Hihi Kũrĩ Hĩndĩ Mathĩna ma Kĩĩmbeca Magaathira?
Mabũrũri-inĩ matiganĩte, andũ nĩ mararũrũngana barabara-inĩ nĩ ũndũ wa kuona thogora wa ũtũũro ũthiĩte igũrũ mũno. Mathĩna macio moongererekire makĩria nĩ ũndũ wa kĩngʼũki gĩa COVID-19, kĩrĩa gĩatũmire gũkorũo na wagagu nĩ ũndũ wa andũ kwĩrũo makindĩrie kwao mĩciĩ, indo cia o mũhaka kũnyiha, na kũritũhĩrũo nĩ kuona njĩra cia ũrigitani, maũndũ marĩa moonanirie ngũrani nene gatagatĩ ga itonga na athĩni.
Hihi mathĩna ma kĩĩmbeca marĩa matũmaga andũ manyamarĩke nĩ magaathira? Ĩĩ. Bibilia nĩ ĩtaaragĩria ũrĩa Ngai ageeka nĩguo arehe kĩhonia kĩa mathĩna marĩa tũracemania namo.
Mathĩna ma kĩĩmbeca marĩa Ngai akaaniina
Thĩna: Andũ matirĩ maagĩa na ũtongoria ũngĩniinĩra andũ othe mathĩna mao ma kĩĩmbeca.
Kĩhonia: Ngai nĩ akeeheria thirikari cia andũ, na handũ-inĩ ha cio ahande thirikari yake, ĩrĩa ĩtagwo Ũthamaki wa Ngai. Ĩgaathana thĩ yothe, ĩrĩ kũrĩa igũrũ.—Danieli 2:44; Mathayo 6:10.
Maumĩrĩro: Tondũ Ũthamaki wa Ngai ũgaathana thĩ yothe, ũgaatongoria maũndũ mothe thĩinĩ wa thĩ na njĩra nginyanĩru. Gũtirĩ hĩndĩ andũ magaakorũo marĩ athĩni rĩngĩ kana mage mabataro mao ma o mũhaka. (Thaburi 9:7-9, 18) Handũ ha ũguo, nĩ magaakenera maumĩrĩro ma wĩra wao, na makorũo na ũtũũro mwega na maiganĩire marĩ hamwe na famĩlĩ ciao. Bibilia ĩranĩire ũũ: “Nĩ magaaka nyũmba na matũũre thĩinĩ wacio, na mahande mĩgũnda ya mĩthabibũ na marĩe maciaro mayo. Matigaaka nyũmba itũũrũo nĩ mũndũ ũngĩ, o na kana mahande icoke irĩo nĩ andũ angĩ.”—Isaia 65:21, 22.
Thĩna: Andũ matingĩhota gwĩthema maũndũ marĩa matũmaga mathĩnĩke na mage mabataro mao ma ũtũũro.
Kĩhonia: Kũgerera Ũthamaki wake, Ngai nĩ akeeheria maũndũ mothe marĩa matũmaga andũ maigue guoya na matarĩ na ũgitĩri.
Maumĩrĩro: Rungu rwa Ũthamaki wa Ngai, andũ matigaacoka gũcemania na maũndũ marĩa matũmaga mage mabataro mao ma o mũhaka. Kwa ngerekano, mbaara, ngʼaragu, na mĩrimũ, itigaakorũo kuo rĩngĩ. (Thaburi 46:9; 72:16; Isaia 33:24) Ngai augĩte ũũ: “Andũ akwa magaatũũra handũ harĩ na thayũ, kũndũ kũrĩ na ũgitĩri na kũndũ kũhooreru gwa kũhurũka.”—Isaia 32:18.
Thĩna: Kaingĩ andũ arĩa marĩ mwĩyendo na ũkoroku nĩ mahũthagĩra andũ arĩa angĩ ũũru.
Kĩhonia: Raia a Ũthamaki wa Ngai nĩ makeeruta kwenda andũ arĩa angĩ kuuma ngoro, gũkĩra ũrĩa meyendete.—Mathayo 22:37-39.
Maumĩrĩro: Rungu rwa Ũthamaki wa Ngai, o mũndũ nĩ akoonania wendo ta wa Ngai, ũrĩa “[ũtacaragia] ũrĩa ũngĩĩguna guo mwene.” (1 Akorintho 13:4, 5) Bibilia yugaga ũũ: “[Matikaagerana] ngero o na hanini, kana [marehe] mwanangĩko o wothe kĩrĩma-inĩ gĩakwa gĩothe kĩrĩa kĩamũre, tondũ hatarĩ nganja thĩ nĩ ĩkaaiyũrũo nĩ ũmenyo wĩgiĩ Jehova a o ta ũrĩa maĩ mahumbagĩra iria.”—Isaia 11:9.
Bibilia yonanagia atĩ tũratũũra matukũ ma kũrigĩrĩria ma mũtabarĩre ũyũ wa maũndũ, na atĩ ica ikuhĩ Ngai nĩ ekũhingia kĩĩranĩro gĩa kũniina mathĩna mothe ma kĩĩmbeca. b (Thaburi 12:5) Ihinda-inĩ rĩrĩ, motaaro ma Bibilia no magũteithie kũhiũrania na mathĩna ma kĩĩmbeca marĩa ũracemania namo rĩu. Nĩguo wone ngerekano imwe, thoma icunjĩ irĩ na kĩongo “Jinsi ya Kuishi Ukiwa na Pesa Kidogo” na “Mawoni Mega Megiĩ Mbeca.”
a Jehova nĩrĩo rĩĩtwa rĩa Ngai ta ũrĩa Bibilia yonanĩtie.—Thaburi 83:18.
b Nĩguo ũmenye kĩrĩa kĩngĩtũma wĩhoke Bibilia, thoma gĩcunjĩ kĩrĩ na kĩongo “Bibilia Ĩkoragwo na Ũhoro wa Kwĩhokeka wa Ma.”
Icunjĩ Ingĩ Hihi Ũngĩenda Gũthoma
MŨRANGĨRI
Ũthamaki wa Ngai Ũgeeka Maũndũ Marĩkũ?
Jesu nĩ aamenyaga atĩ Ũthamaki wa Ngai noguo tu thirikari ĩrĩa ĩngĩhota kũniina mathĩna thĩinĩ wa thĩ. Nĩ maũndũ marĩkũ Ũthamaki ũcio wĩkĩte mangĩtũma tũkorũo na ma na ũndũ ũcio?
