Kũndũ kũingĩ thĩinĩ wa thĩ, andũ nĩ marakenio nĩ mũtũũrĩre wa gwĩthema kũrĩa nyama na indo ingĩ ciumanĩte na nyamũ.

•   “Andũ arĩa maikaraga mũtũũrĩre ũcio, mekaga ũrĩa wothe mangĩhota gwĩthema gwĩka nyamũ ũũru, kana kũũraga nyamũ nĩ ũndũ wa irio, nguo, kana nĩ ũndũ wa ũndũ ũngĩ o wothe.”—The Vegan Society.

 Makĩria ma kũrũmbũiya nyamũ, andũ amwe maikaraga mũtũũrĩre ũcio makĩenda kwagagĩria marĩa matũrigicĩirie, ũgima wao wa mwĩrĩ, kana tondũ wa itũmi cia kĩndini.

•   “Mũtũũrĩre wa gwĩthema kũrĩa nyama na indo ingĩ ciumanĩte na nyamũ, nĩ ngũrani na mĩrĩĩre ĩngĩ tondũ kaingĩ andũ mawonaga ũrĩ wĩtĩkio, itua rĩa mũndũ rĩa gwĩka ũndũ ũrĩa mwagĩrĩru, na njĩra ĩmwe ya o mũndũ kwagagĩria thĩ.”—Britannica Academic.

 Hihi mũtũũrĩre ũcio nĩguo kĩhonia kĩa mathĩna ma thĩ? Mawoni ma Bibilia nĩ marĩkũ?

 Bibilia yonanagia atĩ Mũũmbi witũ, Jehova Ngai, a onaga andũ marĩ a bata gũkĩra nyamũ, na nĩ amaheete wathani igũrũ rĩa nyamũ. (Kĩambĩrĩria 1:27, 28) Ningĩ thutha-inĩ Ngai nĩ eetĩkĩririe andũ marĩage nyamũ. (Kĩambĩrĩria 9:3) O na kũrĩ ũguo, Ngai ndakenaga rĩrĩa andũ mareka nyamũ maũndũ moru.—Thimo 12:10.

 Kũringana na Bibilia, kũrĩa nyama nĩ itua rĩa mũndũ kĩũmbe. b Gũkorũo tũrĩ ega maitho-inĩ ma Ngai gũtihutanĩtie na itua ritũ ũndũ-inĩ ũcio. (1 Akorintho 8:8) Gũtirĩ mũndũ wagĩrĩirũo kũingĩrĩra itua rĩa mũndũ ũngĩ rĩgiĩ kũrĩa kana kwaga kũrĩa kĩndũ kĩna.—Aroma 14:3.

 Bibilia yonanagia atĩ mĩtũũrĩre itũ ndĩngĩrehe kĩhonia kĩa mathĩna thĩinĩ wa thĩ. Mathĩna maingĩ moimanaga na maũndũ ma gĩũteti, ma mĩikarĩre, na ma kĩĩbiacara ma thĩ ĩno, na gũtirĩ mũndũ ũngĩhota kũmathondeka. Bibilia yugaga ũũ:

•   “Kĩndũ kĩrĩa kĩogomu gĩtingĩrũngĩka.”—Kohelethu 1:15.

 Mũũmbi witũ nĩ akaarehe kĩhonia kĩa mathĩna marĩa tũcemanagia namo. Bibilia ĩhũthagĩra ngerekano gũtuonia ũrĩa ageeka ũguo.

•   “Na ngĩona igũrũ rĩerũ o na thĩ njerũ; nĩ gũkorũo igũrũ rĩrĩa rĩa tene o na thĩ ĩrĩa ya tene nĩ ciathirĩte, na iria rĩtirĩ kuo rĩngĩ.”—Kũguũrĩrio 21:1.

 Ngai nĩ akeeheria thirikari cia andũ, nĩcio “igũrũ rĩrĩa rĩa tene,” arehe “igũrũ rĩerũ” na nĩrĩo Ũthamaki wake wa kũrĩa igũrũ. Ũthamaki wake nĩ ũkeeheria “thĩ ĩrĩa ya tene,” nĩyo andũ arĩa aganu, na wathane igũrũ rĩa “thĩ njerũ,” nĩyo andũ arĩa mendaga gũtũũra me raia a guo.

 Rĩrĩa Ũthamaki wa Ngai ũgaakorũo ũgĩathana, norĩo andũ makaahota gũikarania na thayũ na nyamũ o hamwe na marĩa matũrigicĩirie.—Isaia 11:6-9.