Kĩgomano kĩrĩa gĩekagwo gĩa COP27 kĩa Ũrũmwe wa Mabũrũri kĩgiĩ Ũgarũrũku wa Rĩera gĩathirire mũthenya wa Kiumia, Novemba 20, 2022. O na gũtuĩka nĩ kwaiguithanĩirio atĩ mabũrũri marĩa mathĩni mateithĩrĩrio na mbeca cia kũhiũrania na moimĩrĩro moru ma ũgarũrũku wa rĩera, andũ aingĩ nĩ maretĩkĩra atĩ ũndũ ũcio ndũkũniina thĩna ũrĩa ũrĩ kuo wa ũgarũrũku wa rĩera.

•   Kũrĩ Novemba 19, 2022, Mũtongoria ũmwe wa Ũrũmwe wa Mabũrũri wĩtagwo António Guterres aaugire ũũ: “Nĩ ndĩranyita mbaru itua rĩa kũhe mabũrũri marĩa mathĩni mbeca cia kũhiũrania na mathĩna marĩa moimanaga na ũgarũrũku wa rĩera. O na kũrĩ ũguo, ũndũ ũcio ti mũiganu . . . Thĩ ĩno itũ ĩrĩ o ũgwati-inĩ mũnene.”

•    Kũrĩ Novemba 20, 2022, Mary Robinson, ũrĩa warĩ mũtongoria wa bũrũri wa Ireland na Mũrũgamĩrĩri Mũnene wa Ihooto cia Andũ thĩinĩ wa Ũrũmwe wa Mabũrũri aaugire ũũ: “No kũhoteke ica ikuhĩ thĩ nĩ ĩkũgĩa na ũgarũrũku mũnene wa rĩera ũrĩa ũgũkorũo na moimĩrĩro moru mũno harĩ andũ othe.”

 Makĩria andũ ethĩ nĩ maratangĩka igũrũ rĩgiĩ ũrĩa thĩ ĩno ĩgaakorũo ĩhaana ihinda rĩũkĩte. O na kũrĩ ũguo-rĩ, hihi mabũrũri no manyitanĩre na mahingie ũndũ ũrĩa meranĩire wa kũrehe kĩhonia kĩa ũgarũrũku wa rĩera? Bibilia yugaga atĩa?

 Bibilia yonanagia atĩ o na thirikari ingĩĩrutanĩria atĩa, itingĩhota kũniina biũ mathĩna marĩa marehagwo nĩ ũgarũrũku wa rĩera. Reke tuone itũmi igĩrĩ iria ingĩtũma tuuge ũguo:

•   “Kĩndũ kĩrĩa kĩogomu gĩtingĩrũngĩka.”—Kohelethu 1:15.

   Ũrutani: Thirikari itingĩhota gwĩka maũndũ marĩa mothe ingĩenda gwĩka tondũ andũ matiombĩtwo meyathage. (Jeremia 10:23) O na mabũrũri mangĩnyitanĩra, na merutanĩrie atĩa, matingĩhota kũrehe kĩhonia kĩa mathĩna marĩa marĩ thĩinĩ wa thĩ.

•   “Nĩ gũkorũo andũ nĩ magaatuĩka eyendi, endi mbeca, . . . matarĩ wendo ũrĩa wa ndũire, matendaga ũiguano.”—2 Timotheo 3:2, 3.

   Ũrutani: Bibilia yarathĩte ĩtekũhĩtia atĩ andũ aingĩ a matukũ maya mangĩgakorũo marĩ eyendi na matekwenda kũrutithania wĩra nĩguo magune andũ arĩa angĩ.

 Mwĩhoko wa thĩ ĩno itũ ndwĩhocetie harĩ ciĩranĩro cia thirikari cia andũ. Ngai nĩ athuurĩte Jesu Kristo atuĩke Mũtongoria wa thĩ, na arĩ na ũhoti mũnene. Bibilia yugaga ũũ igũrũ rĩgiĩ Jesu:

•   “Thirikari nĩ [ĩgaaikara] kĩande-inĩ gĩako. Gageetagwo Mũtaarani wa Magegania, Ngai Mwene-Hinya, Ithe wa Andũ wa Tene na Tene, Mũnene wa Thayũ.”—Isaia 9:6, kohoro ka magũrũ-inĩ.

 Jesu nĩwe Mũthamaki wa Ũthamaki wa Ngai, kana thirikari ya igũrũ. (Mathayo 6:10) Arĩ na hinya, ũũgĩ, na wendi wa kũmenyerera thĩ ĩno itũ o hamwe na aikari ayo. (Thaburi 72:12, 16) Rungu rwa ũtongoria wake, thirikari ĩyo ya igũrũ nĩ ĩkaaniina “arĩa manangaga thĩ,” na ĩthondeke thĩ ĩno ĩtuĩke njega rĩngĩ.—Kũguũrĩrio 11:18; Isaia 35:1, 7.

 Nĩguo wĩrute makĩria igũrũ rĩgiĩ kĩhonia kĩrĩa kĩega biũ kĩa ũgarũrũku wa rĩera, thoma gĩcunjĩ kĩrĩ na kĩongo, “Biblia Inasema Nini Kuhusu Mabadiliko ya Hali ya Hewa na Wakati Wetu Ujao?”