Ũngĩka atĩa maũndũ-inĩ maya marũmĩrĩire?

1.   Mwarimũ wanyu agakũnegenia nĩ ũndũ wa gwĩka ũndũ ũtagĩrĩire ũrĩ kĩrathi.

    Hihi nĩ wagĩrĩirũo kũhoya mwarimũ wanyu mũhera o na angĩkorũo ũrona ta kaũndũ karĩa ũrekĩte kararĩ kanini?

2.   Mũrata waku akamenya atĩ nĩ ũroigĩte ũndũ ũtarĩ mwega ũmwĩgiĩ.

    Hihi nĩ wagĩrĩirũo kũhoya mũrata waku mũhera o na angĩkorũo ũrona ta ũndũ ũrĩa ũroigĩte ũrĩ wa ma?

3.   Ũkarakario nĩ baba wanyu na ũkamwarĩria na njĩra ĩtarĩ ya gĩtĩo.

    Hihi nĩ wagĩrĩirũo kũhoya baba wanyu mũhera o na angĩkorũo ũrona ta arĩ we ũratũmĩte ũrakare?

 Macokio ma ciũria icio ithatũ nĩ ĩĩ. No hihi wagĩrĩirũo kũhoya mũhera nĩkĩ o na angĩkorũo ũrona ta ũrarĩ na itũmi njega cia gwĩka ũrĩa ũrekire?

•  Wagĩrĩirũo kũhoya mũhera nĩkĩ?

•  Ũrĩa ũngĩhoya mũhera

•  Ũrĩa andũ a riika rĩaku maroiga

•   Kũhoya mũhera kuonanagia atĩ mũndũ nĩ mũgima. Rĩrĩa wetĩkĩra kuoya ikinya nĩ ũndũ wa ũndũ ugĩte kana ũgeka, wonanagia atĩ nĩ ũrakũria ngumo njega iria ũkabatara watuĩka mũndũ mũgima.

   “Wĩnyihia na ũkirĩrĩria nĩ ngumo ingĩtũteithia kũhoya mũhera na gũthikĩrĩria ũrĩa mũndũ ũcio ũngĩ aratwĩra.”​—Rachel.

•   Kũhoya mũhera nĩ gũkũhotithagia kũrũnga maũndũ. Andũ arĩa mahoyaga mũhera monanagia atĩ monaga gũcaria thayũ ũrĩ ũndũ wa bata gũkĩra kuonania atĩ o matirĩ na mahĩtia na atĩ mũndũ ũcio ũngĩ nĩwe ũrĩ na mahĩtia.

   “O na angĩkorũo ũrona ta ũtarĩ na mahĩtia, gũcaria thayũ nĩguo ũndũ ũrĩa wagĩrĩirũo kũiga mbere. Kũhoya mũhera gũtibataraga maũndũ maingĩ, ĩndĩ no kũhonokie ũrata.”​—Miriam.

•   Kũhoya mũhera nĩ gũtũmaga mũndũ aigue aiganĩire. Rĩrĩa mũndũ araigua ũũru nĩ ũndũ wa gũtuurithia mũndũ ũngĩ kũgerera ciugo kana ciĩko, nĩ ta akoragwo akuuĩte mũrigo mũritũ. Rĩrĩa wahoya mũhera, mũrigo ũcio nĩ ũkweheragĩra. a

   “Kũrĩ hĩndĩ ndaragĩria mami kana baba itecirĩtie. Nĩ ndaiguaga ũũru, no ngaremwo kũhoya mũhera. No rĩrĩa rĩothe ndahoya mũhera nĩ ndaiguaga njiganĩire tondũ ũndũ ũcio nĩ wacokagia thayũ thĩinĩ wa famĩlĩ.”​—Nia.

 Hihi nĩ ũndũ mũhũthũ kũhoya mũhera? Aca. Mũirĩtu ũmwe wĩtagwo Dena, ũrĩa wabataraga kũhoya mũhera maita maingĩ nĩ ũndũ wa kwarĩria mami wao ũũru ooigire ũũ: “Ti ũndũ mũhũthũ kũhoya mũhera. Njiguaga njitĩtwo nĩ gĩkindi na ngaremwo nĩ kwaria!”

•   Kũngĩhoteka, hoya mũhera ũthiũ kwa ũthiũ. Kwaria na mũndũ ũthiũ kwa ũthiũ ũkĩmũhoya mũhera nĩ kũhotithagia mũndũ ũcio ũngĩ kuona atĩ ũraria kuuma ngoro. No ũngĩhoya mũhera kũgerera ndũmĩrĩri nguhĩ, mũndũ ũcio no age gũgwĩtĩkia. O na ũngĩkorũo ũtũmanĩirie na kabica karonania ũthiũ ũrĩ na kĩeha, mũndũ ũcio no one ta ũtararia kuuma ngoro.

   Geria ũũ: Ũngĩremwo kwaria na mũndũ ũcio ũthiũ kwa ũthiĩ nĩguo ũmũhoe mũhera, mũhũũrĩre thimũ kana ũmwandĩkĩre kandi ya kũhoya mũhera. O njĩra ĩrĩa ũngĩbanga kũhũthĩra, thuura ciugo ciaku wega.

   Ũtaaro wa Bibilia: “Ngoro ya mũndũ mũthingu nĩ ĩĩcũranagia ĩtanacokia.”​—Thimo 15:28.

•   Hoya mũhera o na ihenya. Ũngĩikara ihinda iraihu ũtahoete mũhera, thĩna ũcio no woneke ũrĩ mũnene, na ũrata wanyu na mũndũ ũcio ũhĩtĩirie no ũthũke o na makĩria.

   Geria ũũ: Tua ihinda rĩa kũhoya mũhera​—kwa ngerekano no uuge, ‘Ngũhoya mũhera ũmũthĩ.’ Banga nĩ rĩ ũkũhoya mũhera, ũcoke ũhingie itua rĩaku.

   Ũtaaro wa Bibilia: “Wĩhĩke kũiguana.”​—Mathayo 5:25.

•   Hoya mũhera kuuma ngoro. Ndũngĩkorũo ũkĩhoya mũhera ũngiuga, “Njohera angĩkorũo ũguo nĩguo ũraigua!” Mũirĩtu ũmwe wĩtagwo Janelle ooigire ũũ: “Kaingĩ mũndũ ũrĩa ũhĩtĩirie no akũhe gĩtĩo angĩona atĩ nĩ ũretĩkĩra biũ mahĩtia marĩa wĩkĩte.”

   Geria ũũ: Hoya mũhera ũtegwĩkĩra mĩkaana. Kwoguo ndũkoige, “Nĩ ngũhoya mũhera nĩ ũndũ wa mahĩtia makwa angĩkorũo o nawe nĩ ũkũhoya mũhera nĩ ũndũ wa mahĩtia maku.”

   Ũtaaro wa Bibilia: “Nĩ tũthingatagei maũndũ marĩa mangĩrehe thayũ.”​—Aroma 14:19.