Kũndũ kũingĩ thĩinĩ wa thĩ, andũ aingĩ nĩ magũmĩirũo nĩ mĩiyũro ĩrarehe mwanangĩko mũnene. Ta wĩcirie ũhoro wa riboti ici:

•   “Kwa ihinda rĩa thikũ cigana ũna, nĩ gũkoretwo gũkiura mbura nene taũni-inĩ nene ya bũrũri wa China, na mbura ta ĩyo ĩrĩgĩte kuura mĩaka ta 140 mĩthiru. Kuuma Njuuma nginya Njumatano, maĩ ma mbura ĩrĩa yurĩte nĩ makinyĩtie inji 29.3.”—AP News, Agosti 2, 2023.

•   “Aramithi warĩ mũthenya wa kerĩ kĩhuhũkanio kĩnene gĩa Khanun kũrehe mbura nene na rũhuho rũnene mũhuro wa Japan na andũ erĩ magakua. . . . Gĩcigo-inĩ kĩa irĩma gĩa Taiwan, maĩ ma kĩhuhũkanio kĩu merĩgĩrĩirũo gũkinya fiti igĩrĩ.”—Deutsche Welle, Agosti 3, 2023.

•   “Mũiyũro ũrĩa warĩ kuo mũthia-inĩ wa kiumia [Nova Scotia] warehirũo nĩ mbura nene ĩrĩa yoirire gĩcigo-inĩ kĩa Atlantic thĩinĩ wa Canada, na mbura ta ĩyo ĩrĩgĩte kuura mĩaka ta 50 mĩhĩtũku.”—BBC News, Julaĩ 24, 2023.

 Hihi Bibilia yugaga atĩa igũrũ rĩgiĩ maũndũ ta macio?

 Bibilia yonanagia atĩ tũratũũra “matukũ-inĩ ma kũrigĩrĩria.” (2 Timotheo 3:1) Jesu nĩ aarathĩte atĩ matukũ-inĩ maya maitũ nĩ tũngĩkona “maũndũ ma kũmakania,” kana ma gũtua nda. (Luka 21:11) Ũgarũrũku wa rĩera nĩguo ũrarehe maũndũ ta macio materĩgĩrĩirũo, marĩa marekĩka kaingĩ, na makarehe mwanangĩko mũnene.

 Bibilia ĩtwĩraga atĩ maũndũ maingĩ ma kũmakania marĩa marekĩka matukũ-inĩ maya magĩrĩirũo gũtũhe kĩĩrĩgĩrĩro. Gĩtũmi nĩ tondũ Jesu ooigire ũũ: “Rĩrĩa mũkoona maũndũ macio magĩkĩka, menyai atĩ Ũthamaki wa Ngai nĩ ũkuhĩrĩirie.”—Luka 21:31; Mathayo 24:3.

 Maũndũ macio tũrona makĩhaanĩka maronania atĩ ica ikuhĩ Ũthamaki wa Ngai nĩ ũgũthondeka maũndũ megiĩ rĩera, o hamwe na mũthiũrũrũko wa maĩ thĩinĩ wa thĩ.—Ayubu 36:27, 28; Thaburi 107:29.

 Nĩguo wĩrute makĩria ũrĩa Ũthamaki wa Ngai ũgathondeka maũndũ megiĩ rĩera thĩinĩ wa thĩ rora gĩcunjĩ kĩrĩ na kĩongo “Nũũ Ũkaahonokia Thĩ?”