Mwaka-inĩ wa 2022, thirikari itiganĩte thĩinĩ wa thĩ ciahũthĩrire dola tiririoni 2.24 harĩ mbũtũ ciao cia mbaara. Mbeca icio nĩcio nyingĩ mũno cianahũthĩrũo harĩ mbũtũ cia mbaara. Ũndũ ũcio wacũngĩrĩirio nĩ tharĩkĩro ya Russia kũrĩ Ukraine. Riboti ĩrĩa yarekereirio mweri-inĩ wa Ĩpuro 2023 nĩ Stockholm International Peace Research Institute (SIPRI), yaugĩte atĩ mwaka-inĩ wa 2022:

•   Mahũthĩro ma mbũtũ thĩinĩ wa Europe “moongererekire na gĩcunjĩ gĩa 13 harĩ igana mwaka-inĩ ũcio, ũrĩa nĩguo warĩ wongerereku mũnene mũno wa mahũthĩro harĩ mwaka mabũrũri-inĩ ma Europe kuuma mwaka wa 1991.”

•   “Russia yoongereire mahũthĩro mayo na gĩcunjĩ ta kĩa 9.2 harĩ igana, ũndũ ũrĩa watũmire yambatĩre kuuma namba ithano nginya ithatũ harĩ mabũrũri marĩa mahũthagĩra mbeca nyingĩ harĩ mbũtũ thĩinĩ wa thĩ.”

•   O ta mĩaka ya hau kabere, bũrũri wa Amerika (US) nĩguo wahũthĩrire mbeca iria nyingĩ mũno harĩ mbũtũ, tondũ “wahũthĩrire gĩcunjĩ kĩa 39 harĩ igana kĩa mahũthĩro mothe ma mbũtũ thĩinĩ wa thĩ.”

 Mwandĩki ũmwe wa riboti ĩyo ya SIPRI wĩtagwo Dr. Nan Tian aaugire ũũ: “Thirikari gũkorũo ikĩhũthĩra mbeca nyingĩ makĩria harĩ mbũtũ cia mbaara kũronania atĩ tũratũũra thĩinĩ wa thĩ ĩrathiĩ na mbere kwaga ũgitĩri.”

 Bibilia nĩ yarathĩte atĩ thirikari iria nene nĩ ingĩgookanĩrĩra na njĩra nene mahinda-inĩ maya, na nĩ yonanĩtie kĩrĩa gĩkaarehe thayũ wa ma.

•   Bibilia ĩĩtaga ihinda rĩrĩ tũratũũra ‘ihinda rĩa mũthia.’—Danieli 8:19.

•   Ibuku rĩa Danieli rĩarathĩte atĩ mahinda-inĩ maya, thirikari iria nene thĩinĩ wa thĩ nĩ ingĩgookanĩrĩra. Thirikari icio nene cia thĩ nĩ ‘ingĩgaatindĩkana,’ kana na njĩra ĩngĩ ikorũo ikĩguucania ikĩenda kuonania nĩ ĩrĩkũ ĩrĩ na hinya makĩria. Gũtindĩkana kũu nĩ kũngĩgaatũma ihũthĩre “mĩthithũ,” kana mbeca nyingĩ.—Danieli 11:40, 42, 43.

Nĩguo wĩrute makĩria ũhoro wĩgiĩ ũrathi ũcio wa Bibilia wa gũcanjamũra, wĩrorere video ĩrĩ na kĩongo, Kũhinga kwa  Ũrathi wa Danieli Mũrango wa 11.

•   Bibilia nĩ yonanagia atĩ Ngai nĩ akeeheria thirikari cia andũ na arehe thirikari ĩngĩ. Yugaga ũũ: “Nĩ akaahanda ũthamaki ũrĩa gũtarĩ hĩndĩ ũkaanangwo. Na ũthamaki ũcio ndũkaaneanwo kũrĩ andũ angĩ. Nĩ ũkaamemenda na ũniine mothamaki macio mothe, na noguo wiki ũgaatũũra wĩhandĩte tene na tene.”—Danieli 2:44.

•   Ica ikuhĩ Jehova a Ngai nĩ ekũrehe thayũ wa ma na wa gũtũũra, ũndũ ũrĩa andũ matangĩhota gwĩka. Ageeka ũguo atĩa? Ũthamaki wake wa igũrũ nĩ ũkaaniina matharaita mothe na ũniine mbaara ciothe.—Thaburi 46:8, 9.

 Nĩguo wĩrute makĩria ũhoro wĩgiĩ maũndũ marĩa Ũthamaki wa Ngai ũkaahingia, thoma gĩcunjĩ kĩrĩ na kĩongo “Wakati Huo ‘Amani Itakuwa Nyingi.’”