Ungumania wa anene a thirikari nĩ thĩna ũkoragwo thĩinĩ wa thĩ yothe na nĩ ũrehaga moimĩrĩro moru mũno. a Kwa ngerekano, hĩndĩ ya kĩngʼũki gĩa COVID-19, anene a thirikari thĩinĩ wa mabũrũri maingĩ nĩ meekũagĩrũo atĩ meetongagia na mbeca iria ciabatiĩ kũhũthĩrũo gũteithia andũ kũhiũrania na kĩngʼũki kĩu. Ungumania ta ũcio nĩ wagirĩrĩirie andũ aingĩ kũgĩa na ũrigitani ũrĩa maabataraga, na kwoguo ũgĩtũma andũ aingĩ manyamarĩke na makue.

 Moimĩrĩro ma ungumania thirikari-inĩ makoragwo marĩ moru mũno. Mũndũ ũmwe wĩtagwo David Cameron, ũrĩa warĩ mũtongoria wa Ngeretha aaugire ũũ: “Ungumania ũkoragwo ũrĩ mũingĩ mũno thirikari-inĩ, na ũndũ ũcio ũkoragwo ũhutĩtie mabũrũri mothe.”

 O na kũrĩ ũguo, no tũkorũo na ma atĩ ica ikuhĩ ungumania wothe thirikari-inĩ nĩ ũgũthira. Nĩkĩ? Reke tuone maũndũ marĩa Ngai arĩka.

 Ngai augĩte ũũ thĩinĩ wa Bibilia: “Niĩ Jehova, nĩ nyendete kĩhooto; nĩ thũire ũtunyani na wagi wa ũthingu.” b (Isaia 61:8) Ngai nĩ onaga rĩrĩa andũ maranyamarĩka nĩ ũndũ wa ciĩko cia ungumania cia andũ arĩa angĩ. (Thimo 14:31) Eranĩire ũũ: “Tondũ andũ arĩa matarĩ hinya nĩ mahinyĩrĩirio, . . . nĩ ngwarahũka njoe ikinya.”—Thaburi 12:5.

 Hihi Ngai ageka atĩa? Handũ ha gũthondeka thirikari iria irĩ kuo, agaacieheria na arehe thirikari yake mwene ya igũrũ, ĩrĩa ĩtagwo “Ũthamaki wa Ngai.” (Mariko 1:14, 15; Mathayo 6:10) Bibilia yugaga ũũ: “Ngai wa igũrũ nĩ akaahanda ũthamaki ũrĩa . . . ũkaamemenda na ũniine mothamaki macio [mangĩ] mothe, na noguo wiki ũgaatũũra wĩhandĩte tene na tene.” (Danieli 2:44) Na njĩra ĩyo, Ngai nĩ akaaniina ungumania ũrĩa tũrona ũmũthĩ.

 Tũmenyaga atĩa atĩ thirikari ya Ũthamaki wa Ngai ndĩgaakorũo na ungumania? Ta wĩcirie ũhoro wa maũndũ maya.

1.  1. Hinya. Ũthamaki ũcio wamũkagĩra hinya kuuma kũrĩ Ngai Mwene-Hinya-Wothe.—Kũguũrĩrio 11:15.

    Nĩkĩ ũndũ ũcio nĩ wa bata? Thirikari cia andũ ciĩhokaga mbeca iria irutagwo nĩ raia a cio nĩguo irute wĩra. Ũndũ ũcio nĩ uumĩragia mĩeke ya andũ gwĩtio mahaki, ũici, na andũ kũhinyĩrĩrio. O na kũrĩ ũguo, tondũ Ũthamaki ũcio ũheagwo hinya nĩ Ngai Mwene-Hinya-Wothe, hingo ciothe nĩ ũkaahota kũhingĩria raia a guo mabataro mao.—Thaburi 145:16.

2.  2. Mũtongoria. Ngai nĩ amũrĩte Jesu Kristo atuĩke Mũtongoria wa Ũthamaki ũcio.—Danieli 7:13, 14.

    Nĩkĩ ũndũ ũcio nĩ wa bata? O na atongoria arĩa ega biũ a gũkũ thĩ no magucĩrĩrio nĩ andũ angĩ gwĩka maũndũ moru. (Kohelethu 7:20) Mũgarũ na ũguo, Jesu nĩ onanĩtie atĩ ndangĩtĩkĩra kwamũkĩra ihaki. (Mathayo 4:8-11) Makĩria ma ũguo, hingo ciothe atindĩkagwo nĩ wendo kwerekera raia ake, na nĩ amarũmbũyagia biũ kuuma ngoro.—Thaburi 72:12-14.

3.  3. Mawatho. Mawatho ma Ũthamaki wa Ngai nĩ makinyanĩru, na nĩ matũmaga arĩa mamathĩkĩra makorũo na gĩkeno.—Thaburi 19:7, 8.

    Nĩkĩ ũndũ ũcio nĩ wa bata? Mawatho ma andũ kaingĩ matitaũkĩkaga, makoragwo marĩ maritũ, kana matirũmagĩrĩrũo ũrĩa kwagĩrĩire, na kwoguo nĩ moimĩragia mĩeke ya ungumania. No mawatho ma Ngai nĩ matũgunaga rĩrĩa twamarũmĩrĩra. (Isaia 48:17, 18) Makĩria ma ũguo, mawatho macio matiaragĩrĩria o maũndũ marĩa twĩkaga, no nĩ nginya kĩrĩa gĩtũmaga twĩke maũndũ macio. (Mathayo 22:37, 39) Ũrĩa kũrĩ nĩ atĩ, Ngai nĩ athomaga ngoro na no ahote gũtigĩrĩra atĩ mawatho ta macio nĩ maraheanwo na njĩra ĩrĩ na ũcayanĩri.—Jeremia 17:10.

 Tũrakũnyita ũgeni wĩrute makĩria igũrũ rĩgiĩ kĩĩranĩro kĩa Bibilia gĩa thirikari ya ihinda rĩũkĩte ĩrĩa ĩtagaakorũo na ungumania.

•   Thoma gĩcunjĩ kĩrĩ na kĩongo “Ũthamaki wa Ngai—Thirikari Ĩtarĩ Ungumania” nĩguo wĩrute itũmi ingĩ ithatũ iria itũteithagia kũmenya atĩ gũtirĩ hĩndĩ thirikari ya Ũthamaki wa Ngai ĩgaakorũo na ungumania.

•   Wĩrorere video ĩrĩ na kĩongo Ũthamaki wa Ngai nĩ Kĩĩ? nĩguo wĩrute makĩria ũhoro wĩgiĩ thirikari ya Ngai na maũndũ marĩa ĩgekĩra andũ gũkũ thĩ.

•   Wĩrute Bibilia hatarĩ marĩhi nĩguo wone ũrĩa ũngĩgunĩka kuumana na ciĩranĩro cia Bibilia.