Makĩria ma gĩcunjĩ kĩa 60 harĩ 100 gĩa timu cia ũtaũri iria irutaga wĩra hĩndĩ ciothe, ikoragwo wabici-inĩ cia ũtaũri no ti wabici-inĩ cia honge. Mũbango ũcio ũkoragwo na ũguni nĩkĩ? Ataũri mabataraga indo irĩkũ nĩguo marute wĩra na njĩra njega marĩ wabici-inĩ cia ũtaũri? Na kũrĩa wabici ya ũtaũri ĩgũkorũo kũhutagia wĩra wa ũtaũri na njĩra ĩrĩkũ?

 Wabici ya ũtaũri nĩ ĩhotithagia ataũri gũikara kũrĩa rũthiomi rwao rwaragio nĩ andũ aingĩ. Karin, mũtaũri wa rũthiomi rwa Low German aatarĩirie ũũ: “Kuuma rĩrĩa twathamĩire wabici-inĩ ya ũtaũri ĩrĩa ĩkoragwo taũni-inĩ ya Cuauhtémoc, Chihuahua, Mexico, twaragia rũthiomi rwa Low German hamwe na ataũri arĩa angĩ tũrutaga wĩra nao, tũrĩ ũtungata-inĩ, na rĩrĩa twathiĩ nduka kũgũra indo. Tũkoragwo tũthiũrũrũkĩirio nĩ andũ arĩa maragia rũthiomi rwitũ. Tũiguaga andũ makĩhũthĩra rũthiomi tũtaaiguĩte kwa ihinda iraihu, na tũkahota kũhũthĩra ciugo iria andũ marahũthĩra mahinda-inĩ maya.”

 James, ũrĩa ũrutaga wĩra na timu ya ũtaũri ya rũthiomi rwa Frafra bũrũri-inĩ wa Ghana, aaugire atĩ rĩmwe nĩ aiguaga aagĩte famĩlĩ ya Betheli ĩrĩa ĩkoragwo wabici-inĩ ya rũhonge. No aacokire akiuga ũũ: “Nĩ nyendete kũruta wĩra wabici-inĩ ya ũtaũri. Kũhunjia na rũthiomi rũrĩa rwaragio gũkũ, na kuona ũrĩa andũ mahutagio nĩ ũhoro ũrĩa mwega nĩ gũtũmaga ngene mũno.”

 Nĩ maũndũ marĩkũ ariũ a Ithe witũ maroraga magĩciria kũrĩa wabici ya ũtaũri ĩgũkorũo? Joseph, ũmwe wa Rũhonge rwa Gũcora/Mĩako rwa Thĩ Yothe rũrĩa rũkoragwo Warwick, New York, Amerika (US) aaugire ũũ: “Ũritũ ũmwe tũcemanagia naguo, nĩ atĩ kũndũ kũmwe gũtikoragwo na thitima, maĩ, kana Intaneti ĩrĩa ĩbataranagia nĩguo ataũri mahote kwamũkĩra indo cia gũtaũrũo. Kwoguo tũgĩciria kũrĩa wabici ya ũtaũri ĩgũkorũo, nĩ tũroraga kũndũ gũtiganĩte kũrĩa rũthiomi rũu rwaragio.”

 Ũhoro wa ma nĩ atĩ, kũndũ kũrĩa gũkoragwo kũrĩ raithi mũno na gũtoyaga ihinda inene kwambĩrĩria wabici ya ũtaũri, nĩ Nyũmba-inĩ ya Kĩgomano, Nyũmba-inĩ ya Ũthamaki, kana mũciĩ wa Amishonarĩ, nao ataũri magathiaga kũrutĩra wĩra kuo. Angĩkorũo gũtirĩ na kũndũ ta kũu, ariũ a Ithe witũ no metĩkĩrio kũgũra nyũmba na wabici nĩguo ataũri magaikara na makarutĩra wĩra kuo. Mabataro ma ataũri mangĩcenjia, nyũmba icio no ciendio na mbeca icio ihũthĩrũo kũrĩa kũngĩkorũo na ũbataro mũnene.

 Mwaka wa ũtungata wa 2020, twahũthĩrire dola milioni 13 cia Amerika (US) gũteithĩrĩria wabici cia ũtaũri gũthiĩ na mbere kũruta wĩra. Ataũri thĩinĩ wa wabici cia ũtaũri nĩ mabataraga kompiuta, programu cia mwanya, indo cia kũrekondi mĩgambo, Intaneti, na mabataro ma o mũhaka. Kwa ngerekano, kompiuta ya kũhũthĩrũo nĩ mũtaũri ũmwe, no yume ta dola 750 cia Amerika (US). Kompiuta nĩ ciĩkĩragwo programu cia kũgũrũo, na programu ya Watchtower Translation System, ĩrĩa ĩteithagĩrĩria ataũri kũbanga wĩra wao na kuona indo cia gwĩka ũthuthuria na ihenya.

 Ningĩ ataũri nĩ mamũkagĩra indo cia kũrekondi mĩgambo iria imahotithagia kũrekondi marĩ o wabici. Indo icio nĩ ciateithirie mũno rĩrĩa mũrimũ wa COVID-19 waambĩrĩirie, tondũ ataũri aingĩ maathire nacio kwao mĩciĩ na magĩthiĩ na mbere kũrekondi indo iria mataũraga cia gũthikĩrĩrio o hamwe na video.

 Erutĩri arĩa maikaraga hakuhĩ na wabici ya ũtaũri nĩ mateithagĩrĩria kũrora mabuku marĩa mataũrũo, na mawĩra ma kũmenyerera mĩako ya wabici ya ũtaũri. Cirstin, ũrĩa ũtungataga wabici-inĩ ya ũtaũri ya Afrikaans taũni-inĩ ya Cape Town, South Africa, aaugire ũũ: “Ahunjia aingĩ na mapainia a hĩndĩ ciothe nĩ makoragwo na mĩeke ya kũruta wĩra gũkũ.”

 Erutĩri ta acio nĩ makenagĩra mweke ũcio. Mwarĩ wa Ithe witũ ũmwe ũteithagĩrĩria wabici-inĩ ya ũtaũri, aaugire atĩ kũruta wĩra kũu nĩ ta “kũhuhia rĩera itheru.” Aarĩ na ariũ a Ithe witũ amwe arĩa maikaraga hakuhĩ na wabici ya ũtaũri nĩ mathiaga kũrekondwo. Juana, mũtaũri ũmwe wa rũthiomi rwa Totonac taũni-inĩ ya Veracruz, Mexico, aaugire ũũ: “Rĩu tondũ tũikaraga hakuhĩ na taũni iria andũ maragia rũthiomi rwitũ, nĩ ũndũ mũhũthũ aarĩ na ariũ a Ithe witũ gũka kũrekondwo indo cia gũthikĩrĩria na video.”

 Hihi wabici cia ũtaũri nĩ iteithĩrĩirie kwagagĩria ũtaũri? Athomi aitũ milioni nyingĩ maugaga ĩĩ. Cédric, ũrĩa ũrutaga wĩra na timu ya rũthiomi rwa Kongo bũrũri-inĩ wa Democratic Republic of Congo, aaugire ũũ: “Aarĩ na ariũ a Ithe witũ amwe meetaga ũtaũri witũ ‘Gĩkongo kĩa mabuku ma Watch Tower,’ tondũ tũtiataũraga na njĩra ĩrĩa andũ maragia rũthiomi rwa Kongo. No rĩu maugaga atĩ mabuku maitũ mataũragwo na Gĩkongo gĩa kĩĩrĩu, rũthiomi rũrĩa andũ mahũthagĩra o mũthenya. ”

 Andile, ũrĩa ũrutaga wĩra na timu ya Xhosa, bũrũri-inĩ wa South Africa, aaugire ũndũ o ta ũcio. Aaugire ũũ: “Andũ aingĩ matwĩraga atĩ nĩ monete ũgarũrũku ũtaũri-inĩ witũ. Nginya ciana iria ciathomaga Mũrangĩri wa Gĩthũngũ, rĩu cithomaga wa rũthiomi rwa Xhosa. Nĩ makenagio nĩ rũthiomi rũrĩa rũhũthĩrĩtwo Bibilia-inĩ ya New World Translation ĩrĩa ĩkĩtwo mogarũrũku, tondũ nĩ rũhũthũ.”

 Mbeca iria ihũthĩragwo kwambĩrĩria wabici ya ũtaũri, kũmĩmenyerera, na gũteithĩrĩria arĩa marutaga wĩra kuo, ciumaga kũrĩ mĩhothi ya kwĩyendera ya wĩra wa thĩ yothe, iria irutagwo kũgerera njĩra iria cionanĩtio thĩinĩ wa donate.pr418.com.