Kĩgomano gĩa thikũ ithatũ kĩa 2020 kĩarĩ kĩa mwanya tondũ nĩkĩo kĩarĩ kĩa mbere kũrekondwo na gwĩkĩrũo Intaneti-inĩ nĩguo kĩonwo thĩinĩ wa thĩ yothe. O na kũrĩ ũguo, aarĩ na ariũ a Ithe witũ bũrũri-inĩ wa Malawi na Mozambique meeroreire na magĩthikĩrĩria kĩgomano kĩu matekũhũthĩra Intaneti. Ũndũ ũcio wahotekire atĩa?

 Kamĩtĩ ya Atabarĩri na Kamĩtĩ ya Ũrutani ya Kĩama Kĩrĩa Gĩtongoragia nĩ ciaheanire rũtha rwa mwanya igĩtĩkĩria kĩgomano kĩu kĩmemerekio kũgerera TV na redio bũrũri-inĩ wa Malawi na Mozambique. Ũndũ ũcio warĩ wa bata mũno nĩkĩ? Bũrũri wa Malawi nĩ ũmwe wa mabũrũri marĩa Intaneti ĩkoragwo na goro mũno thĩinĩ wa thĩ, na kwoguo no Aira a Jehova anini tu mangĩhota kuona Intaneti. Mũrũ wa Ithe witũ William Chumbi wa Kamĩtĩ ya Wabici ya Rũhonge ya Malawi agĩtaarĩria ũndũ ũcio aaugire ũũ: “Redio na TV nocio tu njĩra iria ingĩahũthĩkire gũkinyĩria aarĩ na ariũ a Ithe witũ irio icio cia kĩĩroho.” Luka Sibeko ũrĩa o nake ũtungataga thĩinĩ wa Kamĩtĩ ya Wabici ya Rũhonge ya Malawi aaugire ũũ: “Ũndũ ũcio ũngĩagire kũhoteka kũgerera TV na redio, no ariũ a Ithe witũ anini tu gĩcigo-inĩ kĩa wabici itũ ya rũhonge mangĩahotire kuona kĩgomano kĩu.” Nakuo bũrũri-inĩ wa Mozambique, to thĩna wa Intaneti tu kwarĩ naguo, ĩndĩ no ariũ a Ithe witũ anini tu mangĩahotire kũgũra indo ta thimũ cia kwĩrorera kĩgomano.

 Nĩ ũndũ wa kĩngʼũki kĩa mũrimũ wa COVID-19, nĩ kũrĩ ceceni cia TV na redio ciakoretwo ciambĩrĩria kũmemerekia mĩcemanio ya kĩũngano. a Ariũ a Ithe witũ nĩ maaririe na ceceni icio magĩciũria kana no mongererũo ihinda rĩa kũmemerekia nĩguo mahote kũmemerekia kĩgomano kĩu.

 Bũrũri-inĩ wa Malawi, ariũ a Ithe witũ maarĩ na thĩna ũmwe. Kaingĩ ceceni cia ũmemerekia kũu iheaga customer a cio ithaa rĩmwe tu rĩa kũmemerekia. Kũringana na ceceni icio, programu ĩngĩraiha mũno andũ no mamboeke matige gũthikĩrĩria kana kwĩrorera. No ariũ a Ithe witũ nĩ maamataarĩirie atĩ wĩra witũ nĩ wa gũteithia mũingĩ. Na makĩmeera atĩ o na mahinda-inĩ maya kũrĩ na mũrimũ, no tũrahe andũ ndũmĩrĩri ya kũmomĩrĩria kuuma Bibilia-inĩ ĩrĩa ĩngĩmateithia gũtuĩka andũ ega na gũkorũo na ũtũũro wa famĩlĩ ũrĩ na gĩkeno. Rĩrĩa ceceni icio ciaiguire ũguo, nĩ cietĩkĩrire kuongerera ariũ a Ithe witũ ihinda.

 Bũrũri-inĩ wa Malawi, kĩgomano kĩamemerekirio ceceni-inĩ ĩmwe ya TV na ĩmwe ya redio iria ikinyagĩra andũ milioni nyingĩ bũrũri-inĩ ũcio wothe. Nakuo Mozambique, kĩamemerekirio ceceni-inĩ ĩmwe ya TV na ceceni-inĩ 85 cia redio.

 Mabũrũri-inĩ macio merĩ, nĩ kwahũthĩrirũo dola 28,227 b kũmemerekia kĩgomano kĩu kũgerera TV na hakuhĩ dola 20,000 kũmemerekia kũgerera redio. Ceceni nini cia redio ciarĩhagia kĩndũ dola 15 nacio iria ithikagĩrĩrio bũrũri wothe ikarĩhia dola ta 2,777.

 Ariũ a Ithe witũ nĩ meekire ũrĩa wothe mangĩhota nĩguo mahũthĩre mĩhothi wega. Kwa ngerekano, bũrũri-inĩ wa Malawi, nĩ maaririe na ceceni icio igĩtĩkĩra kũgũithagũithia marĩhi, na ceceni ĩmwe nĩ yetĩkĩrire kũmagũithĩria na gĩcunjĩ kĩa 30 harĩ igana. Mbeca iria ciothe maanyihanyihĩirio cionganĩrĩrio ciakinyire dola 1,711. Bũrũri-inĩ wa Mozambique, ceceni imwe cietĩkĩrire kũnyihanyihia marĩhi tondũ ariũ a Ithe witũ nĩ moĩkaine atĩ makoragwo marĩ ehokeku na maticeragĩrũo kũrĩha.

 Ariũ a Ithe witũ nĩ maakenire mũno nĩ ũndũ wa kwĩrorera na gũthikĩrĩria kĩgomano thĩinĩ wa TV na redio-inĩ. Mũthuri ũmwe wa kĩũngano wĩtagwo Patrick kuuma Malawi aaugire ũũ: “Nĩ tũracokeria ngatho ariũ a Ithe witũ a Kĩama Kĩrĩa Gĩtongoragia nĩ ũndũ wa gũtwĩciria na njĩra ĩyo ya mwanya ihinda-inĩ rĩrĩ kũrĩ na mũrimũ.” Nake Isaac kuuma Malawi aaugire: “Tũtirĩ na indo tũngĩhũthĩra kwĩrorera kana gũthikĩrĩria nacio kĩgomano, kwoguo nĩ twakenire mũno nĩ mũbango ũcio wa ithondeka rĩa Jehova wa kũbanga nĩguo tũthikĩrĩrie kũgerera redio. Mũbango ũcio nĩ wateithirie famĩlĩ yakwa yothe kũgunĩka kuumana na kĩgomano kĩu. Ũndũ ũcio nĩ watuonirie atĩ Jehova nĩ endete andũ ake.”

 Mũhunjia ũmwe wa kĩũngano bũrũri-inĩ wa Mozambique ndaumĩte athiĩte kĩgomano kĩngĩ mbere ya kĩu kĩa 2020. Aaugire ũũ: “Mũbango ũcio wa kwĩrorera kĩgomano kũgerera TV wanyonirie wega atĩ Jehova nĩ Mwene-Hinya-Wothe. Gũkorũo kũrĩ na mũrimũ gũtiamũgiririe atũhe irio cia kĩĩroho nginya twĩ gwitũ mũciĩ. Ningĩ nĩ ndoonire ũrĩa andũ a Jehova mendanĩte. Rĩu ndĩ na ma biũ atĩ ĩno nĩyo ndini ya ma.”

 Mũthuri wa kĩũngano wĩtagwo Wyson aaugire ũũ: “No nyende gũcokia ngatho nĩ ũndũ wa ũrĩa ngombo ĩrĩa njĩhokeku ĩtũrũmbũĩtie ihinda-inĩ rĩrĩ rĩa corona. Mũbango ũcio wa kũmemerekia kĩgomano kũgerera redio na TV nĩ ũteithĩtie aingĩ aitũ arĩa tũtarĩ na mbeca nyingĩ gũkinyĩrũo nĩ kĩgomano kĩu na kũgunĩka kuumana nakĩo.”

 O na mwaka ũyũ wa 2021, Kamĩtĩ ya Atabarĩri na Kamĩtĩ ya Ũrutani nĩ iheanĩte rũtha rwa mwanya rwa kũmemerekia kĩgomano gĩa thikũ ithatũ kũgerera TV na redio. Tũhotaga atĩa kuona mbeca cia ũmemerekia ũcio wa kĩgomano? Nĩ kũgerera mĩhothi ya wĩra wa thĩ yothe, ĩrĩa ĩrutagwo kũgerera njĩra itiganĩte iria cionanĩtio thĩinĩ wa donate.pr418.com. Nĩ ngathoi mũno nĩ ũndũ wa mĩhothi yanyu.