Mbarathi inya ithiĩte ihenya no mahũngũ maraiguĩka magĩkubia! Mbarathi icio inya irĩ hinya iria ciarĩrĩirio Bibilia-inĩ, hamwe na arĩa maracitwarithia, itũmaga mũndũ ahũũre mbica meciria-inĩ akona ta araciona na maitho. Mbarathi ya mbere ĩrĩ na rangi mwerũ na ũrĩa ũramĩtwarithia nĩ mũthamaki ũrĩ na riri ũheetwo thũmbĩ ya ũthamaki. Arũmĩrĩirũo nĩ mbarathi ya rangi mũtune ĩkuuĩte mũndũ weheragia thayũ thĩinĩ wa thĩ. Hagacoka hakarũmĩrĩra mbarathi ya gatatũ, njirũ, na ũrĩa ũramĩtwarithia anyitĩte ratiri, kuonania ũnyihu wa irio. Mbarathi ya kana ĩrĩ na rangi mũtheũku na ĩroneka ĩrĩ ndwaru, ĩkĩonania mĩrimũ na maũndũ mangĩ marĩa marehaga gĩkuũ, na ĩratwarithio nĩ Gĩkuũ. Mbarathi ĩyo ĩrũmĩrĩirũo nĩ Mbĩrĩra, na ĩragetha mĩoyo ya andũ aingĩ.—Kũguũrĩrio 6:1-8.

“Nĩ ndaiguire guoya mũno rita rĩakwa rĩa mbere gũthoma ũhoro wĩgiĩ atwarithia acio ana a mbarathi. Ndonaga Mũthenya wa Cira nĩ ũroka, na ngona atĩ tondũ ndiehaarĩirie ndikũhonoka.”—Crystal.

“Nĩ ndagegirio nĩ atwarithia acio ana a mwanya a mbarathi, arĩa marĩ na mbarathi cia marangi matiganĩte. Rĩrĩa ndamenyire kĩrĩa kĩoneki kĩu kĩrũgamĩrĩire, nĩ ndataũkĩirũo nĩ ũhoro ũcio.”—Ed.

Hihi ũiguaga ta ũrĩa Crystal aaiguaga igũrũ rĩgiĩ mbarathi icio inya cia ibuku rĩa Kũguũrĩrio? Kana ũiguaga ta Ed? O ũrĩa kũngĩkorũo kũrĩ, gũtwarithio kwa mbarathi icio kũrehaga mbica ĩmwe yũĩkaine wega mũno ibuku-inĩ rĩa mũico rĩa Bibilia rĩa Kũguũrĩrio. Hihi nĩ ũĩ atĩ no ũgunĩke ũngĩtaũkĩrũo nĩ kĩoneki kĩu? Na njĩra ĩrĩkũ? Ngai eranĩire atĩ no wone gĩkeno kĩa ma ũngĩthoma maũndũ macio mandĩkĩtwo ibuku-inĩ rĩu rĩa ũrathi, wĩrute kuumana namo, na ũikare kũringana namo.—Kũguũrĩrio 1:1-3.

O na gũtuĩka andũ amwe nĩ mamakagio nĩ kĩoneki kĩa atwarithia acio ana a mbarathi, muoroto wa kĩoneki kĩu ti gũkũiguithia guoya. Andũ milioni nyingĩ nĩ monete atĩ kĩoneki kĩu nĩ gĩkĩraga hinya wĩtĩkio wao, na nginya gĩkamahe kĩĩrĩgĩrĩro kĩega kĩa ihinda rĩũkĩte. O nawe no gĩgũteithie na njĩra o ta ĩyo. Thiĩ na mbere gũthoma wone!