Akristiano metĩkĩtie atĩ Jesu aakuire nĩ ũndũ wa mehia ma andũ. (1 Petero 3:18) O na kũrĩ ũguo, gwĩtĩkia atĩ Jesu nĩwe Mũhonokia to kuo kũrabatarania nĩguo mũndũ akaahonoka. Ndaimono nĩ ciũĩ atĩ Jesu “nĩwe Mũrũ wa Ngai,” no itikaahonokio, nĩ kũniinwo ikaaniinwo.—Luka 4:41; Judasi 6.

•  Njagĩrĩirũo gwĩka atĩa nĩguo ngaahonoka?

•  Ĩ narĩo “Ihoya rĩa Mwĩhia”?

•  “Ihoya rĩa Mwĩhia” rĩoimire kũ?

•   No mũhaka wĩtĩkie atĩ Jesu aarutire muoyo wake ũrĩ igongona nĩ ũndũ wa mehia maitũ. (Atũmwo 16:30, 31; 1 Johana 2:2) Ũndũ ũcio nĩ hamwe na gwĩtĩkia atĩ Jesu aarĩ mũndũ wa biũ na atĩ maũndũ mothe marĩa Bibilia yugaga mamwĩgiĩ nĩ ma ma.

•   Wĩrute ũrĩa Bibilia ĩrutanaga kũna. (2 Timotheo 3:15) Bibilia yugaga atĩ mũtũmwo Paulo na Sila meerire mũrangĩri ũmwe wa njera ũũ: “Ĩtĩkia Mwathani Jesu, na nĩ ũkũhonoka.” Thutha ũcio, makĩambĩrĩria kũruta mũrangĩri ũcio “kiugo kĩa Jehova.” a (Atũmwo 16:31, 32) Ũndũ ũcio ũronania atĩ mũrangĩri ũcio wa njera ndangĩahotire gwĩtĩkia Jesu biũ atagĩte na ũtaũku wa mũthingi wĩgiĩ Kiugo kĩa Ngai. Nĩ aabataraga kũgĩa na ũmenyo wa ma ũrĩa uumĩte Maandĩko-inĩ.—1 Timotheo 2:3, 4.

•   Wĩrire. (Atũmwo 3:19) Ningĩ no mũhaka wĩrire, kana ũigue kĩeha kĩnene nĩ ũndũ wa mĩerekera na mĩthiĩre yaku mĩũru ya hau kabere. Andũ arĩa angĩ nĩ mekuona atĩ nĩ wĩrirĩte watiga gwĩka maũndũ marĩa matakenagia Ngai na wambĩrĩria gwĩka ‘ciĩko ironania atĩ nĩ wĩrirĩte.’—Atũmwo 26:20.

•   Ũbatithio. (Mathayo 28:19) Jesu ooigire atĩ andũ arĩa mangĩgatuĩka arutwo ake magĩrĩire kũbatithio. Mũrangĩri wa njera ũrĩa ũkũgwetetwo nĩ aabatithirio. (Atũmwo 16:33) Ũndũ ũmwe na ũcio, rĩrĩa mũtũmwo Petero aarutire kĩrĩndĩ kĩnene ũhoro wa ma wĩgiĩ Jesu, ‘arĩa meetĩkĩrire ciugo ciake meyendeire, nĩ maabatithirio.’—Atũmwo 2:40, 41.

•   Athĩkagĩra ũtongoria wa Jesu. (Ahibirania 5:9) Andũ arĩa ‘marũmagia maũndũ marĩa mothe’ Jesu aathanire nĩ monanagia kũgerera mũtũũrĩre wao atĩ o nĩ arũmĩrĩri ake. (Mathayo 28:20) Matuĩkaga “a kũhingagia kiugo no to kũigua tu.”—Jakubu 1:22.

•   Kirĩrĩria o nginya mũico. (Mariko 13:13) Arutwo a Jesu ‘nĩ mabataraga ũkirĩrĩria’ nĩguo makaahonoka. (Ahibirania 10:36) Kwa ngerekano, mũtũmwo Paulo aathĩkĩire biũ morutani ma Jesu na agĩkorũo arĩ mwĩhokeku harĩ Ngai, na aakirĩrĩirie gwĩka ũguo kuuma rĩrĩa aatuĩkire Mũkristiano nginya rĩrĩa aakuire.—1 Akorintho 9:27.

 Thĩinĩ wa ndini imwe, andũ nĩ mahoyaga mahoya mamwe ta “Ihoya rĩa Mwĩhia” na “Ihoya rĩa Ũhonokio.” Arĩa marahoya nĩ metĩkagĩra atĩ nĩ ehia na makoiga nĩ metĩkĩtie atĩ Jesu aakuire nĩ ũndũ wa mehia mao. Ningĩ nĩ meraga Jesu aingĩre ngoro-inĩ ciao kana ũtũũro-inĩ wao. No Bibilia ndĩgwetete “Ihoya rĩa Mwĩhia” kana ĩkonania atĩ nĩ rĩagĩrĩire gũcokagĩrũo.

 Andũ amwe meciragia atĩ thutha wa gũcokera “Ihoya rĩa Mwĩhia,” mũndũ no akorũo na ma atĩ nĩ akaahonokio. No gũtirĩ mũndũ ũkaahonokio nĩ ũndũ tu wa gũcokera ihoya rĩna. Tondũ tũrĩ andũ matarĩ akinyanĩru, nĩ twĩhagia maita maingĩ. (1 Johana 1:8) Nĩkĩo Jesu aarutire arũmĩrĩri ake mahoyage kaingĩ moherũo mehia mao. (Luka 11:2, 4) Makĩria ma ũguo, Akristiano amwe arĩa mangĩkahonokio nĩ moorirũo nĩ mweke ũcio nĩ ũndũ wa gũtiga gũtungatĩra Ngai.—Ahibirania 6:4-6; 2 Petero 2:20, 21.

 Andĩki a historĩ makoragwo na mawoni ngũrani megiĩ kũrĩa “Ihoya rĩa Mwĩhia” rĩoimire. Amwe moigaga atĩ mũtugo wa gũcokagĩra ihoya rĩu waambĩrĩirie rĩrĩa ndini cia Protestant ciathondekirũo. Angĩ metĩkĩtie atĩ andũ maambĩrĩirie gũcokagĩra “Ihoya rĩa Mwĩhia” hĩndĩ ya karine ya 18 na 19, rĩrĩa ndini ingĩ ciambĩrĩirie gũthondekwo. O ũrĩa kũrĩ, mũtugo ũcio ndũnyitĩtwo mbaru nĩ Maandĩko, o na nĩ mũgarũ na morutani ma Bibilia.