Kĩama Kĩrĩa Gĩtongoragia nĩ kĩendaga mũno kũgĩe na mĩako ĩrĩa ĩtũteithagĩrĩria kũhingia wĩra wa kũhunjia ndũmĩrĩri ya Ũthamaki. Kwa ngerekano, mwaka-inĩ wa ũtungata wa 2023, kambuni iria ihũthagĩrũo nĩ wabici cia honge cia Aira a Jehova nĩ ciahũthĩrire dola makĩria ma milioni 500 kũgũra, gwaka, gũcokereria, na kũmenyerera Nyũmba cia Ũthamaki na cia Igomano kũndũ gũtiganĩte thĩinĩ wa thĩ. a Mũigana ũcio, nĩ hamwe na mbeca iria ciahũthĩrirũo nĩ ciũngano kũmenyerera Nyũmba ciao cia Ũthamaki kũndũ guothe thĩinĩ wa thĩ.

 Makĩria ma ũguo, mĩhothi ĩrĩa ĩrutagwo nĩ ĩhũthagĩrũo gwaka na kũmenyerera nyũmba cia wabici cia honge, iria iteithagĩrĩria kũbanga na kũnyita mbaru wĩra wa kũhunjia thĩinĩ wa thĩ yothe. Mawĩra marĩa marutagwo wabici-inĩ cia honge nĩ mahũthahũthĩtio, nĩguo mbeca imwe iria irahũthagĩrũo kuo ihũthĩrũo gwaka na kwagagĩria Nyũmba cia Ũthamaki na cia Igomano. O na kũrĩ ũguo, no kũrabatarania mbeca nyingĩ cia gũcokereria, kwagagĩria, kana gũthamia wabici cia honge. Hihi mawĩra macio nĩ ma bata nĩkĩ? Wabici cia honge inyitaga mbaru atĩa wĩra wa bata wa kũhunjia? Reke tuone.

 Wabici nyingĩ cia honge irĩ na makĩria ma mĩaka 30 kana 40! Nicholas, ũrĩa ũtungataga na Rũhonge rwa Gũcora/Mĩako rwa Thĩ Yothe, aaugire ũũ: “O na mĩako ĩrĩa ĩmenyereirũo wega nĩ ĩkũraga na ĩkagĩa na mathĩna manene o ũrĩa mĩaka ĩrathiĩ. Gũcokereria mĩako nĩ kũmĩteithagia ĩikare ihinda iraihu nĩguo ĩthiĩ na mbere kũhũthĩrũo.”

 Ningĩ mĩako ya Betheli nĩ ĩbataraga gũcenjio, nĩguo ĩhingie mabataro ma ithondeka marĩa maikaraga magĩcenjagia. Thĩinĩ wa thĩ yothe, ahunjia nĩ mongererekete na gĩkĩro kĩnene mũno kuuma rĩrĩa wabici cia honge ciaakirũo. Nĩguo tũteithie ahunjia acio, nĩ tũbatarĩte kũgĩa na erutĩri aingĩ a kũruta wĩra wabici-inĩ icio cia honge. Nĩ ũndũ ũcio, nyũmba iria hĩndĩ ĩmwe ciarĩ njiganu, rĩu nĩ nini mũno.

 Ningĩ ũgitĩri nĩ ũndũ ũngĩ ũroragwo. O ũrĩa tũrarikĩra matukũ-inĩ ma kũrigĩrĩria ma mũtabarĩre ũyũ, noguo tũcemanagia na icanjama nyingĩ cia ndũire iria cigaga mĩoyo itũ ũgwati-inĩ. (Luka 21:11) Rĩrĩa twahũthĩra njĩra cia kĩĩrĩu tũgĩcokereria mĩako, nĩ tũteithagĩrĩria harĩ gũtũma nyũmba icio ikorũo irĩ kũndũ kũrĩ na ũgitĩri harĩ arĩa marutagĩra wĩra kuo. Gwaka na njĩra ĩyo, nĩ gũtũmaga nyũmba icio ikorũo irĩ kũndũ kwega gwa kũbangĩra mĩbango ya kũheana ũteithio na gũthiĩ na mbere kũnyita mbaru wĩra wa kũhunjia thutha wa gĩcanjama kĩa ndũire kuumĩra.

 Rungu rwa ũtongoria wa Kĩama Kĩrĩa Gĩtongoragia, wĩra mũingĩ wa gwaka nĩ warutirũo thĩinĩ wa wabici cia honge 43 mwaka-inĩ wa ũtungata wa 2023. Ũguo nĩ kuuga atĩ hakuhĩ nuthu ya mĩako ya Betheli thĩinĩ wa thĩ yothe, nĩ yarĩ na mawĩra ma mũthemba mũna ma mĩako maathiaga na mbere. Reke tuone ngerekano nini ironania bata wa wĩra ũcio ũkoretwo ũkĩrutwo.

 Angola. Matt, ũrĩa ũtungataga Kamĩtĩ-inĩ ya Wabici ya Rũhonge ya Angola, aaugire ũũ: “Tũrĩ na mweke wa kuona ũrathi wa Hagai 2:7 ũkĩhinga na njĩra ya mwanya. Ihinda-inĩ rĩa mĩaka ikũmi tu, ahunjia moongererekire na gĩcunjĩ kĩa 60 harĩ igana! Nĩguo tũhote gũteithia ahunjia acio, famĩlĩ ya Betheli yabatarire kuongererũo andũ na maita matatũ. No tondũ nyũmba iria twarĩ nacio ciarĩ nini, tũtingĩahotire gwĩta andũ aingĩ ũrĩa kwabataranagia moke kũruta wĩra gũkũ. Ũndũ ũcio watũmaga andũ aingĩ a Betheli makorũo na wĩra mũingĩ, na makabatara kũruta wĩra mathaa maingĩ gũkĩra ũrĩa kwagĩrĩire.”

 Ariũ a Ithe witũ nĩ maamũrirũo nĩguo marore ũrĩa wabici ya rũhonge ĩngĩararamirio. Kĩambĩrĩria-inĩ, meeciragia atĩ ũndũ ũrĩa warĩ mũhũthũ na wa na ihenya nĩ gũcokereria nyũmba iria ciarĩ kũu wabici-inĩ ya rũhonge. No thutha wa gwĩka ũthuthuria mũnene, nĩ moonire atĩ gũcokereria nyũmba icio tiyo yarĩ njĩra njega ya kũhũthĩra mĩhothi. Handũ ha ũguo, magĩtua itua rĩa kũgũra nyũmba yarĩ hakuhĩ na kũmĩcokereria. Matt aaugire ũũ: “Rĩrĩa Kamĩtĩ ya Wabici ya Rũhonge yerirũo ũhoro wa kũgũra nyũmba na kũmĩcokereria, nĩ tweyũragia kana nyũmba ĩyo nĩ ĩngĩaganĩrĩire na mabataro maitũ tondũ ti ithuĩ tweyakĩire. No rĩu nĩ tuonaga nyũmba ĩyo nĩyo yagĩrĩire. Jehova nĩ aarathimire itua rĩu.”

 No kũhoteke wabici ya rũhonge ya Angola nĩ ĩkaabatara kwararamio ihinda rĩũkĩte. O na kũrĩ ũguo, nyũmba ĩyo njerũ, o hamwe na nyũmba iria irĩ Betheli, iria ingĩcenjio kũringana na mabataro, na nyũmba cia gũkomborũo iria irĩ nja, nĩ irateithia wabici ya rũhonge kũhingia mabataro kũringana na wongerereku ũrĩa ũrĩ kuo.

 Japan. Nyũmba nyingĩ cia wabici ya rũhonge ciaakirũo hakuhĩ mĩaka 40 mĩthiru na nyingĩ itirĩ ciacokererio na njĩra nene. Maũndũ maingĩ nĩ meekĩtwo nĩguo nyũmba icio ikorũo irĩ njega, no o na gũkoretwo na kĩyo kĩu gĩothe, nyũmba icio nĩ ihũthĩrĩtwo kwa ihinda iraihu gũkĩra ũrĩa kwagĩrĩire. Nĩ ũndũ ũcio, kũrĩ na wĩra mũnene mũno wa gũcokereria nyũmba icio ũrathiĩ na mbere.

 Ũtũũro wa Betheli o naguo nĩ ũcenjetie o ũrĩa mĩaka ĩrathiĩ. Mbere ya 2015, famĩlĩ ya Betheli yarugagĩrũo irio ciothe. Kwoguo, nyũmba nyingĩ cia gũikarũo wabici-inĩ ya Japan ciarĩ na “kariiko” kanini. No rĩu, andũ a famĩlĩ ya Betheli nĩo merugagĩra maita marĩa maingĩ. Rĩrĩa nyũmba ciacokagĩrĩrio, riiko nĩ rĩanenanenehirio nĩguo andũ makahota kũhaarĩria na kũruga irio na njĩra hũthũ. Mwarĩ wa Ithe witũ Kumiko, ũrĩa ũtungataga wabici-inĩ ya rũhonge ya Japan, aaugire ũũ: “Riiko inene rĩtũmaga njigue njiganĩire, na ũndũ ũcio nĩ ũndeithagia kũnyita mbaru mĩbango mĩerũ ya Betheli.”

 Wĩra ũrĩa ũrutagĩrũo wabici-inĩ ya rũhonge ya Japan nĩ gĩcunjĩ kĩa bata mũno harĩ wĩra wa thĩ yothe. (Mathayo 28:19, 20) Wabici ya Japan nĩ ĩmwe ya wabici igĩrĩ tu iria icabaga Bibilia ĩrĩ yothe. Kwoguo, wĩra ũmwe harĩ mawĩra ma mĩako marĩa marathiĩ na mbere kũu, nĩ gwĩkĩra macini ya gũtinia mĩthia ya maratathi na kũngania rũkũngũ, nĩguo arĩa marutaga wĩra kĩganda-inĩ gĩa gũcabĩra mabuku makorũo na ũgitĩri. Twahũthĩrire hakuhĩ dola milioni ĩmwe kũgũra na gwĩkĩra macini ĩyo, no nĩ ĩteithagĩrĩria wabici ĩyo gũthiĩ na mbere gũcaba mabuku na andũ magakinyĩrũo nĩ irio cia kĩĩroho.

 Ariũ a Ithe witũ maatigĩrĩire atĩ wĩra wa gũcaba Bibilia ndwarũgamire hĩndĩ ya mwako. Trey, ũrĩa ũtungataga Kamĩtĩ-inĩ ya Wabici ya Rũhonge ya Japan, aaugire ũũ: “Hĩndĩ ya mwako, ithondeka ritũ nĩ rĩarutaga Bibilia cia thiomi nyingĩ, na andũ aingĩ makĩria nĩ maabataraga Bibilia thĩinĩ wa thĩ yothe. Honge itiganĩte cia Betheli na andũ ngũrani nĩ maarutithanagia wĩra hamwe nĩguo mabange nĩ hĩndĩ ĩrĩkũ macini njerũ cingĩekĩrirũo na nĩ rĩ mabuku mangĩacabirũo.” O na kũrĩ na moritũ macio mothe, Bibilia hakuhĩ 220,000 nĩ ciacabirũo mĩeri-inĩ ya Machi nginya Agosti 2023, rĩrĩa wĩra wa gwaka warĩ mũingĩ mũno kĩganda-inĩ gĩa gũcabĩra mabuku. Wĩra ũcio wothe warĩkire gũtekũbatara kuongererũo mbeca ingĩ cia mwako, tiga iria ciabangĩtwo.

 Ũndũ ũngĩ warĩ wa bata hĩndĩ ya gũcokereria mĩako nĩ ũrĩa thitima ĩngĩahũthĩrirũo wega makĩria. Nĩ gũgwĩkĩrũo mĩtambo ya kũgucia hinya wa riũa (solar panels) ĩrĩa ĩrĩtũmaga hakuhĩ dola 120,000 ihonokio harĩ mwaki wa thitima ũrĩa ũhũthĩkaga o mwaka. Ningĩ nĩ gũgwĩkĩrũo ndirica irĩ na icicio ithatũ, iria o nacio irĩteithagĩrĩria mwaki wa thitima kwaga kũhũthĩka mũno, na ũndũ ũcio ũrĩhonokagia kĩndũ ta dola 10,000 o mwaka. O na gũtuĩka indo icio cia kũhonokia mwaki wa thitima irĩ na goro na nĩ igũtũma mbeca cia gũcokereria nyũmba cingĩhe, kũroneka atĩ indo icio nĩ irĩhonokia makĩria ma dola milioni 3.5 ihinda-inĩ rĩrĩa mĩtambo ĩyo na ndirica icio ikũhũthĩka. Ningĩ ũndũ ũcio nĩ ũkũgirĩrĩria gũthũkangia kũrĩa kũrigicĩirie nyũmba icio.

 Wabici icio igĩrĩ cia honge nĩ ĩronania ũrĩa kũrĩ na wĩra mũingĩ ũrabatarania harĩ mĩako ya Betheli nĩguo ĩthiĩ na mbere kũhingia mabataro ma wĩra wa kũhunjia. O na kũrĩ ũguo, wĩra ti mũrĩku. Aaron, ũrĩa ũrutaga wĩra na Rũhonge rwa Gũcora/Mĩako rwa Thĩ Yothe aaugire, “Ariũ a Ithe witũ nĩ mahingĩtie maũndũ maingĩ, no kũrĩ na wĩra mũingĩ ũrabatara kũrutwo.” Hihi wĩra ũcio ũkũhingio na njĩra ĩrĩkũ? Oongereire akiuga: “Nĩ kũgerera mĩhothi ya kwĩyendera ĩrĩa ĩteithagĩrĩria kũhingia mawĩra macio, na ningĩ nĩ tũracokeria ngatho arĩa makoretwo makĩĩrutĩra ihinda-inĩ ihĩtũku, na arĩa othe marabanga maũndũ mao nĩguo marĩhota kwĩrutĩra ihinda rĩũkĩte. Kuona ũrĩa ariũ a Ithe witũ merutĩire gũteithia na kũruta mĩhothi yao, nĩ ũira wa kuonania atĩ Jehova nĩ ararathima wĩra witũ.”—Thaburi 110:3.

 Mawĩra mothe ma mĩako na gũcokereria mahotekaga nĩ ũndũ wa mĩhothi ya kwĩyendera, ĩrĩa mĩingĩ ĩrutagwo kũgerera donate.pr418.com. Nĩ ngatho mũno nĩ ũndũ wa gũthiĩ na mbere kuonania ũtaana.