“Ndanageria gũthoma Bibilia, no ngaigua ngĩritũhĩrũo nĩ ũrĩa ĩrĩ nene!”—Briana, 15.

 Hihi wee nĩ ũiguaga ũguo? Gĩcunjĩ gĩkĩ no gĩgũteithie!

•  Njagĩrĩirũo gũthoma Bibilia nĩkĩ?

•  Ingĩhũthĩra mũtaratara ũrĩkũ gũthoma Bibilia?

•  Ũrĩa andũ a riika rĩaku maroiga

 Hihi nĩ ũiguaga ũkĩnogio nĩ gũthoma Bibilia? Angĩkorũo nĩ ũiguaga ũguo, ũndũ ũcio no ũtaũkĩke. Kwĩrorera TV na video, no kuoneke ta kũngĩcanjamũra mũndũ gũkĩra gũthoma Bibilia, tondũ nĩ ibuku rĩkoragwo na maratathi maingĩ na rĩtikoragwo na mbica!

 No ta wĩcirie ũndũ ũcio na njĩra ĩno: Ũngĩona ithandũkũ rĩa tene rĩrĩ na mĩthithũ ya goro-rĩ, na githĩ to wende kũmenya nĩ indo irĩkũ irĩ ho?

 Bibilia ĩhaana ta ithandũkũ rĩu rĩrĩ na mĩthithũ ya goro. Ĩkoragwo na mĩthithũ mĩingĩ ya ũũgĩ ĩngĩgũteithia

•   Gũtua matua mega

•   Kũiguithania na aciari aku

•   Kũgĩa na arata arĩa ega biũ

•   Kũhiũrania na mĩtangĩko

 Nĩ kĩĩ kĩngĩtũma ibuku rĩa tene ũguo rĩkorũo na maũndũ mangĩtũteithia mahinda-inĩ maya? Nĩ tondũ “Rĩandĩko o rĩothe, rĩtongoretio nĩ roho wa Ngai.” (2 Timotheo 3:16) Ũguo nĩ kuuga atĩ ũtaaro ũrĩa ũkoragwo Bibilia-inĩ uumĩte Kĩhumo kĩrĩa kĩega biũ.

 Njĩra ĩmwe nĩ gũthoma kuuma kĩambĩrĩria nginya mũico. Gwĩka ũguo nĩ gũgũgũteithia kũgĩa na mbica ya ndũmĩrĩri ĩrĩa ĩkoragwo thĩinĩ wa Bibilia. Nĩ kũrĩ njĩra nyingĩ cia gũthoma Bibilia. Wĩcirie ngerekano ici igĩrĩ:

•    No ũthome mabuku 66 ma Bibilia kũringana na ũrĩa marũmanĩrĩire, kuuma Kĩambĩrĩria nginya Kũguũrĩrio.

•    No ũthome Bibilia kũringana na ũrĩa maũndũ meekĩkire.

 Geria ũũ: Ũhoro Muongerere wa A7 thĩinĩ wa Bibilia ya New World Translation, ũbangĩte maũndũ ma bata megiĩ ũtũũro wa Jesu gũkũ thĩ kũringana na ũrĩa maũndũ meekĩkire.

 Njĩra ya kerĩ ũngĩhũthĩra gũthoma Bibilia nĩ gũthuura rũgano rũraringana na ũndũ mũritũ ũrahiũrania naguo. Kwa ngerekano:

•   No wende kũgĩa na arata ehokeku? Thoma rũgano rwa Jonathani na Daudi. (1 Samueli, mũrango wa 18-20) Ũcoke ũhũthĩre fomu ĩrĩ na kĩongo, “Ũrĩa Tũngĩgĩa na Arata Ehokeku” kwĩruta maũndũ mangĩgũteithia kuumana na rũgano rũu.

•   No wende gwĩkĩra hinya itua rĩaku rĩa kũregana na magerio? Thoma rũgano rwa ũrĩa Jusufu aareganire na magerio. (Kĩambĩrĩria, mũrango wa 39) Ũcoke ũhũthĩre fomu irĩ na kĩongo, “Ũrĩa Tũngĩregana na Magerio . . . Jusufu—Gĩcunjĩ kĩa 1” na “Thitango ya Maheeni! Jusufu—Gĩcunjĩ gĩa 2” kwĩruta maũndũ ma bata kuumana na rũgano rũu.

•   No wende kwĩruta ũrĩa mahoya mangĩgũteithia? Thoma rũgano rwa Nehemia. (Nehemia, mũrango wa 2) Ũcoke ũhũthĩre fomu ĩrĩ na kĩongo,“Ngai nĩ Aacokirie Mahoya Make” kwĩruta maũndũ ma bata kuumana na rũgano rũu.

 Geria ũũ: Rĩrĩa ũrathoma Bibilia geria gũthomera handũ hatarĩ na inegene nĩguo meciria maku matigatangatange.

 Njĩra ya gatatũ ũngĩhũthĩra gũthoma Bibilia nĩ gũthuura rũgano rũna kana thaburi, ũthome, na ũcoke wĩcũranie ũrĩa ũhoro ũcio ũrakũhutia. Thutha wa gũthoma, wĩyũrie ciũria ta ici:

•    Jehova eekĩrire ũhoro ũyũ Bibilia-inĩ nĩkĩ?

•    Ũraguũria ũndũ ũrĩkũ wĩgiĩ ngumo cia Jehova kana njĩra yake ya gwĩka maũndũ?

•    Ingĩhũthĩra ũhoro ũyũ atĩa ũtũũro-inĩ wakwa?

 Geria ũũ: Wĩigĩre muoroto! Andĩka tarĩki iria ũrenda kwambĩrĩria mũtaratara waku wa gũthoma Bibilia.