Agostinho, ũrĩa ũikaraga Brazil, aaugire ũũ: “Ndakũrĩire kũndũ gĩcagi-inĩ. Twarĩ athĩni mũno. Ndabatarire gũtiga gũthiĩ cukuru nĩguo thiĩ ngarute wĩra hote gũteithia famĩlĩ itũ kuona mabataro.” Agostinho eerutire gũthoma na kwandĩka arĩ na mĩaka 33. Aaugire ũũ: “Kwĩruta gũthoma na kwandĩka nĩ kwandeithirie kwĩhe gĩtĩo na kwĩyona ndĩ wa bata.”

 Agostinho nĩ ũmwe wa andũ makĩria ma 250,000 arĩa mateithĩtio nĩ Aira a Jehova kũmenya gũthoma na kwandĩka ihinda-inĩ rĩa mĩaka 70 mĩhĩtũku. Aira a Jehova marutaga andũ gũthoma na kwandĩka nĩkĩ? Andũ magunĩkĩte atĩa nĩ gĩthomo kĩu?

 Gũkinyĩria mwaka wa 1935, Aira a Jehova maahunjagia thĩinĩ wa mabũrũri 115. Nĩguo makinyĩre andũ arĩa maaragia thiomi itiganĩte, amishonarĩ maathaakaga mĩario ĩtaũrĩtwo ya Bibilia, na kũndũ kũmwe nĩ maaheanaga mabuku ma thiomi cia kũu maahunjagia. O na gũtuĩka andũ aingĩ nĩ meendaga mũno kwĩruta Bibilia, kwaga kũmenya gũthoma na kwandĩka nĩ kwagiragia amwe ao merute maũndũ.

 Nĩ ũndũ wa kũremwo gwĩthomera Bibilia o ene, andũ matiahotaga kũmenya ũrĩa mangĩhũthĩra motaaro ma Bibilia. (Joshua 1:8; Thaburi 1:2, 3) Ningĩ nĩ maaritũhagĩrũo kũhingia maũndũ ma kĩĩroho marĩa mehokeirũo. Kwa ngerekano, aciari mangĩakorirũo matoĩ gũthoma, ũngĩarĩ ũndũ mũritũ harĩ o kũruta ciana ciao. (Gũcokerithia Maathani 6:6, 7) Nao arĩa maakoretwo matuĩka Aira a Jehova mangĩakorirũo matoĩ gũthoma, matingĩahotire kũruta andũ arĩa angĩ Bibilia.

 Mĩaka-inĩ ya 1940 na 1950, Nathan H. Knorr na Milton G. Henschel, amwe a arĩa maatongoragia gatagatĩ-inĩ ka Aira a Jehova, nĩ maathiire mabũrũri-inĩ matiganĩte gũteithĩrĩria kũbanga wĩra wa kũhunjia. Mabũrũri-inĩ marĩa andũ aingĩ matooĩ gũthoma na kwandĩka, nĩ meerire wabici cia honge cia kũu ibange gũkorũo na irathi cia kũruta andũ gũthoma na kwandĩka ciũngano-inĩ.

 Wabici cia honge nĩ ciatũmĩire ciũngano ũtongoria wa kuonania ũrĩa irathi icio irĩthomithanagio. Mabũrũri-inĩ mamwe, thirikari cia kũu ciarĩ na mĩtaratara ĩrĩa ĩngĩahũthĩrirũo gũthomithania o hamwe na mabuku. Kwa ngerekano, bũrũri-inĩ wa Brazil, wabici ya rũhonge nĩ yaheirũo mabuku ma gũthoma na indo ingĩ nĩ thirikari, na igĩtwarĩrũo ciũngano. Mabũrũri-inĩ mangĩ, Aira a Jehova maabatarire gũthondeka mũtaratara wao wa gũthomithania.

 Irathi icio ciathiagwo nĩ andũ othe, arũme na atumia, andũ ethĩ na akũrũ. Muoroto warĩ gũthomithia arutwo mahote gũthoma rũthiomi rwao, o na akorũo kũngĩabatarire kũrutanwo thiomi itiganĩte kĩũngano-inĩ kĩmwe.

 Andũ magunĩkĩte atĩa kuumana na mũbango ũcio wa kũrutana gũthoma na kwandĩka? Mwarĩ wa Ithe witũ ũmwe kuuma Mexico aaugire ũũ: “Rĩu nĩ hotaga gũtaũkĩrũo nĩ Bibilia, kwoguo maũndũ marĩa ndathoma nĩ mahutagia ngoro yakwa. Kũmenya gũthoma nĩ kũndeithĩtie kũhota kwaranĩria na andũ, na nĩ hotete gũkinyĩria andũ aingĩ ndũmĩrĩri ya Bibilia.”

 Mũbango ũcio wa kũrutana gũthoma na kwandĩka to gũteithia ũteithĩtie andũ gũtaũkĩrũo nĩ Bibilia. Isaac kuuma Burundi aaugire ũũ: “Kũmenya gũthoma na kwandĩka nĩ kũndeithĩtie kwĩruta wĩra wa mĩako. Ndutaga wĩra wa mĩako, na rĩu ndũgamagĩrĩra mĩako mĩnene.”

 Jesusa kuuma Peru aambĩrĩirie kĩrathi gĩa kwĩruta gũthoma na kwandĩka arĩ na mĩaka 49. Aaugire ũũ: “Ndathiĩ thoko nĩ bataraga kuona thogora na marĩĩtwa ma indo iria ndĩrenda. Mbere-inĩ warĩ ũndũ mũritũ harĩ niĩ. No nĩ ũndũ wa kĩrathi kĩu, rĩu nĩ hotaga kũgũrĩra famĩlĩ yakwa indo na njĩra njega.”

 Ihinda rĩa mĩaka mĩingĩ, anene a thirikari kuuma mabũrũri-inĩ matiganĩte nĩ macokeirie Aira a Jehova ngatho nĩ ũndũ wa wĩra ũrĩa marutĩte wa gũteithia andũ kũmenya gũthoma na kwandĩka. Mahinda maya, Aira a Jehova no marathiĩ na mbere kũruta andũ gũthoma na kwandĩka, makĩhũthĩra mĩtaratara na indo ithiĩte ikĩagĩragio ihinda rĩa mĩaka mĩingĩ. Ningĩ nĩ mahaarĩirie na magacabithia broshua hakuhĩ milioni 224 na thiomi 720 nĩguo mateithie andũ kwĩruta gũthoma kana mateithie arĩa marĩ na gĩthomo kĩnini. *