Aira a Jehova nĩ marũmbũyagia mũno arĩa mathathayagia hamwe nao. (1 Petero 2:17) Aingĩ aitũ tũiguaga o ta ũrĩa mwarĩ wa Ithe witũ Tannis, ũikaraga Kenya aiguaga. Aaugire, “Nĩ nyendete mũno kũmenya ũrĩa aarĩ na ariũ a Ithe witũ thĩinĩ wa thĩ marathiĩ na mbere.” Tannis na Aira a Jehova milioni nyingĩ mamenyaga atĩa ũrĩa kũrathiĩ na mbere? Kuuma 2013, nĩ tũkoretwo tũkĩmenya kũgerera gĩcunjĩ kĩa Mohoro kĩrĩa gĩkoragwo thĩinĩ wa website ya jw.org.

 Gĩcunjĩ kĩu kĩa Mohoro gĩkoragwo na riboti cia kwĩhokeka ciĩgiĩ Aira a Jehova ikoniĩ maũndũ ta kũrutwo kwa Bibilia, wĩra wa kũheana ũteithio kũrĩa kũrĩ na icanjama, mawĩra ma mĩako, na maũndũ mangĩ ma bata. Ningĩ nĩ gĩtũmenyithagia ũhoro wa aarĩ na ariũ a Ithe witũ arĩa mohetwo nĩ ũndũ wa wĩtĩkio wao. Gĩcunjĩ kĩu ningĩ nĩ gĩkoragwo na maũndũ marĩa monetwo ma gwĩkĩra ngoro megiĩ kambĩini cia kũhunjia na maũndũ megiĩ Kĩririkano. Nĩ a mekaga ũthuthuria wĩgiĩ icunjĩ icio cia mohoro, na ihaaragĩrio atĩa?

 Gĩcunjĩ kĩa Mohoro kĩrũgamagĩrĩrũo nĩ Wabici ya Kũheana Mohoro (OPI). Rũhonge rũu rũkoragwo wabici-inĩ nene ya Aira a Jehova na rũrutaga wĩra rungu rwa ũrũgamĩrĩri wa Kamĩtĩ ya Atabarĩri ya Kĩama Kĩrĩa Gĩtongoragia. Rũhonge rwa OPI rũkoragwo na aarĩ na ariũ a Ithe witũ makĩria ma 100, na aingĩ ao makoragwo marĩ erutĩri a gũteithĩrĩria, arĩa amwe ao makoragwo marĩ andĩki, athuthuria, acori, na ataũri. Angĩ nao maranagĩria na anene a thirikari, maprofesa, arutani, na andũ a mohoro. Rũhonge rwa OPI rũteithagĩrĩrio nĩ honge makĩria ma 80 cia Metha cia Kũheana Mohoro (PID) iria ikoragwo wabici-inĩ cia honge thĩinĩ wa thĩ yothe.

 Rũhonge rwa OPI nĩ rũrutithanagia wĩra hamwe na honge cia PID kũhaarĩria ũhoro ũrĩa ũgwĩkĩrũo gĩcunjĩ-inĩ kĩa Mohoro. Ariũ a Ithe witũ mona ũhoro mwega wa kũmenyithio andũ, nĩ maũthuthuragia na magacokanĩrĩria ũhoro wa kwĩhokeka. No mahoe andũ ũhoro na marie na arĩa maraũmenya wega. Thutha wa gũcokanĩrĩria ũhoro, ũhoro ũcio nĩ wandĩkagwo, ũkarorũo kana ũrĩ na mahĩtia, ũgathomwo, ũgekĩrũo mbica, na ũgatũmwo kũrĩ Kamĩtĩ ya Atabarĩri nĩguo ĩũhĩtũkie.

 Aarĩ na ariũ a Ithe witũ maiguaga atĩa nĩ ũndũ wa gĩcunjĩ kĩu kĩa Mohoro? Cheryl, mwarĩ wa Ithe witũ ũikaraga Philippines aaugire, “Nyendete kwambĩrĩria mũthenya wakwa na gũthoma ũhoro wĩgiĩ ithondeka rĩa Jehova na andũ ake.”

 Athomi aingĩ nĩ maugaga atĩ nĩ monaga ngũrani nene gatagatĩ ka mohoro ma jw.org na mohoro marĩa mangĩ. Tatiana, ũrĩa ũikaraga Kazakhstan aaugire ũũ: “Nĩ ngenaga tondũ no ndĩhoke mohoro ma jw.org. Nĩ ma kwĩhokeka na nĩ ma ma.” Mwarĩ wa Ithe witũ Alma, ũrĩa ũikaraga Mexico, aaugire ũũ: “Ngũrani na maũndũ moru marĩa tũiguaga indo-inĩ cia mohoro, maũndũ marĩa makoragwo gĩcunjĩ-inĩ kĩa Mohoro thĩinĩ wa jw.org makoragwo marĩ ma gwĩkĩra ngoro mũno.”

 Gĩcunjĩ kĩa Mohoro to ũhoro tu gĩkoragwo na wa kwĩhokeka; no ningĩ nĩ gĩkĩraga wĩtĩkio witũ hinya. Bernard, ũrĩa ũikaraga Kenya, aaugire: “Gĩcunjĩ kĩa Mohoro nĩ kĩndeithĩtie kuona aarĩ na ariũ a Ithe witũ thĩinĩ wa thĩ yothe marĩ a famĩlĩ itũ gũtekũmakania kũrĩa maikaraga. Nĩ hotaga kũmagweta na marĩĩtwa mahoya-inĩ makwa na ngagweta maũndũ marĩa maragerera.” Mwarĩ wa Ithe witũ Bybron, ũrĩa o nake ũikaraga Kenya, aaugire: “Hingo ciothe nĩ ngenaga rĩrĩa ndona gĩcunjĩ kĩrarĩrĩria kũrutwo kwa Bibilia na rũthiomi rũngĩ! Icunjĩ icio cindirikanagia atĩ Jehova ndarĩ mũthutũkanio.”

 O na icunjĩ iria ironania ũhoro wĩgiĩ ariũ a Ithe witũ kũnyarirũo no itwĩkĩre ngoro. Jackline, ũrĩa ũikaraga Kenya, aaugire: “Gwĩcũrania ũhoro wa ũmĩrĩru wao nĩ gwĩkĩraga wĩtĩkio wakwa hinya. Nĩ ngeragia kũrora nĩ ũndũ ũrĩkũ ũmateithagia gũkirĩrĩria. Nĩ nyonete atĩ maũndũ marĩa andũ monaga ta arĩ manini ta kũhoya, gũthoma Bibilia, na nginya kũina, nĩ mateithagia aarĩ na ariũ a Ithe witũ gũikara marĩ na hinya.”

 Mwarĩ wa Ithe witũ Beatriz, ũrĩa ũikaraga Costa Rica nĩ onaga mohoro megiĩ icanjama cia ndũire marĩ ma bata. Aaugire ũũ: “Gĩcunjĩ kĩa Mohoro nĩ kĩndeithĩtie kuona ũrĩa ithondeka ritũ rĩheaga ariũ a Ithe witũ mabataro mao na ihenya, na mũbango mwega, na njĩra ya wendo. Ũndũ ũcio nĩ ũheaga ũũma wa atĩ rĩrĩ nĩrĩo ithondeka rĩa Jehova.”

 Nĩ tũkenaga nĩ kwamũkĩra ũhoro wa ica ikuhĩ wĩgiĩ aarĩ na ariũ a Ithe witũ thĩinĩ wa thĩ yothe! Ũndũ ũcio ndũngĩhoteka hatarĩ na mĩhothi yanyu ĩrĩa mũrutaga nĩ ũndũ wa wĩra wa thĩ yothe, na mĩingĩ yayo nĩ ĩrĩa mũrutaga kũgerera njĩra iria cionanĩtio thĩinĩ wa donate.pr418.com. Nĩ ngathoi nĩ ũndũ wa mĩhothi yanyu ya kwĩyendera.