Kũrĩ Oktomba 21, 1940, thirikari ya New Zealand nĩ yaugire atĩ Aira a Jehova nĩ mareganaga na thirikari na nĩ ũgwati harĩ ũgitĩri wa mũingĩ. O na gũtuĩka ũndũ ũcio thirikari yaugire nĩ wareheire Aira a Jehova moritũ maingĩ, matiakuire ngoro. Kwa ngerekano, no maathiire na mbere gũcemania hamwe nĩ ũndũ wa ũthathaiya, o na makĩmenyaga atĩ no mahithũkĩrũo na manyitwo nĩ anene a thirikari.

 Andy Clarke, ũrĩa ũtaarĩ Mũira wa Jehova, nĩ oonire atĩ mũtumia wake Mary, aarĩ na wendi mũnene wa gũthiĩ mĩcemanio o na makĩheagwo mĩkaana. Nĩ eetigagĩra atĩ mũtumia wake ahota kũnyitwo agĩthiĩ mĩcemanio. O na gũtuĩka mbere ĩyo ndaathiaga mĩcemanio, Andy nĩ aambĩrĩirie gũthiĩ hamwe na Mary na akĩmwĩra, “Angĩkorũo nĩ megũkũnyita, o na niĩ ngũnyitwo hamwe nawe!” Kuuma hĩndĩ ĩyo Andy akĩambĩrĩria gũthiaga mĩcemanio yothe hamwe na mũtumia wake. Thutha wa ihinda, o nake akĩbatithio agĩtuĩka Mũira wa Jehova. O ta Mary, Aira a Jehova aingĩ bũrũri-inĩ wa New Zealand nĩ maatuĩte itua rĩa gũkorũo marĩ ehokeku harĩ Jehova hĩndĩ ya Mbaara ya Kerĩ ya Thĩ o na makĩnyariragwo.

 Mũthenya ũmwe, John Murray, ũrĩa warĩ na mĩaka 78 nĩ aarũgamirio nĩ borithi akĩhunjia ũhoro wa Bibilia nyũmba kwa nyũmba. Igooti nĩ rĩamũtuĩrĩire atĩ aarĩ na mahĩtia ma kũnyitanĩra maũndũ-inĩ ma ithondeka rĩkararagia thirikari. Aira a Jehova aingĩ nĩ maaciirithirio magooti-inĩ, amwe makĩhũũrũo faĩni, na angĩ makĩohwo ihinda rĩa mĩeri ĩtatũ.

 Aira a Jehova nĩ maaregire kũingĩra njeshi-inĩ nĩ ũndũ wa thamiri ciao imenyeretio nĩ Bibilia. (Isaia 2:4) Nĩ ũndũ ũcio, nĩ maagereire moritũ manene rĩrĩa angĩ ao meerirũo maingĩre njeshi-inĩ. Handũ ha kũingĩra njeshi-inĩ, Aira a Jehova ta 80 nĩ maahingĩirũo kambĩ-inĩ ihinda-inĩ rĩu rĩothe kwarĩ mbaara. O na makĩnyariragwo na kũrĩ na heho nene kũu kambĩ-inĩ, ariũ a Ithe witũ no maathiire na mbere gũthathaiya Jehova marĩ na gĩkeno.

 Marĩ kũu kambĩ-inĩ, nĩ maabangire o na ihenya ũrĩa marĩkaga mĩcemanio na makahunjia. Meekaga maũndũ o ta kĩũngano, mageka mĩcemanio mategũtĩrĩria na makahunjĩria andũ arĩa angĩ maarĩ nao kũu. Kambĩ-inĩ imwe, Aira a Jehova nĩ meetĩkĩrĩtio gwĩkaga igomano marũgamĩrĩirũo nĩ thigari. Amwe arĩa moohetwo nĩ meetĩkĩrire kwĩruta ma cia Bibilia na makĩbatithio marĩ o kũu.

 Bruce, mũriũ ũrĩa mũnini wa Mary na Andy, arĩa mekũgwetetwo hau kabere, oonire ihinda rĩu moohetwo kambĩ-inĩ rĩrĩ mweke mwega wa kwĩruta ũhoro makĩria wĩgiĩ Bibilia. Aacokire kuuga, “Harĩ niĩ, ndoonaga ta arĩ gũthiĩ cukuru tondũ nĩ ndaahotaga kwaranĩria na ariũ a Ithe witũ arĩa maarĩ na ũmenyeru kũu kambĩ-inĩ na ngeruta kuumana nao.”

 Mwaka-inĩ wa 1944, thirikari nĩ yatuire itua rĩa kũrekereria amwe arĩa moohetwo kambĩ-inĩ. O na kũrĩ ũguo, anene a njeshi nĩ maareganire na ũndũ ũcio, tondũ maarĩ na ma biũ atĩ, Aira a Jehova marekererio no mangĩathiire na mbere kwaria na andũ arĩa angĩ ũhoro wa wĩtĩkio wao. Riboti yaugire ũũ: “O na gũtuĩka kũhingĩra andũ ta aya kambĩ-inĩ kwa ihinda no kũnyihanyihie kĩyo kĩao, gũtingĩtũma macenjie.”

 Kũhũũrũo marubuku nĩ gwatũmire Aira a Jehova mamenyeke, na kwoguo andũ amwe nĩ meendire kũmenya ũhoro wao. Thutha wa ihinda, andũ aingĩ nĩ maamenyire atĩ Aira a Jehova matiarĩ ũgwati harĩ andũ. Nĩ maamenyire atĩ Aira a Jehova matingĩmeka maũndũ moru, na nĩ Akristiano mendete thayũ. Maumĩrĩra maarĩ atĩ, Aira a Jehova nĩ moongererekire bũrũri-inĩ wa New Zealand, kuuma andũ 320 mwaka wa 1939 nginya 536 mwaka wa 1945!

 Rĩmwe na rĩmwe, anene amwe a thirikari nĩ moonaga atĩ Aira a Jehova kũhũũrũo marubuku gũtiarĩ ũndũ wa kĩhooto. Thutha wa njanji ũmwe gũthikĩrĩria thitango kwerekera mũrũ wa Ithe witũ ũmwe wahunjagia, nĩ aateanĩirie ciira ũcio. Aaugire ũũ: “Kũringana na ũrĩa njĩtĩkĩtie na ũrĩa ndaũkagĩrũo nĩ watho, ndikuona ta arĩ wega gũtua atĩ mũndũ nĩ mwĩki-naĩ tondũ nĩ aheanaga Bibilia.”

 Rĩrĩa marubuku meeheririo mũthia-inĩ wa mbaara, Aira a Jehova maarĩ na kĩyo gũkĩra hĩndĩ ĩngĩ o yothe, gĩa gũteithia andũ merute ũhoro wĩgiĩ Ũthamaki wa Ngai. Mwaka-inĩ wa 1945, ciũngano ciothe bũrũri-inĩ wa New Zealand nĩ ciaamũkĩrire marũa kuuma wabici-inĩ ya rũhonge, marĩa maaugĩte ũũ: “Reke o mũndũ onanagie ũtaũku, ũrata, na wendo kwerekera andũ othe. Mwĩthemei ngucanio na ngarari. Ririkanai atĩ andũ arĩa tũhunjagĩria nĩ marĩ mawĩtĩkio mao, na nĩ merutanagĩria gũtũũra kũringana namo. . . . Aingĩ ao nĩ ‘ng’ondu’ cia Mwathani na nĩ twagĩrĩirũo kũmerekeria kũrĩ Jehova na ũthamaki wake.”

 Ũmũthĩ, Aira a Jehova bũrũri-inĩ wa New Zealand nĩ mathiaga na mbere kũheana ndũmĩrĩri ya Bibilia kũrĩ aikari a kũu, na ageni arĩa maceeraga kuo. Mũthenya ũmwe, kwa ihinda rĩa mathaa manini, Aira a Jehova 4 taũni-inĩ ya Turangi, nĩ maaririe na andũ 67, arĩa maaceerete kuuma mabũrũri 17!

 Hatarĩ nganja, andũ a New Zealand nĩ monaga atĩ Aira a Jehova nĩ Akristiano mendete thayũ, matĩĩte maũndũ marĩa Bibilia ĩrutanaga, na nĩ merutanagĩria gũtũũra kũringana namo. Andũ aingĩ nĩ mabatithagio magatuĩka Aira a Jehova o mwaka. Gũkinyĩria mwaka wa 2019, makĩria ma Aira a Jehova 14,000 nĩ maatungatagĩra Jehova marĩ na gĩkeno bũrũri-inĩ ũcio.