Bibilia ndĩgwetete ĩmwe kwa ĩmwe maũndũ megiĩ mbica cia ũũra-thoni, gũtũmanĩra mbica kana ndũmĩrĩri cia ũũra-thoni intaneti-inĩ, kana maũndũ mangĩ ta macio. O na kũrĩ ũguo, Bibilia nĩ ĩgwetete wega ũrĩa Ngai aiguaga igũrũ rĩgiĩ ciĩko iria ciĩkagĩrĩra ngomanio nja ya kĩhiko kana mawoni matagĩrĩire megiĩ ngomanio. Ta wĩcirie ũhoro wa mĩhari ĩno ya Bibilia:

•   “Ũragai ciĩga cianyu iria irĩ gũkũ thĩ ũhoro-inĩ wĩgiĩ ngomanio itagĩrĩire, maũndũ matarĩ matheru, merirĩria moru ma ngomanio.” (Akolosai 3:5) Handũ ha kũũraga merirĩria moru, kwĩrorera mbica cia ũũra-thoni nĩ kũmaarahũra kũmaarahũraga. Gũtũmaga mũndũ akorũo atarĩ mũtheru, kana arĩ na thahu, maitho-inĩ ma Ngai.

•   “Mũndũ o wothe wĩroragĩra mũtumia arĩ na merirĩria moru nĩ arĩkĩtie gũtharia nake ngoro-inĩ yake.” (Mathayo 5:28) Mbica cia maũndũ ma ngomanio itũmaga mũndũ agĩe na meciria moru marĩa matũmaga mũndũ eke ciĩko cia waganu.

•   “Ngomanio itagĩrĩire na mĩthemba o yothe ya mĩtugo ĩtarĩ mĩtheru kana thuti itikanagwetwo gatagatĩ-inĩ kanyu.” (Aefeso 5:3) Tũtiagĩrĩire o na hanini kũgweta maũndũ ma ngomanio, kũmerorera, o na kana kũmathoma nĩguo twĩkenie.

•   “Ciĩko cia mwĩrĩ nĩ cionekaga wega, na nĩcio ngomanio itagĩrĩire, maũndũ matarĩ matheru, . . . na maũndũ ta macio. Ndĩramũkaania o mbere ũhoro wĩgiĩ maũndũ macio, o ta ũrĩa ndanamũkaania, atĩ arĩa mekaga maũndũ ta macio matikagaya Ũthamaki wa Ngai.” (Agalatia 5:19-21) Andũ arĩa meroragĩra video, mbica kana gũthoma maũndũ mangĩmaarahũra, magatũmanĩra ndũmĩrĩri cia waganu kana makaranĩria intaneti-inĩ marĩ na muoroto wa kwarahũrana na maũndũ ma ngomanio, arĩa mahũthagĩra thimũ kwaria maũndũ ma ũũra-thoni kana gũthikĩrĩria ũhoro wa maũndũ megiĩ ngomanio, kana arĩa matũmanagĩra mbica cia maũndũ ma ngomanio kana ndũmĩrĩri kũgerera thimũ, monagwo nĩ Ngai marĩ na thahu. Tũngĩĩmenyeria gwĩkaga maũndũ ta macio, no twage gwĩtĩkĩrĩka nĩ Ngai.