ANDŨ ETHĨ MORAGIA
Ingĩmenyeria Thamiri Yakwa Atĩa?
Thamiri yaku ĩngĩringithanio na kĩĩ harĩ indo ici?
mapu
gĩcicio
mũrata
mũcirithania
Macokio macio mothe mana nĩ magĩrĩire. Gĩcunjĩ gĩkĩ nĩ gĩgũtaarĩria kĩrĩa kĩngĩtũma tuuge ũguo.
Thamiri nĩ kĩĩ?
Thamiri yaku nĩ ũhoti waku wa na thĩinĩ wa gũkũũrana wega na ũũru. Bibilia yugaga atĩ nĩ ta “watho wandĩkĩtwo ngoro-inĩ ya mũndũ.” (Aroma 2:15, Contemporary English Version) Thamiri njega ĩgũteithagia gũthuthuria ũndũ ũrĩa ũrenda gwĩka kana ũrĩa ũrĩkĩtie gwĩka.
Thamiri yaku nĩ ta mapu. Ĩgũtongoragia njĩra-inĩ ĩrĩa yagĩrĩire nĩguo wĩtheme mathĩna.
Thamiri yaku nĩ ta gĩcicio. Ĩgũteithagia kwĩyona ũrĩa ũtariĩ na thĩinĩ.
Thamiri yaku nĩ ta mũrata mwega. No ĩkũhe ũtaaro mwega na ĩgũteithie kũgaacĩra ũngĩmĩthikĩrĩria.
Thamiri yaku nĩ ta mũcirithania. Nĩ ĩkwĩraga rĩrĩa weka ũndũ mũũru.
Thamiri njega no ĩgũteithie gũtua matua ma ũũgĩ
Ririkana: Thamiri yaku nĩ kĩndũ kĩa bata mũno na no ĩgũteithie (1) gũtua matua ma ũũgĩ na (2) kũrũnga kũrĩa ũhĩtĩtie.
Wagĩrĩirũo kũmenyeria thamiri yaku nĩkĩ?
Bibilia ĩtwĩraga ‘tũtũũrie thamiri njega.’ (1 Petero 3:16) Ti ũndũ mũhũthũ gwĩka ũguo angĩkorũo thamiri yaku ndĩmenyeretio.
“Nĩ ndaheenagia aciari akwa igũrũ rĩgiĩ kũrĩa nyuma na ngaiga ũhoro ũcio ũrĩ hitho. Kĩambĩrĩria-inĩ thamiri yakwa nĩ yathĩnagia, no thutha wa ihinda ngĩtiga kuona ũndũ ũcio ũrĩ mũũru.”—Jennifer.
Mũthia-inĩ, thamiri ya Jennifer nĩ yamũtindĩkire kwĩra aciari ake ũrĩa eekaga na agĩtiga kũmaheenagia.
Ũndũ wa gwĩciria: Hihi thamiri ya Jennifer yaagĩrĩirũo kũmwĩra rĩ atĩ nĩ arahĩtia?
“Mũndũ nĩ aritũhagĩrũo na agatangĩka angĩkorũo agĩtũũra ũtũũro wa ũhinga. Thamiri yaku ĩngĩgwĩtĩkĩria gũtua itua rĩmwe rĩũru, ũkoragwo ũrĩ ũndũ mũhũthũ gũtua itua rĩngĩ rĩũru.”—Matthew.
Andũ amwe nĩ maregaga biũ gwathĩkĩra thamiri ciao. Bibilia yugaga atĩ makoragwo matarĩ “thoni o na hanini.” (Aefeso 4:19) Bibilia ya The Bible in Gikũyũ yugaga atĩ makoragwo na “rũtũrĩko rũa ngoro.”
Ũndũ wa gwĩciria: Hihi andũ arĩa mataiguaga magĩthumbũka nĩ ũndũ wa ciĩko ciao njũru nĩ makoragwo na ũtũũro mwega? Nĩ mathĩna marĩkũ matangĩĩthema gũcemania namo?
Ririkana: Nĩguo ũtũũrie thamiri njega, nĩ ũrabatara ‘kũmenyeria ũhoti waku wa gũtaũkĩrũo nĩguo ũkahota gũkũũrana wega na ũũru.’—Ahibirania 5:14.
Ũngĩmenyeria thamiri yaku atĩa?
Nĩguo ũmenyerie thamiri yaku, nĩ ũrabatara motaaro megiĩ mĩtugo marĩa marĩmĩtongoragia. Andũ amwe marũmagĩrĩra motaaro kuuma kũrĩ:
famĩlĩ na ũndũire
andũ a riika rĩao
andũ arĩa marĩ igweta
O na kũrĩ ũguo, motaaro ma Bibilia nĩmo mega makĩria. Ũcio ti ũndũ wa kũgegania tondũ Bibilia ‘ĩtongoretio nĩ roho wa Ngai,’ o Ngai ũcio watũũmbire na ũĩ maũndũ marĩa matwagĩrĩire makĩria.—2 Timotheo 3:16.
Ta wĩcirie ngerekano imwe.
RĨANDĨKO: “Twendaga gũikara tũrĩ ehokeku maũndũ-inĩ mothe.”—Ahibirania 13:18.
Rĩandĩko rĩu rĩngĩhutia atĩa thamiri yaku ũngĩigua ũkĩenda kũiyĩra kĩgeranio, kũheenia aciari aku, kana kũiya?
Thamiri yaku ĩngĩgũteithia gũkorũo ũrĩ mwĩhokeku maũndũ-inĩ mothe-rĩ, ũgwĩciria ũndũ ũcio ũngĩkũguna atĩa ihinda-inĩ rĩrĩ na rĩrĩa rĩroka?
RĨANDĨKO: “Ũragĩrai ngomanio itagĩrĩire.”—1 Akorintho 6:18.
Rĩandĩko rĩu rĩngĩhutia atĩa thamiri yaku ũngĩigua ũkĩenda kwĩrorera maũndũ ma ũũra-thoni kana kwĩingĩria ngomanio-inĩ itagĩrĩire?
Thamiri yaku ĩngĩgũteithia kũũrĩra ngomanio itagĩrĩire-rĩ, ũndũ ũcio ũngĩkũguna atĩa ihinda-inĩ rĩrĩ na rĩrĩa rĩroka?
RĨANDĨKO: “Mũtuĩke atugi kwerekera mũndũ na ũrĩa ũngĩ, na mũgacayanagĩra mũrĩ na wororo, mũkĩohanagĩra mwĩyendeire.”—Aefeso 4:32.
Rĩandĩko rĩu rĩngĩgũteithia atĩa rĩrĩa mwaga kũiguithania na mũndũ mũciaranĩirũo nake kana mũrata?
Thamiri yaku ĩngĩgũteithia kuohanĩra na gũcayanĩra-rĩ, ũndũ ũcio ũngĩkũguna atĩa ihinda-inĩ rĩrĩ na rĩrĩa rĩroka?
RĨANDĨKO: “Jehova . . . nĩ athũire mũndũ o wothe wendete ũhinya.”—Thaburi 11:5.
Rĩandĩko rĩu rĩagĩrĩire kũhutia atĩa matua maku megiĩ gũthuura thenema iria ũkwĩrorera, programu cia TV, na mĩthaako ya video?
Thamiri yaku ĩngĩgũteithia kũrega maũndũ ma gwĩkenia marĩ na ũhinya-rĩ, ũndũ ũcio ũngĩkũguna atĩa ihinda-inĩ rĩrĩ na rĩrĩa rĩroka?
RŨGANO RWA MA: “Nĩ ndĩ arata maathaakaga mĩthaako ya video ĩrĩ na ũhinya, na nĩ ndathaakaga o na niĩ. Baba agĩcoka akĩnjĩra ndigacoke gũthaaka mĩthaako ĩyo. Kwoguo ndathaakaga o rĩrĩa ndaceerera arata akwa. Ndacoka mũciĩ, ndaikaraga ngirĩte na ndiaragia ũhoro ũcio. Baba nĩ aanjũũragia nĩ kĩĩ kĩũru, na niĩ ngamwĩra gũtirĩ na ũũru. O na kũrĩ ũguo, mũthenya ũmwe nĩ ndathomire Thaburi 11:5 na ngĩambĩrĩria kũigua ũũru nĩ ũndũ wa ũrĩa ndekaga. Ngĩmenya atĩ nĩ ndabataraga gũtiga gũthaaka mĩthaako ĩyo, na ngĩtiga. Nĩ ũndũ wa kuona kĩonereria gĩakwa, mũrata ũmwe wakwa o nake nĩ aatigire gũthaakaga mĩthako ĩyo ĩrĩ na ũhinya.”—Jeremy.
Ũndũ wa gwĩciria: Thamiri ya Jeremy yaambĩrĩirie kũruta wĩra rĩ, na we aambĩrĩirie kũmĩathĩkĩra rĩ? Ũreruta atĩa kuumana na rũgano rwa Jeremy?
Ririkana: Thamiri yaku nĩ yonanagia ũrĩa ũtariĩ na maũndũ marĩa wĩtĩkĩtie. Thamiri yaku yugaga atĩa igũrũ rĩaku?
Icunjĩ Ingĩ Hihi Ũngĩenda Gũthoma
ŨRĨA ANDŨ A RIIKA RĨAKU MAROIGA
Itũmi cia Gũkorũo na Wĩtĩkio—Ithimi cia Ngai Iringithanĩtio na Ciakwa
Andũ ethĩ magĩtaarĩria ũrĩa maahotire gwĩthema kũgĩa na moimĩrĩro mooru ta andũ aingĩ arĩa maathomaga nao.
ŨRĨA ANDŨ A RIIKA RĨAKU MAROIGA
Andũ Ethĩ Makĩaria Ũhoro wa Gũthoma Bibilia
Ti ũndũ mũhũthũ hingo ciothe gũthoma, no gũthoma Bibilia nĩ kũrĩ ũguni. Andũ ana ethĩ magĩtaarĩria ũrĩa magunĩkĩte nĩ gũthoma Bibilia.
ANDŨ ETHĨ MORAGIA
Bibilia Ĩngĩndeithia Atĩa?—Gĩcunjĩ kĩa 1: Kũmenya Bibilia Yaku
Ũngĩona ithandũkũ rĩa tene rĩrĩ na mĩthithũ ya goro-rĩ, na githĩ to wende kũmenya nĩ indo irĩkũ irĩ ho? Bibilia ĩhaana ta ithandũkũ rĩu rĩrĩ na mĩthithũ ya goro. Ĩkoragwo na mĩthithũ mĩingĩ.
