Video cia igomano cia thikũ ithatũ nĩ itũhutagia ngoro na igatũteithia gũtaũkĩrũo nĩ morutani ma Bibilia. Kĩgomano gĩa Thikũ Ithatũ kĩa 2020 gĩa ‘Kenagai Hingo Ciothe’! kĩarĩ na video 114, o hamwe na mĩario 43 ĩrĩa yarutirũo nĩ ariũ a Ithe witũ a Kĩama Kĩrĩa Gĩtongoragia na ateithia ao. Hihi ũrĩ weyũria nĩ kĩyo na mbeca cigana atĩa ibataranagia nĩguo video icio ithondekwo?

 Aarĩ na ariũ a Ithe witũ hakuhĩ 900 kuuma kũndũ gĩtiganĩte thĩinĩ wa thĩ nĩ meerutĩire kũhũthĩra mahinda na ũhoti wao kũhaarĩria programu ĩyo. Maahũthĩrire mathaa ta 100,000 kwa ihinda rĩa makĩria ma mĩaka ĩĩrĩ wĩra-inĩ ũcio. Harĩ mathaa macio, mathaa 70,000 maahũthĩrirũo kũhaarĩria video ya ndagĩka 76 ya rũgano rwa Bibilia ya Nehemia: “Gĩkeno Kĩrĩa Kiumaga Kũrĩ Jehova Nĩkĩo Mwĩgitio Wanyu.”

 Hatarĩ nganja, nĩ kwahũthĩrirũo mbeca nyingĩ kũrũmbũiya mabataro ma erutĩri acio na kũmahe indo iria maabataraga nĩguo mahote kũrĩkia wĩra ũcio.

 Jared Gossman, ũrĩa ũrutaga wĩra na Rũhonge rwa Video ooigire ũũ: “Kamĩtĩ ya Ũrutani ya Kĩama Kĩrĩa Gĩtongoragia nĩ yendaga video citũ cionanie ũndũire ngũrani na kũndũ gũtiganĩte. Gĩtũmi nĩ tondũ tũkoragwo tũrĩ famĩlĩ ya aarĩ na ariũ a Ithe witũ thĩinĩ wa thĩ yothe, na nĩ twendaga video citũ cionanie ũndũ ũcio. Nĩguo mahingie muoroto ũcio, nĩ kwahũthĩrirũo timu 24 kuuma mabũrũri 11 kũhaarĩria video cia kĩgomano. Gũkorũo na andũ kuuma kũndũ gũtiganĩte thĩinĩ wa thĩ makĩrutithania wĩra nĩ kũbataraga mbeca nyingĩ na mĩbango mĩnene.”

 Ningĩ video citũ nyingĩ nĩ ibataraga indo cia mwanya cia kuoya video na gũthaaka. Kwa ngerekano, indo cia gũthaaka video ya Nehemia: “Gĩkeno Kĩrĩa Kiumaga Kũrĩ Jehova Nĩkĩo Mwĩgitio Wanyu” ciathondekeirũo studio-inĩ ya Mt. Ebo hakuhĩ na Patterson, New York, Amerika (US). Nĩguo mĩhothi ĩhũthĩrũo wega na video ĩyo yonanie ũrĩa kwahaanaga tene, ariũ a Ithe witũ maathondekire thingo hũthũ ciahaanaga ta thingo cia Jerusalemu. O rũthingo rwathondeketwo na mbaũ ciarĩ na ũraihu wa mita 6 (fiti 20) igacoka igekĩrũo muto ũcoretwo ũndũ ũkũhaana ta mahiga. “Thingo” icio ciathondeketwo ũndũ ingĩarutanirio na ihũthĩke gũthaaka icunjĩ itiganĩte cia video, na ũndũ ũcio nĩ watũmire itikabataranie nyingĩ. O na kũrĩ ũguo, hakuhĩ dola 100,000 (cia Amerika) nĩ ciahũthĩrirũo gũthondeka indo cia video ĩyo ĩrĩ iki. a

 Kũmenya maũndũ macio nĩ kũratũma tũkorũo na ngatho mũno nĩ ũndũ wa kĩgomano gĩa thikũ ithatũ kĩa mwaka ũyũ. Tũrĩ na ma atĩ kĩyo kĩrĩa gĩekĩrirũo harĩ kũhaarĩria programu ĩno nĩ gĩkũrehera Jehova rũgooco. Nĩ ngatho nĩ ũndũ wa mĩhothi yanyu ya wĩra wa thĩ yothe kũgerera donate.pr418.com na njĩra ingĩ.