Jehova Ngai endaga andũ othe, gũtekũmakania ũrĩa maũndũ mao mahaana, merute ũhoro wake na ũhoro wĩgiĩ Ũthamaki wa igũrũ. (1 Timotheo 2:3, 4) Nĩ ũndũ ũcio, Aira a Jehova nĩ marutaga Bibilia o hamwe na mabuku mangĩ, marĩa mangĩguna andũ aingĩ o ũrĩa kwahoteka nginya andũ arĩa matakoragwo na ũhoti wa kũigua. Ithondeka ritũ nĩ rĩrutĩte video ngiri nyingĩ cia rũthiomi rwa kwaria na ciĩko, a iria cionekaga na thiomi makĩria ma 100 cia kwaria na ciĩko. Tũhotaga atĩa kũruta na kũheana video icio? Na nĩ mogarũrũku marĩkũ twĩkĩte o ũrĩa mahinda marathiĩ?

 Video cia rũthiomi rwa kwaria na ciĩko ithondekagwo nĩ timu cia ataũri kũndũ gũtiganĩte thĩinĩ wa thĩ. Ataũri acio mambaga mageciria na njĩra ndikĩru ũhoro ũrĩa marenda gũtaũra. Macokaga mageciria njĩra ĩrĩa njega biũ ya gũtaũra ũhoro ũcio na rũthiomi rwa kwaria na ciĩko. Meka ũguo, macokaga makarekondi ũhoro ũcio video-inĩ. Ihinda-inĩ rĩrĩ, timu 60 nĩ itaũraga indo cia rũthiomi rwa kwaria na ciĩko mahinda mothe, na ingĩ 40 nĩ ciĩkaga ũguo rĩmwe na rĩmwe.

 Mahinda mahĩtũku, gũthondeka video cia rũthiomi rwa kwaria na ciĩko kwahũthagĩra mbeca nyingĩ mũno. Kamera cia kuoya video na indo ingĩ iria ciabataranagia ciarĩ na goro mũno gũkĩra ũrĩa irĩ ũmũthĩ. Ningĩ video icio ciarekondagĩrũo thĩinĩ wa studio, na kwoguo twabataraga gwaka studio icio, kana gũthondeka nyũmba iria twĩ nacio ituĩke studio. Gwabataranagia makĩria ma dola 30,000 b nĩguo timu ĩmwe ya rũthiomi rwa kwaria na ciĩko ĩkorũo na kĩrĩa gĩothe ĩrabatara.

 Nĩguo ithondeka rĩhũthĩre mĩhothi wega, nĩ rĩkoretwo rĩgĩciria ũrĩa rĩngĩagagĩria na rĩhũthie njĩra cia ũtaũri. Kwoguo nĩ twambĩrĩirie kũhũthĩra indo cia kĩĩrĩu iraruta wĩra wega na itarĩ na goro. Handũ ha gũkorũo na studio, ataũri nĩ mahotaga kũrekondera video wabici-inĩ ciao makĩhũthĩra kĩndũ gĩtagwo green screen na ũguo nĩ kuuga magathondeka harĩa mararekondera hagakorũo na rangi wa ngirini thutha wao. Video ĩngĩkorũo nĩ ĩrabatara andũ aingĩ, arĩa mararekondwo no marekondere o wabici-inĩ ciao kana kwao mũciĩ na to mũhaka mathiĩ studio.

 Ningĩ nĩ tũrutĩte programu cia kompiuta iria iteithagia ataũri a thiomi cia kwaria na ciĩko kũruta wĩra wao. Ũndũ ũcio nĩ ũteithĩtie ataũri makahota kũruta indo cia rũthiomi rwa kwaria na ciĩko na nuthu ya ihinda rĩrĩa maahũthagĩra hau mbere-inĩ. Ariũ a Ithe witũ nĩ makeneire ũndũ ũcio mũno. Mũrũ wa Ithe witũ wĩtagwo Alexander aaugire ũũ: “Rĩu nĩ kũrutagwo video nyingĩ cia rũthiomi rwa kwaria na ciĩko gũkĩra hau mbere-inĩ. Nĩ ngenagio mũno nĩ ũndũ ũcio. Ndĩroragĩra video icio o mũthenya.”

 Mahinda maya, tũhũthagĩra dola itakinyĩte 5,000 kũgũra indo iria timu ya ataũri ĩbataraga. Nĩ ũndũ ũcio, nĩ tũhotaga kũruta video cia rũthiomi rwa kwaria na ciĩko na thiomi nyingĩ makĩria.

 Ataũri marĩkia gũtaũra video icio, nĩ ciagĩrĩirũo gũkinyĩra arĩa maracibatara. Mahinda mahĩtũku, video icio ciarutagwo kũgerera kaseti na DVD na ũndũ ũcio wabataraga mbeca nyingĩ, mahinda maingĩ, na wĩra mũingĩ. Twabataraga kũrĩha kambuni nĩguo irutithie kaseti na DVD icio. Ciacokaga igatwarũo ciũngano-inĩ. Mwaka wa 2013 wiki, twahũthĩrire makĩria ma dola 2,000,000 kũruta video cia rũthiomi rwa kwaria na ciĩko.

 Andũ arĩa matarĩ ũhoti wa kũigua nĩ maakenagĩra video icio mũno. O na kũrĩ ũguo, ndwarĩ ũndũ mũhũthũ kũhũthĩra indo icio, tondũ kaseti na DVD ciathiaga o ikĩongererekaga. Rĩmwe na rĩmwe, kũrekondi ibuku rĩmwe tu rĩa Bibilia kwabataraga DVD cigana ũna. Mũrũ wa Ithe witũ ũmwe kuuma Brazil wĩtagwo Gilnei aaugire ũũ: “Tũngĩendire gũthoma rĩandĩko, twabataraga kũmenya rĩrĩ thĩinĩ wa kaseti ĩrĩkũ na thutha ũcio tũgetha harĩa rĩrĩ kaseti-inĩ ĩyo. Warĩ wĩra mũritũ mũno.” Mwarĩ wa Ithe witũ wĩtagwo Rafayane ũrĩa wahũthagĩra DVD icio aaugire: “Warĩ wĩra mũritũ gwĩka wĩruti witũ. Twahũthagĩra mahinda maingĩ tũgĩetha maandĩko na mabuku marĩa magwetetwo.” Na kaingĩ rĩrĩa aarĩ na ariũ a Ithe witũ marĩ ũtungata-inĩ, maathiaga makuuĩte DVD na kaseti icio nĩguo macithaake TV-inĩ ya mũndũ wonania wendi. Aarĩ na ariũ a Ithe witũ amwe o na nĩ maakuuaga indo ciao cia gũthaaka DVD. Thutha wa ihinda, nĩ kwambĩrĩirie kũgĩa na indo ingĩkuuĩka na njĩra hũthũ cia gũthaaka DVD na ariũ a Ithe witũ aingĩ makĩgĩa nacio. Bobby ũrĩa ũikaraga Amerika (US) aaugire ũũ: “Ũngĩarĩkirie gũthoma rĩandĩko rĩmwe na wende gũthoma rĩandĩko rĩngĩ, wabataraga kwamba gũcenjia DVD. Ũndũ ũcio woyaga mahinda maingĩ, na ũgatũma hakorũo harĩ haritũ kũhũthĩra Bibilia ndeereti-inĩ.”

 Mwaka wa 2013, ithondeka rĩa Jehova nĩ rĩarutire programu ya JW Library Sign Language ĩrĩa ĩteithagia aarĩ na ariũ a Ithe witũ kũgĩa na gũthaaka video cia rũthiomi rwa kwaria na ciĩko thimũ-inĩ ciao. Programu ĩyo yambire kũrutwo na Rũthiomi rwa Kwaria na Ciĩko rwa Amerika. Na thutha-inĩ mwaka wa 2017, ĩkĩagagĩrio nĩguo ĩkorũo na thiomi ciothe cia kwaria na ciĩko. Aarĩ na ariũ a Ithe witũ thĩinĩ wa thĩ nĩ maakenire mũno. Mũrũ wa Ithe witũ Juscelino kuuma Brazil aaugire ũũ: “Nĩ ndakenire mũno! Ndaikaraga ngĩĩciragia ũrĩa Kĩama Kĩrĩa Gĩtongoragia gĩtuonagia wendo ithuĩ andũ arĩa tũtakoragwo na ũhoti wa kũigua na ũrĩa kĩendaga tũthiĩ na mbere gũkũra kĩĩroho o ta andũ arĩa makoragwo na ũhoti wa kwaria. Ũndũ ũcio nĩ wanjanjamũrire mũno na ũkĩnjĩkĩra ngoro gũthomaga Bibilia makĩria.”

 Ũmũthĩ, twĩkĩraga video ciothe cia rũthiomi rwa kwaria na ciĩko thĩinĩ wa website itũ na thĩinĩ wa programu ya JW Library Sign Language. Kwoguo, rĩu nĩ tũhotaga gũtaũra, kũrekondi, na gũkinyĩria andũ indo cia rũthiomi rwa kwaria na ciĩko na thikũ nini tu handũ ha mĩeri kana mĩaka. O na thiomi cia kwaria na ciĩko nĩ ihotaga kũruta video ihinda-inĩ o rĩmwe na thiomi ici ingĩ.

 Reke tuone ciugo cia aarĩ na ariũ a Ithe witũ amwe arĩa matakoragwo na ũhoti wa kũigua. Mwarĩ wa Ithe witũ ũmwe wĩtagwo Klízia aaugire: “Nĩ ithondeka rĩrĩkũ rĩngĩ rĩrũmbũyagia arĩa matakoragwo na ũhoti wa kũigua na rĩkamateithia kuona irio cia kĩĩroho na njĩra hũthũ ũguo? Gũtirĩ ũndũ ũngĩ thĩinĩ wa thĩ ũngĩringithanio na ũrĩa ithondeka rĩa Jehova rĩtũrũmbũyagia.” Nake Vladimir aaugire: “Video icio nĩ cindeithagia kuona atĩ Jehova nĩ arũmbũyagia andũ arĩa matakoragwo na ũhoti wa kũigua o ta ũrĩa arũmbũyagia arĩa marĩ ũhoti wa kũigua.”

 Video citũ cia rũthiomi rwa kwaria na ciĩko kaingĩ cikoragwo na ciugo ici: “Ĩrutĩtwo ĩrĩ gĩcunjĩ kĩa wĩra wa thĩ yothe wa kũruta andũ Bibilia ũrĩa ũtwarithagio na mbere nĩ mĩhothi ya kwĩyendera.” Nĩ tũragũcokeria ngatho mũno nĩ ũndũ wa mĩhothi yaku, ĩrĩa kaingĩ ĩrutagwo kũgerera donate.pr418.com. Mĩhothi ĩyo nĩ ĩtũteithagia kũruta Bibilia, na indo ingĩ cia gũteithĩrĩria andũ othe kwĩruta Bibilia, nginya arĩa matakoragwo na ũhoti wa kũigua.