Ngai nĩ arũmbũyagia ndungata ciake iria ndũaru. Bibilia yugaga ũũ ĩkĩaria ũhoro wa ndungata cia Ngai njĩhokeku: “E kĩrumia-inĩ, arigoetio nĩ mũrimũ, Jehova nĩarĩmũtiiragĩrĩra.” (Thaburi 41:3) Angĩkorũo ũrĩ na mũrimũ wa gũtũũra, makinya maya matatũ no magũteithie kũhiũrania naguo:

1.   Hoya ũheo hinya wa gũkirĩrĩria. No ũheo “thayũ wa Ngai, ũrĩa ũtangĩmenyeka ũrĩa ũtariĩ,” ũgũtiirĩrĩre na ũgũteithie ũtige gwĩtanga.​—Afilipi 4:6, 7.

2.   Gĩa na mawoni mega. Bibilia yugaga: “Gũkena kũrehage ũgima mwega wa mwĩrĩ, no gũthuthĩka kũũragaga mũndũ o kahora.” (Thimo 17:22, Good News Translation) Kũria ũhoti waku wa mathekania, tondũ no ũtũme ũniine kĩeha na ũtũme ũgĩe na ũgima mwega wa mwĩrĩ.

3.   Gĩa na mwĩhoko harĩ ciĩranĩro cia Ngai. Gũkorũo na kĩĩrĩgĩrĩro kĩa ma, no gũgũteithie gũkorũo na gĩkeno o na ũrĩ na mũrimũ wa ihinda iraya. (Aroma 12:12) Bibilia nĩ ĩranĩire hĩndĩ ‘gũtarĩ mũndũ ũgacoka kuuga ũũ: Ndĩ mũrũaru.’ (Isaia 33:24) Ngai nĩ akaahonia mĩrimũ yothe ya gũtũũra ĩrĩa andũ maremetwo kũrigita. Kwa ngerekano, Bibilia nĩ ĩranĩire atĩ ũkũrũ nĩ ũkaagarũranio. Yugĩte ũũ: “Nyama cia mwĩrĩ wake igagĩĩthĩha kũrĩ cia mwana, agagĩcokererũo nĩ matukũ make marĩa ma ũnyinyi.”​—Ayubu 33:25.

 Ririkana: O na gũtuĩka Aira a Jehova nĩ metĩkĩtie atĩ Ngai nĩ amateithagia, nĩ macaragia ũrigitani ũrĩa wagĩrĩire rĩrĩa marũara. (Mariko 2:17) O na kũrĩ ũguo, tũtirĩ njĩra o na ĩmwe ya mwanya ya ũrigitani tũgaathagĩrĩria, tondũ o mũndũ agĩrĩire gũtua itua rĩake we mwene rĩgiĩ njĩra cia ũrigitani.