Kũndũ gũtiganĩte thĩinĩ wa thĩ, andũ nĩ marahiũrania na ũrugarĩ ũkĩrĩtie njano na icanjama ingĩ iria iraumana na mogarũrũku manene ma rĩera. Ta wĩcirie ũhoro wa mohoro maya marũmĩrĩire:

•   “Mweri ũcio wa Juni, nĩguo ũrarĩ na ũrugarĩ mũingĩ mũno, kuuma rĩrĩa andũ maambĩrĩirie kũrora ndingirii cia ũrugarĩ thĩinĩ wa thĩ mĩaka 174 mĩthiru.”—National Oceanic and Atmospheric Administration, U.S. Department of Commerce, Julaĩ 13, 2023.

•   “Mabũrũri ma Italy, Spain, Faranja, Njĩrĩmani, na Poland, nĩ magũmĩirũo nĩ ũrugarĩ ũkĩrĩtie njano na kũrerĩgĩrĩrũo atĩ ũrugarĩ ũcio no wambate nginya ũkinyie ndingirii 48 icigĩrĩra-inĩ cia Sicily na Sardinia. No kũhoteke icio nĩcio ndingirii cia igũrũ mũno iria ũrugarĩ wanakinyia thĩinĩ wa Europe.”—European Space Agency, Julaĩ 13, 2023.

•   “O ũrĩa ũrugarĩ ũrathiĩ wongererekete thĩinĩ wa thĩ, no twĩrĩgĩrĩre atĩ noguo mbura ĩgũthiĩ ĩnenehete na yurage kaingĩ, na ũndũ ũcio ũtũme kũgĩe na mĩiyũro mĩingĩ.”—Stefan Uhlenbrook, mũrũgamĩrĩri wa maũndũ megiĩ maĩ na mbarabu thĩinĩ wa Kĩama kĩa Maũndũ ma Rĩera Thĩinĩ wa Thĩ (World Meteorological Organization) Julaĩ 17, 2023.

 Hihi kuongerereka kwa mohoro ta macio megiĩ mogarũrũku manene ma rĩera nĩ kũratũma ũtangĩke? Reke tuone ũrĩa Bibilia yugaga igũrũ rĩgiĩ ũndũ ũcio wa bata.

 Ĩĩ. Kuongerereka kwa ũrugarĩ thĩinĩ wa thĩ na maũndũ mangĩ moimanĩte na mogarũrũku manene ma rĩera, nĩ kũratwarana na maũndũ marĩa Bibilia yarathĩte mangĩgekĩka mahinda-inĩ maya maitũ. Kwa ngerekano, Jesu nĩ aarathĩte atĩ nĩ tũngĩkona “maũndũ ma kũmakania,” kana “imakania cia gũtua andũ nda.” (Luka 21:11; The Bible in Gikũyũ) Kuongerereka kwa ũrugarĩ thĩinĩ wa thĩ nĩ gũtũmĩte andũ aingĩ mone ta andũ marĩthũkia thĩ ĩreme gũikarĩka.

 Aca. Ngai oombĩte thĩ ĩtuĩke mũciĩ wa gũtũũra wa andũ, na ndangĩtĩkĩria andũ mamĩniine. (Thaburi 115:16; Kohelethu 1:4) O na eranĩire atĩ nĩ agooka “kwananga arĩa manangaga thĩ.”—Kũguũrĩrio 11:18.

 Bibilia yonanagia atĩ Ngai no ahote kũgitĩra thĩ ndĩkaniinwo, na nĩ arĩka ũguo.

•   “[Ngai ahooragĩria] kĩhuhũkanio . . . makũmbĩ ma iria magakira.” (Thaburi 107:29) Ngai arĩ na hinya wa kũhooreria mahinya ma ndũire. Arĩ na ũhoti wa kũrehe kĩhonia kĩa mathĩna marĩa andũ macemanagia namo nĩ ũndũ wa mogarũrũku manene ma rĩera.

•   “Wee nĩ ũrũmbũyagia thĩ, ũgatũma ĩciare mũno na ĩkorũo ĩrĩ noru.” (Thaburi 65:9) Ngai nĩ akaarathima thĩ ĩtuĩke paradiso.

 Nĩguo wĩrute makĩria ũhoro wĩgiĩ kĩĩranĩro kĩrĩa Bibilia ĩranĩire gĩa thĩ njega, thoma gĩcunjĩ kĩrĩ na kĩongo “Nũũ Ũkaahonokia Thĩ?”