Jehova nĩ endete kũruta andũ ake. Nĩ ũndũ ũcio, ithondeka rĩake nĩ rĩhaarĩirie cukuru cigana ũna cia kũmenyeria arutwo kũhingia ũtungata wao. Ĩmwe ya cukuru icio nĩ Cukuru ya Ahunjia a Ũthamaki (SKE). Mĩaka-inĩ ya ica ikuhĩ, ithondeka rĩa Ngai rĩtikoretwo rĩkĩagagĩria o mathomo tu, no nĩ nginya mĩako ĩrĩa cukuru icio ciĩkagĩrũo. Muoroto mũnene nĩ gũtũma arutani makenere kũrutana, na arutwo makenere gũthoma. Hihi mĩhothi yaku ĩrateithĩrĩria atĩa kũhingia muoroto ũcio?

 Kwa ihinda rĩa mĩaka mĩingĩ, cukuru cia ithondeka ikoretwo igĩkĩrũo Nyũmba-inĩ cia Ũthamaki na Nyũmba-inĩ cia Igomano. No hihi nĩ kĩĩ gĩtũmĩte ica ikuhĩ twake kana tũcokererie mĩako ĩigana ũna, ĩrĩa rĩu ĩrahũthĩrũo na maũndũ ma cukuru cia ithondeka tu? Reke twarĩrĩrie itũmi ithatũ.

 Bata mũnene. Christopher Mavor, mũteithia wa Kamĩtĩ ya Ũtungata ya Kĩama Kĩrĩa Gĩtongoragia aataarĩirie akiuga: “Wabici cia honge nĩ ciugĩte atĩ nĩ irabatara aarĩ na ariũ a Ithe witũ makĩria a gũteithĩrĩria ũtungata-inĩ. Kwa ngerekano, mwaka wa 2019, wabici ya rũhonge ya Brazil, yaugire atĩ nĩ kwabataranagia andũ angĩ ta 7,600 arĩa marĩkĩtie cukuru ya SKE, a gũteithĩrĩria gĩcigo-inĩ kĩa wabici yao ya rũhonge.” Nayo wabici ya rũhonge ya Amerika (US), yugĩte atĩ nĩ kũrĩ na bata mũnene wa mapainia arĩa marĩ na ũhoti wa kũmenyeria ahunjia arĩa angĩ mahunjio-inĩ ma mwanya, ta taũni-inĩ kũndũ kwa mũingĩ, icukĩro-inĩ cia meri, na njera-inĩ. Ningĩ kũrĩ na bata mũnene wa ariũ a Ithe witũ a gũtungata Rũhonge-inĩ rwa Gũcora/Mĩako na Kamĩtĩ-inĩ cia Ũiguano na Thibitarĩ. Arĩa mathiĩte cukuru ya SKE no mateithĩrĩrie maũndũ-inĩ ta macio.

 Andũ aingĩ kũiyũria fomu. Wabici nyingĩ cia honge nĩ ciamũkĩrĩte fomu nyingĩ gũkĩra mũigana wa arutwo arĩa mangĩhota gwĩta ihinda-inĩ rĩrĩ. Kwa ngerekano, wabici ya rũhonge ya Brazil yaamũkĩrire fomu 2,500 cia arutwo arĩa meendaga gũthiĩ SKE ihinda-inĩ rĩa mwaka ũmwe. No tondũ matiarĩ na kũndũ kũiganu gwa gwĩkĩra cukuru ĩyo, wabici ĩyo ĩngĩahotire gwĩta arutwo o 950 tu.

 Kũndũ kwega gwa gũikara. Rĩrĩa arutwo marathomera Nyũmba-inĩ ya Ũthamaki kana Nyũmba-inĩ ya Kĩgomano, kaingĩ maikaraga mĩciĩ-inĩ ya aarĩ na ariũ a Ithe witũ arĩa marĩ hakuhĩ. Mũbango ũcio nĩ ũrutaga wĩra wega mabũrũri-inĩ marĩa gũtakoragwo na irathi nyingĩ o mwaka. No kũrĩa gwĩkagwo irathi nyingĩ, ahunjia a kũu no maremwo kũhe arutwo gwa gũikara ihinda rĩa mĩeri mĩingĩ mwaka-inĩ ũmwe. Kwoguo nĩ gwethagwo nyũmba cia gũikarũo hakuhĩ na cukuru, na nyũmba icio ithondekagwo ũndũ arutwo megũkenera gũikara kuo.

 Nyũmba ĩrĩ na kĩrathi kĩmwe, na ĩngĩikarũo nĩ arutani na arutwo ta 30, na ĩrĩ na kũndũ gwa gwĩkĩra maũndũ mangĩ arutwo na arutani mangĩbatara gwĩka, no yume dola milioni cigana ũna cia Amerika, kũringana na kũrĩa ĩrĩ na maũndũ mangĩ.

 Cukuru ciakagwo kũndũ kũhooreru nja wa taũni nene, na kũndũ kũrĩ hakuhĩ na ngaari cia ũkuui cia mũingĩ. Nĩ kwendekanaga kũndũ kũrĩ na ahunjia aingĩ arĩa mangĩteithĩrĩria mawĩra matiganĩte kũu cukuru-inĩ na kũmenyerera nyũmba ya cukuru na indo ciayo.

 Cukuru gũkoragwo na library, kũndũ gwa gũthomera, kompiuta, macini cia gũcaba, na indo ingĩ. Kũndũ kũingĩ nĩ gũkoragwo na rumu ya kũrĩĩra kũrĩa arutwo na arutani marĩagĩra hamwe. Ningĩ, nĩ gũkoragwo na kũndũ mangĩkĩra maũndũ ma kũmenyeria mwĩrĩ na gwa kũhurũka.

 Kĩrathi nĩ gĩthondekagwo na njĩra ya mwanya. Troy, ũrĩa ũrutaga wĩra na Rũhonge rwa Gũcora/Mĩako rwa Thĩ Yothe thĩinĩ wa Warwick, New York aataarĩirie akiuga: “Nĩ twaranĩirie na Rũhonge rwa Cukuru cia Gĩtheokrasi, nĩguo matũteithĩrĩrie tũhote gwaka irathi iria irĩtũmaga arutwo makenere gũthoma na njĩra njega. Nĩ maatũheire motaaro megiĩ ũrĩa kĩrathi kĩagĩrĩire gũkorũo kĩigana, ũrĩa kĩbatiĩ kũbangwo, ũtheri ũrĩa kĩbatiĩ gũkorũo naguo, na indo cia video na mĩgambo iria kĩbatiĩ gũkorũo nacio.” Akĩaria ũhoro wĩgiĩ gwĩkĩra indo cia mĩgambo, Zoltán, mũrutani ũmwe wa SKE kuuma Hungary, aaugire: “Kĩambĩrĩria-inĩ, tũtiarĩ na maikoroboni, kwoguo twatindaga tũkĩririkania arutwo marie maanĩrĩire. No rĩu tondũ o metha ĩrĩ na maikoroboni, thĩna ũcio nĩ mũthiru.”

 Arutani na arutwo magunĩkĩte atĩa nĩ ũndũ wa cukuru icio kwagagĩrio? Angela, ũrĩa wathiire cukuru ya SKE taũni-inĩ ya Palm Coast, Florida, Amerika (US), aaugire ũũ: “Nĩ kũndũ kũhooreru mũno. Maũndũ mothe makoragwo mabangĩtwo wega, nginya irathi na rumu citũ cia gũikara, kwoguo no tũhote kũiga meciria maitũ harĩ gũthoma na kwĩruta.” Csaba, mũrutani ũmwe bũrũri-inĩ wa Hungary, nĩ akenagĩra mĩeke ya kũrĩanĩra hamwe na arutwo. Aaugire atĩ mahinda-inĩ ta macio, “arutwo nĩ matwĩraga maũndũ maingĩ mamegiĩ na maũndũ marĩa meyoneire. Na njĩra ĩyo, nĩ tũhotaga kũmenya arutwo wega. Kwoguo rĩrĩa tũrarutana, nĩ tũmenyaga ũrĩa tũkũmateithia kũringana na mabataro mao.”

 Arutwo na arutani monaga cukuru icio ciagagĩrĩtio irĩ kĩrathimo kuuma kũrĩ Jehova, ‘Mũrutani witũ Ũrĩa Mũnene.’ (Isaia 30:20, 21) Mwarĩ wa Ithe witũ ũmwe kuuma Philippines, ũrĩa wathiire cukuru ya SKE kũrĩa nyũmba ĩmwe yagagĩrĩtio ĩgatuĩka cukuru, aaugire ũũ: “Ũrĩa cukuru ĩyo kũhaana, gwatũririkanirie atĩ tũtirĩ o arutwo tu, no tũrĩ ageni a mwanya a Jehova. Endaga tũkenere rĩrĩa tũreruta Kiugo gĩake na kinyi.”

 Mĩako ya cukuru yakagwo, ĩgacokererio, na ĩkamenyererũo nĩ ũndũ wa mĩhothi yaku, ĩrĩa mĩingĩ ĩrutagwo kũgerera donate.pr418.com. Nĩ ngatho mũno nĩ ũndũ wa ũtaana waku.