Nyĩmbo nĩ kĩheo kĩega kuuma kũrĩ Jehova. No cihutie mwĩcirĩrie witũ, itũme tũkene, na itwĩkĩre ngoro. Ũguo nĩguo nyĩmbo cia JW Broadcasting ihaana. Na makĩria ma ũguo, nĩ itũmaga tũkuhĩrĩrie Jehova.

 Kuuma mwaka wa 2014, makĩria ma nyĩmbo 70 cia JW Broadcasting nĩ irutĩtwo, na harĩ rũmwe ruonekaga na thiomi makĩria ma 500! No gũkorũo waneyũria, ‘Nĩ a marutagĩra nyĩmbo icio wĩra, na ithondekagwo atĩa?’

 Nyĩmbo cia JW Broadcasting ĩthondekagwo nĩ timu ya kũhaarĩria nyĩmbo thĩinĩ wa Rũhonge rwa Video na Mĩgambo rungu rwa ũrũgamĩrĩri wa Kamĩtĩ ya Ũrutani ya Kĩama Kĩrĩa Gĩtongoragia. Timu ĩyo ya kũhaarĩria nyĩmbo ĩkoragwo na aarĩ na ariũ a Ithe witũ 13, arĩa mateithagĩrĩria wĩra-inĩ wa kwandĩka, kũbanga ũrĩa ikũinwo, na mawĩra mangĩ marĩa mabataranagia. Makĩria ma ũguo, Kamĩtĩ ya Ũrutani nĩ yamũrĩte erutĩri a gũteithĩrĩria kuuma thĩinĩ wa thĩ yothe, nĩguo mateithĩrĩrie wĩra-inĩ wa nyĩmbo, ta kwandĩka na kũina. Aarĩ na ariũ a Ithe witũ acio mahũthagĩra iheo ciao marĩ na wĩnyihia, matekwĩyethera igweta.

 Rwĩmbo rwa JW Broadcasting rũthondekagwo atĩa? Wa mbere, Kamĩtĩ ya Ũrutani nĩ ĩthuuraga Maandĩko ma mũthingi ma rwĩmbo rũu, na ũrĩa rwĩmbo rũu rwagĩrĩire kũhutia athikĩrĩria. Thutha ũcio, timu ya kũhaarĩria nyĩmbo ĩthuuraga arĩa megũthondeka rwĩmbo na kwandĩka ciugo ciaruo. Macokaga makarekondi rwĩmbo rũu, rũkaneanwo kũrĩ Kamĩtĩ ya Ũrutani, ĩrĩa ĩrũroraga na ĩkaheana ũtongoria makĩria. Timu ya kũhaarĩria nyĩmbo ĩcokaga ĩkarũnga kũrĩa kũrabatarania na ĩkarũrekondi rĩngĩ. Nyĩmbo icio irekondagĩrũo kũndũ ngũrani ta wabici-inĩ cia honge na mĩciĩ-inĩ ya andũ kũrĩa kũrĩ na indo cia kũrekondi.

 Ariũ a Ithe witũ mahũthagĩra programu ngũrani cia kompiuta gũthondeka na kũrekondi nyĩmbo cia JW Broadcasting. Wĩra ũcio ningĩ nĩ ũbataraga indo ingĩ ta, indo cia gũthaaka nyĩmbo, gũtukania mĩgambo, kũnenehia mĩgambo, na maikoroboni. Maikoroboni ĩmwe no yume dola 100 nginya makĩria ma dola 1,000 cia Amerika. Mwaka wa 2020, twahũthĩrire dola 116,000 cia Amerika kũgũra indo cia kũrekondi nyĩmbo.

 Nĩ maũndũ marĩkũ mekagwo ma kũhonokia mĩhothi? Handũ ha gũkorũo na timu nene ya aini thĩinĩ wa Betheli, nĩ kũhũthagĩrũo erutĩri aingĩ a gũteithĩrĩria. Makĩria ma ũguo, handũ ha gũcokanĩrĩria aini aingĩ a gũthaaka indo cia ũini marĩ gĩkundi, ariũ a Ithe witũ mahũthagĩra programu cia kompiuta gũthondeka mĩgambo mĩingĩ.

 Aarĩ na ariũ a Ithe witũ nĩ mendete gũthikĩrĩria nyĩmbo cia JW Broadcasting. Tara, ũrĩa ũikaraga bũrũri wa Germany, aaugire ũũ: “Nyĩmbo icio nĩ itũmaga njigue hooreire rĩrĩa ndĩ na mĩtangĩko. Gũcithikĩrĩria na rũthiomi rwitũ gũtũmaga njigue ta arĩ Jehova ũrahĩmbĩria.” Nake mũrũ wa Ithe witũ wĩtagwo Dmitry kuuma Kazakhstan aaugire ũũ: “Nĩ nyendete gũthikĩrĩria nyĩmbo icio, na ndibataraga gũtinda ngĩciria kana nĩ iratwarana na motaaro ma Bibilia. Makĩria ma ũguo, nĩ indeithagia kũiga maũndũ ma kĩĩroho mbere.”

 Delia, kuuma South Africa, agĩtaarĩria ũrĩa aiguaga nĩ ũndũ wa nyĩmbo cia JW Broadcasting aaugire ũũ: “Nĩ ciĩkĩraga wĩtĩkio wakwa hinya. Rĩrĩa rĩothe ndaigua nguĩte ngoro kana ndĩragerera ũndũ mũritũ, hatiagaga rwĩmbo rũraringana na ũndũ ũrĩa ndĩragerera. Kaingĩ, kuigua tu mũgambo wa rwĩmbo nĩ gũkoragwo kũiganĩte kũndeithia gũcenjia ũrĩa ndĩraigua!”

 Nyĩmbo imwe cia JW Broadcasting nĩ ciendetwo mũno. Lerato, o nake kuuma South Africa, aaugire ũũ: “Rwĩmbo rũrĩa rwĩtagwo ‘Thĩ Njerũ Ĩrĩ Hakuhĩ’ na ‘Thĩ Njerũ Ĩroka’ cindirikanagia hĩndĩ ĩrĩa nganyita mami ũgeni rĩngĩ ariũkio. Rĩrĩa rĩothe ndathikĩrĩria nyĩmbo icio, hũũraga mbica andengʼereire ehaarĩirie kũhĩmbĩria.”

 Harĩ rwĩmbo rũmwe rwa JW Broadcasting rwarĩ ũteithio mũnene harĩ tinĩnja ũmwe kuuma Sri Lanka. Aaugire ũũ: “Mwarimũ witũ wa sayansi, aanjĩrire maũndũ matarĩ mega mbere ya arutwo arĩa angĩ nĩ ũndũ wa gũkorũo ndĩ Mũira wa Jehova. Nĩ ndetigĩrire mũno na ndiamenyaga ũrĩa ingĩaugire. Ndainũka, mami aanjĩkĩrire ngoro thikĩrĩrie rwĩmbo rũrĩa rwĩtagwo ‘Study Makes You Strong.’ Rwĩmbo rũu nĩ rwandeithirie kuona bata wa gwĩka ũthuthuria na kwĩhaarĩria ũrĩa ingĩacokeirie mwarimũ. Mũthenya ũrĩa warũmĩrĩire nĩ ndaaririe nake. Nĩ aathikĩrĩirie na akĩnjĩra rĩu nĩ ataũkĩrũo wega nĩ maũndũ marĩa Aira a Jehova metĩkĩtie. Nĩ njokagĩria ithondeka rĩa Jehova ngatho nĩ ũndũ wa gũtũhe nyĩmbo cia gũtwĩkĩra ngoro.”

 Tũrutaga kũ mbeca cia gũthondeka nyĩmbo icio? Cionekaga kũgerera mĩhothi ya wĩra wa thĩ yothe, ĩrĩa kaingĩ ĩrutagwo kũgerera njĩra iria cionanĩtio thĩinĩ wa donate.pr418.com. Nĩ ngathoi mũno nĩ ũndũ wa mĩhothi yanyu ya kwĩyendera.