Mwanake ũmwe wĩtagwo Will aaugire ũũ: “Bibilia no yoneke ta ĩrĩ mboeku ũngĩkorũo ũtoĩ kũmĩthoma na njĩra njega.”

 No wende kũmenya hitho ya gũkenera gũthoma Bibilia? Gĩcunjĩ gĩkĩ nĩ gĩgũgũteithia.

•  Geria kũhũũra mbica ũgĩthoma Maandĩko

•  Thuthuria!

•  Ũrĩa andũ a riika rĩaku maroiga

 Wĩĩkĩre ho maũndũ-inĩ marĩa ũrathoma. No ũhũthĩre njĩra ĩno:

1.   Thuura rũgano rwa Bibilia rũrĩa ũngĩenda gũthoma. No ũthuure ũndũ mũna wekĩkire kana gĩcunjĩ kuuma ibuku-inĩ rĩa Injiri, kana rũgano rũmwe harĩ icunjĩ cia ũthomi wa Bibilia wongereirũo mĩgambo thĩinĩ wa jw.org.

2.   Thoma rũgano rũu. No ũthome ũrĩ wiki, kana mũthome na mũgambo hamwe na arata aku kana andũ anyu a famĩlĩ. Mũndũ ũmwe no athome icunjĩ cia kũgana rũgano nao acio angĩ mathome icunjĩ cia andũ arĩa mararia.

3.   Geria ũndũ ũmwe kana makĩria harĩ maya:

   •   Cora mbica ironania maũndũ marĩa marĩ rũgano-inĩ rũu. Kana ũcore mbica hũthũ ironania ũrĩa maũndũ maarũmanĩrĩire. Harĩ o mbica, andĩka ũndũ ũrĩa ũronanio mbica-inĩ ĩyo.

   •   Hũthĩra mĩcoro. Kwa ngerekano, ũgĩthoma ũhoro wĩgiĩ mũndũ warĩ mwĩhokeku, no ũcore mũcoro wa kũnyitithania ngumo na ciĩko ciake na irathimo iria aagĩire nacio.

   •   Tua atĩ ũraheana rũgano rũu ta arĩ mohoro. Heana ũhoro na njĩra itiganĩte, na ũkorũo na gacunjĩ ga “kũhoya ũhoro” andũ arĩa magwetetwo rũgano-inĩ rũu wathoma na arĩa meeyoneire maũndũ marĩa meekĩkire.

   •   Angĩkorũo rũgano-inĩ rũu harĩ mũndũ watuire itua rĩtarĩ rĩa ũũgĩ, hũũra mbica ũrĩa kũngĩathiire angĩatuire itua rĩega. Kwa ngerekano, wĩcirie ũrĩa Petero aakaanire Jesu. (Mariko 14:66-72) Petero angĩekire atĩa nĩguo ahiũranie na ũndũ ũcio na njĩra njega makĩria?

   •   Angĩkorũo nĩ ũraigua no ũhote, andĩka drama yaku kuuma rũgano-inĩ rwa Bibilia. Gweta maũndũ marĩa mũndũ angĩĩruta kuumana na rũgano rũu.—Aroma 15:4.

 Ũngĩthuthuria nginya tũmaũndũ tũnini, no wone maũndũ mateyumĩrĩtie mũno marĩa ũngĩĩruta kuumana na rũgano rũu. Rĩmwe na rĩmwe, kiugo kĩmwe kana igĩrĩ thĩinĩ wa rũgano rũna no gĩkorũo na ũndũ wa bata ũngĩĩruta.

 Kwa ngerekano, ringithania Mathayo 28:7 na Mariko 16:7.

•    Nĩ kĩĩ gĩatũmire Mariko auge atĩ Jesu nĩ angĩaumĩrĩire arutwo “o hamwe na Petero”?

•  Ũteithio: Mariko ndeeyoneire maũndũ mau magĩĩkĩka, no aarutire ũhoro ũcio kũrĩ Petero.

•  Ũndũ ũrĩa tũreruta: Nĩkĩ Petero nĩ angĩaiguire omĩrĩrio kũigua atĩ Jesu nĩ eendaga kũmuona rĩngĩ? (Mariko 14:66-72) Jesu oonanirie atĩa atĩ aarĩ mũrata wa ma harĩ Petero? Ũngĩĩgerekania atĩa na Jesu na ũkorũo ũrĩ mũrata wa ma harĩ andũ arĩa angĩ?

 Ũngĩgeria kũhũũra mbica ũgĩthoma Maandĩko na ũthuthurie nginya tũmaũndũ tũnini, no ũkenere makĩria gũthoma Bibilia!