Kũringana na kĩama kĩa Ũrũmwe wa Mabũrũri:

•   Kuuma Oktomba 7 nginya Oktomba 23, 2023, mbaara gatagatĩ-inĩ ka Gaza na Israel nĩ ĩtũmĩte andũ makĩria ma 6,400 makue na angĩ 15,200 magurare, na aingĩ ao nĩ raiya matarĩ na mahĩtia. Makĩria ma ũguo, andũ angĩ ngiri nyingĩ nĩ mabatarĩte gwĩthara kuuma mĩciĩ-inĩ yao.

•   Gũkinyĩria Septemba 24, 2023, mbaara gatagatĩ-inĩ ka Russia na Ukraine nĩ ĩtũmĩte raiya matarĩ na mahĩtia 9,701 moragwo na angĩ 17,748 magurare thĩinĩ wa Ukraine.

 Bibilia ĩheanĩte kĩĩrĩgĩrĩro kĩrĩkũ kũrĩ andũ arĩa marathĩnĩka nĩ ũndũ wa mbaara?

 Bibilia nĩ ĩranĩire atĩ Ngai nĩ “[akaaniina] mbaara kũndũ guothe thĩinĩ wa thĩ.” (Thaburi 46:9) Akaahũthĩra thirikari ya igũrũ, kana Ũthamaki wake, kweheria thirikari ciothe cia thĩ. (Danieli 2:44) Ũthamaki wa Ngai nĩ ũkaarehera andũ kĩhonia kĩa mathĩna mao.

 Ta rora wone ũrĩa Jesu Kristo, arĩ we Mũthamaki wa Ũthamaki wa Ngai, ageeka:

•   “Nĩ akaahonokia athĩni arĩa makayaga makĩhoya ũteithio, o na mũndũ ũrĩa ũtarĩ hinya hamwe na ũrĩa wothe ũtarĩ na wa kũmũteithia. Andũ arĩa matarĩ hinya na arĩa athĩni nĩ akaamaiguĩra tha, na nĩ akaahonokia mĩoyo ya arĩa athĩni. Nĩ akaamahonokia matige kũhinyĩrĩrio na gwĩkwo maũndũ ma ũhinya.”—Thaburi 72:12-14.

 Kũgerera Ũthamaki wake, Ngai nĩ akeeheria mathĩna mothe marĩa marehagwo nĩ mbaara na wĩki-naĩ.

•   “Nĩ ekũmagiria maithori mothe mathire maitho-inĩ mao, na gĩkuũ gĩtigaacoka gũkorũo kuo rĩngĩ, o na gũcakaya kana kĩrĩro kana ruo. Maũndũ marĩa ma tene nĩ mathiru.”—Kũguũrĩrio 21:4.

 Ica ikuhĩ, Ũthamaki wa Ngai nĩ ũkũrehe mogarũrũku manene thĩinĩ wa thĩ. Bibilia nĩ yarathĩte ũhoro wĩgiĩ “mbaara na riboti ciĩgiĩ mbaara” iria tũraigua mahinda-inĩ maya. (Mathayo 24:6) Mbaara icio na maũndũ mangĩ marĩa marekĩka, nĩ kĩonereria kĩa atĩ tũratũũra “matukũ-inĩ ma kũrigĩrĩria” ma wathani wa andũ.—2 Timotheo 3:1.