Mbaara ĩrĩa ĩrĩ bũrũri-inĩ wa Ukraine, o hamwe na maumĩrĩra ma mogarũrũku ma rĩera, no irathiĩ na mbere gũtũma kũgĩe na ũnyihu mũnene wa irio thĩinĩ wa thĩ. Thĩna ũcio nĩ wonekete mũno mabũrũri-inĩ marĩa ũtakoragwo ũrĩ ũndũ mũhũthũ harĩ andũ aingĩ kuona irio cia kũigana.

•   “Mbaara, mogarũrũku ma rĩera, thogora wa maguta, na maũndũ mangĩ maingĩ, nĩ ihutĩtie ũkũria wa irio na kuoneka gwacio.—António Guterres, mwandĩki mũnene wa kĩama kĩa UN, Julaĩ 17, 2023.

•   “Ataaramu maroiga atĩ nĩ ũndũ wa Russia kwĩyeheria ngirimiti-inĩ ya ũkuui wa irio nyũmũ, kwahota kũgĩa na thĩna wa irio thĩinĩ wa thĩ na thogora wa irio wongerereke mabũrũri-inĩ marĩa matarĩ na ũhoti mũnene wa kĩĩmbeca, makĩria mabũrũri ma rũgongo rwa Afrika na Asia ya Gatagatĩ.”—Atalayar.com, Jũlaĩ 23, 2023.

 Rora ũrĩa Bibilia yugaga ũhoro-inĩ wĩgiĩ thĩna wa irio na igũrũ rĩgiĩ ihinda rĩũkĩte.

•   Jesu aarathĩte ũũ: “Rũrĩrĩ nĩ rũgookĩrĩra rũrĩrĩ rũrĩa rũngĩ na ũthamaki ũũkĩrĩre ũthamaki ũrĩa ũngĩ, na nĩ gũkaagĩa ngʼaragu.”—Mathayo 24:7.

•   Ibuku rĩa Kũguũrĩrio thĩinĩ wa Bibilia nĩ rĩtaarĩirie ũhoro wa atwarithia ana a mbarathi a ngerekano. Ũmwe wao arũgamĩrĩire mbaara. Aumĩtwo thutha nĩ mũtwarithia ũngĩ wa mbarathi ũrĩa ũrũgamĩrĩire ngʼaragu, kana ihinda rĩrĩa irio ingĩgaakorũo irĩ nini na irĩ na goro mũno. Ibuku rĩu riugaga ũũ: “Ngĩona mbarathi njirũ hau mbere yakwa! Ũrĩa wamĩhaicĩte aanyitĩte ratiri na guoko gwake. Ningĩ ngĩigua kĩndũ kĩarurumire ta mũgambo . . . ũkiuga atĩrĩ, ‘Kĩbaba kĩa ngano kiumage mũcaara wa mũthenya ũmwe, na ibaba ithatũ cia ngano ya cairi ciumage mũcara wa mũthenya ũmwe.’”—Kũguũrĩrio 6:5, 6, Holy Bible in Gĩkũyũ.

 Morathi macio ma Bibilia nĩ marahinga mahinda-inĩ maya Bibilia ĩtĩte ‘matukũ ma kũrigĩrĩria.’ (2 Timotheo 3:1) Nĩguo wĩrute makĩria ũhoro wĩgiĩ ‘matukũ ma kũrigĩrĩria,’ na ũhoro wĩgiĩ atwarithia ana a mbarathi arĩa magwetetwo thĩinĩ wa Kũguũrĩrio, wĩrorere video ya Thĩ nĩ Ĩcenjetie Kuuma Mwaka wa 1914 na ũthome gĩcunjĩ kĩrĩ na kĩongo “Atwarithia Arĩa ana a Mbarathi nĩ A?”

•   Bibilia ĩrĩ na motaaro mangĩtũteithia kũhiũrania na maũndũ maritũ, ta ma kuongerereka gwa thogora wa irio kana thĩna wa irio. Rora motaaro mamwe thĩinĩ wa gĩcunjĩ kĩrĩ na kĩongo “Jinsi ya Kuishi Ukiwa na Pesa Kidogo.”

•   Ningĩ Bibilia nĩ ĩtũheaga kĩĩrĩgĩrĩro atĩ maũndũ nĩ marĩagĩra. Nĩ ĩranĩire hĩndĩ “gũgaakorũo na ngano nyingĩ thĩinĩ wa thĩ” na andũ othe nĩ magaakorũo na irio nyingĩ cia kũrĩa. (Thaburi 72:16) Nĩguo wĩrute makĩria ũhoro wĩgiĩ kĩĩrĩgĩrĩro kĩu kĩa ihinda rĩũkĩte na kĩrĩa kĩngĩtũma ũkĩhoke, thoma gĩcunjĩ kĩrĩ na kĩongo “Tumaini Bora la Wakati Ujao.”