Mwarĩ wa Ithe witũ ũmwe mwĩthĩ wĩtagwo Nicole kuuma Colombia aaugire ũũ: “Nĩ nyendete Nyũmba itũ ya Ũthamaki. Nĩkuo tũcemanagia hamwe na famĩlĩ itũ ya kĩĩroho.” Hihi o nawe noguo ũiguaga?

 Gũkoragwo na Nyũmba cia Ũthamaki ta 63,000 kũndũ gũtiganĩte thĩinĩ wa thĩ, kũrĩa Aira a Jehova macemanagĩria. Nyũmba icio ikoragwo irĩ kũndũ kwega gwa gũthathaĩria Ngai. No nĩ harĩ ũndũ ũngĩ ihingagia. Painia ũmwe wa hĩndĩ ciothe wĩtagwo David kuuma Colombia aaugire ũũ: “Nyũmba itũ ya Ũthamaki nĩ ĩgoocithagia ũrutani witũ. Ageni aingĩ nĩ magegaga nĩ kuona ũrĩa tũmĩigaga ĩrĩ theru.” No ũndũ ũcio ndwĩrehaga o ũguo. Nĩ twĩrutanagĩria gũtheria na kũmenyerera Nyũmba citũ cia Ũthamaki. Tũhotaga atĩa kũruta wĩra ũcio?

 Ciũngano iria ihũthagĩra Nyũmba ya Ũthamaki nĩcio ikoragwo na ũigĩrĩrĩki wa kũmĩmenyerera. Nĩguo meke ũguo, aarĩ na ariũ a Ithe witũ nĩ matheragia Nyũmba yao ya Ũthamaki kaingĩ. Ningĩ nĩ mekaga maũndũ ma kũgirĩrĩria ndĩgathũke na makamĩthondeka kũrĩa yagĩa na tũmathĩna tũnini.

 Nĩguo ciũngano imenye ũrĩa ikũmenyerera Nyũmba cia Ũthamaki, Rũhonge rwa Gũcora/Mĩako nĩ rwamũraga ariũ a Ithe witũ a kũrutana mawĩra macio. Mũrũ wa Ithe witũ ũmwe agayagĩrũo Nyũmba cia Ũthamaki ithathatũ nginya ikũmi cia kũrũmbũiya. Aciceeragĩra na akamenyeria ahunjia ciũngano-inĩ ũrĩa mangĩmenyerera Nyũmba ciao cia Ũthamaki. O thutha wa mĩaka ĩtatũ nĩ aceeragĩra Nyũmba ya Ũthamaki, na akarora kũrĩa kũngĩkorũo kũrĩ ũgwati kana kũrĩa kũrabatara gũthondekwo.

 Aarĩ na ariũ a Ithe witũ nĩ maiguaga makenete nĩ ũndũ wa kũmenyerio nĩ ariũ a Ithe witũ acio. Mwarĩ wa Ithe witũ Indhumathi kuuma India aaugire ũũ: “Nĩ twakenire mũno nĩ kũrutwo ũrĩa tũngĩiga Nyũmba itũ ya Ũthamaki ĩrĩ njega.” Nake mũrũ wa Ithe witũ Evans kuuma Kenya aaugire ũũ: “Nĩ twerutire ũrĩa tũngĩĩthema kũhũthĩra mbeca nyingĩ na njĩra ya gũthondeka tũmathĩna tũnini tũtanatuĩka mathĩna manene.”

 O mwaka, ngarama cia kũhũthĩra na kũmenyerera Nyũmba ya Ũthamaki no ikorũo irĩ dola a magana maingĩ kana ngiri nyingĩ, gũkĩringana na kũrĩa nyũmba ĩyo ĩrĩ, ũkũrũ wayo, na mũigana wa ciũngano iria imĩhũthagĩra. Ngarama icio irũgamagĩrĩrũo atĩa?

 Wĩra wa kũmenyerera Nyũmba ya Ũthamaki ũrũgamagĩrĩrũo nĩ mĩhothi. Mũrũ wa Ithe witũ Alexander kuuma Kazakhstan aataarĩirie akiuga ũũ: “Mbeca imwe ihũthagĩrũo kũrĩhĩra intaneti na indo ingĩ ta maĩ na thitima. Nacio ingĩ ihũthagĩrũo kũgũra tissue, gloves, indo cia gũtheria, na rangi.” Mbeca iria ciatigara ihothagwo kũrĩ wĩra wa thĩ yothe, nĩguo iteithĩrĩrie mawĩra-inĩ manene ma kũmenyerera Nyũmba cia Ũthamaki marĩa mangĩbatara mbeca nyingĩ, kũndũ gũtiganĩte thĩinĩ wa thĩ.

 Angĩkorũo mbeca iria ikũhũthĩrũo gũthondeka Nyũmba ya Ũthamaki nĩ makĩria ma iria kĩũngano kĩhũthagĩra kũmĩmenyerera ihinda-inĩ rĩa mĩeri ĩĩrĩ kana ĩtatũ, athuri a kĩũngano maranagĩria na mũrũ wa Ithe witũ ũrĩa wamũrĩtwo nĩ rũhonge rwa mĩako arũmbũyagie nyũmba ĩyo. Rũhonge rwa mĩako rũngĩheana rũtha wĩra ũcio ũrutwo, ũrũgamagĩrĩrũo nĩ mĩhothi ya wĩra wa thĩ yothe. Mwaka wa ũtungata wa 2023, nĩ kwarutirũo mawĩra 8,793 ta macio, na kwahũthĩrirũo dola milioni 76.6. Reke tuone ngerekano igĩrĩ cia kũndũ kwarutirũo mawĩra macio.

 Bũrũri-inĩ wa Angola, nyũmba ĩmwe ya ũthamaki ĩrĩ na mĩaka 15 yarĩ na mathĩna maigana ũna. Mĩtambo ya thitima nĩ yabataraga gũcenjio, thingo ciarĩ na mĩatũka, na arĩa maikaraga hakuhĩ nayo maaugire atĩ maĩ maaumaga kuo makaingĩra mĩciĩ-inĩ yao. Rũhonge rwa mĩako nĩ rwabangire ũrĩa mathĩna macio megũthondekwo. Mbeca iria ciahũthĩrirũo ciarĩ dola 9,285. Arĩa maikaraga hakuhĩ na nyũmba ĩyo ya ũthamaki nĩ maakenirio nĩ ũrĩa wĩra ũcio warutirũo wega.

 Bũrũri-inĩ wa Poland, Nyũmba ya Ũthamaki nĩ yauraga, na mũgeka nĩ wabataraga gũcenjio. Rũhonge rwa mĩako nĩ rwaheanire rũtha rwa gwĩkĩra kĩndũ gĩkũgirĩrĩria nyũmba ĩyo kuura na gũcenjia mũgeka. Wĩra ũcio wahũthĩrire dola 9,757. Nĩ ũndũ ũcio, nyũmba ĩyo ndĩkũbatara wĩra mũnene wa kũmĩcokereria kwa ihinda rĩa mĩaka ĩigana ũna.

 Wĩra wa kũmenyerera Nyũmba cia Ũthamaki to kũhonokia ũhonokagia mĩhothi, no ningĩ nĩ ũgoocithagia Jehova. Mũrũ wa Ithe witũ Shaun kuuma Tonga aaugire ũũ: “Nĩ ũndũ wa ũrĩa tũmenyagĩrĩra Nyũmba ya Ũthamaki, nĩ tũthathayagĩria Jehova handũ hatheru na habacĩrĩru, na nĩ ĩgoocithagia rĩĩtwa rĩake itũũra-inĩ. Nĩ tũiguaga tũkenete tũkĩnyita andũ ũgeni moke Nyũmba-inĩ itũ ya Ũthamaki.”

 Ithuothe no tũteithĩrĩrie gũtheria na kũmenyerera kũrĩa tũthathayagĩria. Marino, ũrĩa ũrutanaga mawĩra ma kũmenyerera Nyũmba cia Ũthamaki bũrũri-inĩ wa Australia, aaugire ũũ: “Ithuothe no tũnyitanĩre wĩra-inĩ ũyũ wa mwanya wa kũmenyerera Nyũmba cia Ũthamaki. Rĩrĩa tweka ũguo, tũkoragwo tũkĩhonokia mĩhothi itũ, nĩgetha ĩhũthĩke kũrĩa kwĩna ũbataro mũnene.”

 Mũrũ wa Ithe witũ Joel kuuma India nĩ akenaga kũruta wĩra wa kũmenyerera nyũmba yao ya ũthamaki. Aaugire ũũ: “Kũrutithania wĩra na aarĩ na ariũ a Ithe witũ nĩ kũndeithagia kũhũũra mbica ũrĩa gũgaakorũo thĩinĩ wa thĩ njerũ.” Nicole, ũrĩa ũkũgwetetwo hau igũrũ, aaugire ũũ: “Ica ikuhĩ nĩ ndĩrateithĩrĩirie kũhuura maĩ thĩ ariũ a Ithe witũ magĩthondeka handũ harauraga mabati-inĩ ma cioro. O na gũtuĩka ndiathondekire hau haauraga, nĩ ndateithĩrĩirie kũgirĩrĩria ũgwati.”

 Angĩkorũo no wende kwĩrutĩra gũteithia wĩra wa kũmenyerera nyũmba yanyu ya ũthamaki, aranĩria na athuri a kĩũngano kĩanyu. Makĩria ma ũguo, mĩhothi ĩrĩa ũrutaga nĩ ĩteithagĩrĩria kũmenyerera nyũmba yanyu ya ũthamaki, o hamwe na ingĩ kũndũ gũtiganĩte thĩinĩ wa thĩ. No ũikie mũhothi mathandũkũ-inĩ ma mĩhothi nyũmba-inĩ yanyu ya ũthamaki kana ũrute kũgerera donate.pr418.com. Nĩ ngatho mũno nĩ ũndũ wa ũtaana waku.