũthoma Bibilia na njĩra ĩhaana atĩa? Ĩragũkenia kana ĩtaragũkenia? Gũkũringana na maũndũ marĩa ũgwĩka ũkĩenda gũthoma. Ta reke tuone nĩ atĩa ũngĩka nĩguo ũkenere gũthoma Bibilia o na makĩria.
Thuura Bibilia ya kwĩhokeka na ĩrĩ na rũthiomi rwa kĩĩrĩu. Ũngĩthoma kĩndũ kĩrĩ na ciugo nyingĩ nditũ kana hĩtũke nĩ mahinda na ndũĩ ũrĩa ciugĩte, no gĩkũnogie. Kwoguo, etha Bibilia ĩrĩ na rũthiomi rũhũthũ ũngĩhota gũtaũkĩrũo nĩruo. O na kũrĩ ũguo, nĩ yagĩrĩirũo gũkorũo ĩtaũrĩtwo ũrĩa kwagĩrĩire. *
Hũthĩra tekinolonjĩ. Ũmũthĩ Bibilia ĩrĩ kuo nginya intaneti-inĩ. Bibilia imwe no ũcithomere intaneti-inĩ kana o na ũcirute wĩkĩre thĩinĩ wa kompiuta, tablet, kana thimũ. Bibilia imwe nĩ ikoragwo na indo ingĩgũteithia kuona na ihenya mĩhari ĩngĩ ya Bibilia ĩrarĩrĩria ũndũ ũrĩa ũrathoma kana o na kũringithania Bibilia itiganĩte. Angĩkorũo wendete gũthikĩrĩria handũ ha gũthoma, no wone Bibilia ya gũthikĩrĩria na thiomi itiganĩte. Andũ aingĩ nĩ mendete gũthikĩrĩria Bibilia magĩthiĩ na ngari cia mũingĩ, makĩhũũra nguo, kana magĩka ũndũ ũngĩ ũtangĩgiria mathikĩrĩrie. Na githĩ to ũgerie njĩra ĩrĩa ũrona ĩkwagĩrĩire?
Hũthĩra indo cia gũgũteithia kwĩruta Bibilia. Ũngĩhũthĩra indo cia gũgũteithia kwĩruta Bibilia no wone maũndũ maingĩ megiĩ ũndũ ũrĩa ũrathoma. Nĩ gũkoragwo na mabu cia mabũrũri ma tene iria ingĩgũteithia kũhũũra mbica na kũmenya ũhoro wa kũndũ kũrĩa kũgwetetwo harĩa ũrathoma. Icunjĩ imwe ta iria irĩ ngathĩti-inĩ ĩno kana iria irĩ gĩcunjĩ-inĩ kĩa “Morutani ma Bibilia” thĩinĩ wa website ya jw.org/ki, no igũteithie gũtaũkĩrũo nĩ maũndũ maingĩ marĩa marĩ Bibilia-inĩ.
Hũthĩra njĩra itiganĩte. Angĩkorũo nĩ wonaga ũrĩ ũndũ mũritũ gũthoma Bibilia ũrutĩtie kĩambĩrĩria nginya rĩrĩa ũkarĩkia, na githĩ to wambĩrĩrie na gũthoma gĩcunjĩ kĩrĩa wendete mũno nĩguo ũkenere makĩria? Angĩkorũo ũrenda kũmenya ũhoro wa andũ arĩa marĩ igweta thĩinĩ wa Bibilia, no ũthuurage mũndũ ũmwe ũgathoma ũhoro wake. Ũndũ ũmwe ũngĩka nĩ wonanĩtio thĩinĩ wa ithandũkũ rĩrĩ na kĩongo “Rikĩra Thĩinĩ wa Bibilia na Njĩra ya Kũmenya Andũ Arĩa Ĩgwetete.” O na kana rĩngĩ no wende gũthoma icunjĩ cia Bibilia iria iraarĩrĩria ũndũ mũna kana ũthome kũringana na ũrĩa maũndũ meekĩkire marũmanĩrĩire. Na githĩ to ũgerie njĩra ĩmwe harĩ icio twarĩrĩria?
^ kĩb. 4 Andũ aingĩ nĩ monete atĩ Bibilia ya New World Translation of the Holy Scriptures nĩ ndaũre ũrĩa kwagĩrĩire, nĩ ya kwĩhokeka, na mũndũ nĩ ataũkagĩrũo nĩyo wega. Bibilia ĩyo ĩcabĩtwo nĩ Aira a Jehova, na yonekaga na thiomi makĩria ma 130. No ũrute kobĩ ya Gĩthũngũ thĩinĩ wa website ya jw.org kana o na ũrute programu ya JW Library. Ningĩ angĩkorũo no wende, Aira a Jehova no makũrehere Bibilia gwaku mũciĩ.
Icunjĩ Ingĩ Hihi Ũngĩenda Gũthoma
CIŨRIA IRIA CIŨRAGIO KAINGĨ
Hihi Bibilia ya New World Translation nĩ ya Kwĩhokeka?
Nĩ kĩĩ gĩtũmaga Bibilia ya New World Translation ĩkorũo ĩrĩ ngũrani na Bibilia icio ingĩ?
