Bibilia ĩtwĩkĩraga ngoro kũheanaga twĩyendeire na tũrĩ na muoroto ũrĩa wagĩrĩire. Yonanagia atĩ kũheana ta kũu, kũgunaga mũndũ ũrĩa ũraheo o na ũrĩa ũraheana. (Thimo 11:25; Luka 6:38) Jesu ooigire ũũ: “Kũheana nĩ kũrĩ gĩkeno kĩnene gũkĩra kwamũkĩra.”—Atũmwo 20:35.

•  Nĩ rĩ kũheana gũkenagia Ngai?

•  Nĩ rĩ kũheana gũtakenagia Ngai?

•  Mĩhari ya Bibilia ĩgiĩ kũheana

 Kũheana gũkenagia Ngai rĩrĩa ũndũ ũcio wekwo na kwĩyendera. Bibilia yugaga ũũ: “O mũndũ nĩ eke o ta ũrĩa atuĩte ngoro-inĩ yake, no ti atekwenda kana ta arĩ kũringĩrĩrio, nĩ gũkorũo Ngai endete mũndũ ũheanaga akenete.”—2 Akorintho 9:7.

 Kũheana kuuma ngoro nĩ gĩcunjĩ kĩa “ũthathaiya” ũrĩa ũkenagia Ngai. (Jakubu 1:27) Mũndũ ũrĩa ũteithagia arĩa marĩ na thĩna eyendeire akoragwo agĩka ũndũ ũkenagia Ngai, na Ngai onaga ũtaana ũcio ta arĩ thiirĩ aramũkombera. (Thimo 19:17) Bibilia ĩrutanaga atĩ Ngai nĩ akaarĩha mũndũ ũcio ũheanaga.—Luka 14:12-14.

 Angĩkorũo ũndũ ũcio ũrekwo na itũmi cia mwĩyendo. Kwa ngerekano:

•   Gũkenia andũ.—Mathayo 6:2.

•   Nĩguo mũndũ o nake aheo kĩndũ.—Luka 14:12-14.

•   Ĩrĩ njĩra ya kũgũra ũhonokio nĩguo mũndũ akaaheo muoyo wa tene na tene.—Thaburi 49:6, 7.

 Angĩkorũo kũheana kũu nĩ kũrateithĩrĩria maũndũ marĩa Ngai akaananĩtie. Kwa ngerekano, ũngĩkorũo ũrĩ ũndũ mũũru kũhe mũndũ mbeca cia gũũtha kamarĩ kana cia kũgũra ndawa cia kũrebia kana kũgũra njohi anyue nginya arĩĩo. (1 Akorintho 6:9, 10; 2 Akorintho 7:1) Ningĩ ti wega kũhe mũndũ ũrĩ na ũhoti wa gwetha mbeca cia kũhingia mabataro make no nĩ aregaga kũruta wĩra.—2 Athesalonike 3:10.

 Angĩkorũo kũheana kũu nĩ gũgũtũma mũndũ age kũhingia mawĩra marĩa ehokeirũo nĩ Ngai. Bibilia ĩrutanaga atĩ kĩongo kĩa famĩlĩ nĩ agĩrĩirũo kũhingagĩria andũ a nyũmba yake mabataro. (1 Timotheo 5:8) Ndũngĩkorũo ũrĩ ũndũ mwagĩrĩru harĩ kĩongo kĩa famĩlĩ kũheana mũno kũrĩ andũ arĩa angĩ nginya akaga kũhingĩria andũ a nyũmba yake mabataro. O na Jesu nĩ aamenereirie arĩa maaregaga kũhingĩria aciari ao akũrũ mabataro makegwatia atĩ indo ciao ciothe nĩ “kĩheo kĩamũrĩirũo Ngai.”—Mariko 7:9-13.