Thĩinĩ wa Bibilia, kiugo gĩa Kĩngiriki kĩrĩa gĩtaũrĩtwo “kũriũka” nĩ a·naʹsta·sis na kiugĩte “gũũkĩra” kana “kũrũgama rĩngĩ.” Mũndũ ũriũkĩtio nĩ gũũkĩrio okagĩrio kuuma gĩkuũ-inĩ agacokio muoyo o ta ũrĩa aarĩ mbere ĩyo.—1 Akorintho 15:12, 13.

 O na gũtuĩka kiugo “kũriũka” gĩtirĩ thĩinĩ wa Maandĩko ma Kĩhibirania, marĩa kaingĩ metagwo Kĩrĩkanĩro Kĩrĩa Gĩkũrũ, ũrutani ũcio nĩ wonekaga ho. Kwa ngerekano, Ngai eeranĩire ũũ kũgerera mũnabii Hosea: “Nĩ ngaamakũũra kuuma harĩ hinya wa Mbĩrĩra; nĩ ngaamahonokia kuuma gĩkuũ-inĩ.”—Hosea 13:14; Ayubu 14:13-15; Isaia 26:19; Danieli 12:2, 13.

 Arĩa akuũ makaariũkio matũũre kũ? Andũ amwe mariũkagio magatũũre kũrĩa igũrũ nĩguo maathane marĩ athamaki hamwe na Kristo. (2 Akorintho 5:1; Kũguũrĩrio 5:9, 10) Bibilia yugaga ũcio nĩ ‘ũriũkio wa mbere’ kana “ũriũkio ũrĩa wa kĩambĩrĩria,” kuonania atĩ nĩ harĩ ũriũkio ũngĩ ũkaarũmĩrĩra. (Kũguũrĩrio 20:6; Afilipi 3:11) Arĩa makaamũkĩra ũriũkio ũcio ũngĩ magaatũũra muoyo gũkũ thĩ, na andũ arĩa aingĩ makaamũkĩra ũriũkio ũcio.—Thaburi 37:29.

 Andũ mariũkagio atĩa? Ngai aheete Jesu hinya wa kũriũkia arĩa akuũ. (Johana 11:25) Jesu nĩ agaacokia muoyo “arĩa othe marĩ thĩinĩ wa mbĩrĩra,” o mũndũ kũringana na ũrĩa aatariĩ, ngumo ciake, na kĩririkano gĩake. (Johana 5:28, 29) Arĩa mariũkagio magathiĩ igũrũ maheagwo mwĩrĩ wa roho, nao arĩa makaariũkio matũũre gũkũ thĩ makaaheo mĩĩrĩ mĩkinyanĩru, ĩtarĩ na mathĩna.—Isaia 33:24; 35:5, 6; 1 Akorintho 15:42-44, 50.

 Nĩa makaariũkio? Bibilia yugaga atĩ “nĩ gũkaariũkio andũ arĩa athingu na arĩa matarĩ athingu.” (Atũmwo 24:15) Arĩa athingu nĩ hamwe na andũ ehokeku ta Nuhu, Sara, na Iburahimu. (Kĩambĩrĩria 6:9; Ahibirania 11:11; Jakubu 2:21) Arĩa matarĩ athingu nĩ hamwe na andũ arĩa mataarũmagĩrĩra ithimi cia Ngai tondũ matiagĩire na mweke wa kwĩruta nĩguo macirũmĩrĩre.

 No andũ aganu arĩa maregaga kũgarũrũka matikaariũkio. Rĩrĩa andũ ta acio makua, matikoragwo na kĩĩrĩgĩrĩro gĩa gũgaacokio muoyo.—Mathayo 23:33; Ahibirania 10:26, 27.

 Andũ makaariũkio rĩ? Bibilia nĩ yarathĩte atĩ kũriũkio kwa arĩa mathiaga igũrũ gũgeekĩka hĩndĩ ya gũkorũo kuo gwa Kristo, kũrĩa kwambĩrĩirie mwaka wa 1914. (1 Akorintho 15:21-23) Andũ arĩa makaariũkio matũũre gũkũ thĩ makaariũkio hĩndĩ ya Wathani wa Mĩaka Ngiri wa Jesu Kristo, rĩrĩa thĩ ĩgaatuo paradiso.—Luka 23:43; Kũguũrĩrio 20:6, 12, 13.

 Tũngĩkorũo na ma atĩa atĩ andũ nĩ makaariũkio? Bibilia nĩ ĩheanĩte ũhoro mũrikĩru wĩgiĩ andũ kenda maariũkirio, na o ũmwe wao aariũkirio kũrĩ na eroreri. (1 Athamaki 17:17-24; 2 Athamaki 4:32-37; 13:20, 21; Luka 7:11-17; 8:40-56; Johana 11:38-44; Atũmwo 9:36-42; 20:7-12; 1 Akorintho 15:3-6) Kwa ngerekano, Jesu aariũkirie Lazaro andũ aingĩ meroreire, na aaikarĩte thikũ inya kuuma rĩrĩa aakuire. (Johana 11:39, 42) O na andũ arĩa maakararagia Jesu matingĩakararirie ũndũ ũcio, na kwoguo makĩbanga kũũraga Jesu na Lazaro.—Johana 11:47, 53; 12:9-11.

 Bibilia yonanagia atĩ Ngai nĩ arĩ ũhoti wa kũriũkia arĩa makuĩte na nĩ eriragĩria gwĩka ũguo. Nĩ aririkanaga maũndũ mothe megiĩ mũndũ wothe ũrĩa akaariũkia kũgerera hinya wake mũingĩ. (Ayubu 37:23; Mathayo 10:30; Luka 20:37, 38) Ngai no ahote gũcokia muoyo arĩa makuĩte, na nĩ endaga gwĩka ũguo! Bibilia ĩkĩaria ũhoro wĩgiĩ kũriũka yugaga ũũ igũrũ rĩgiĩ Ngai: “Nĩ ũkeerirĩria wĩra wa moko maku.”—Ayubu 14:15.

Mawoni mahĩtanu megiĩ kũriũka

 Mawoni mahĩtanu: Kũriũkio kũnyitithanagia mwĩrĩ na muoyo.

 Ũrĩa kũrĩ: Bibilia ĩrutanaga atĩ rĩrĩa mũndũ akua, ndathiaga na mbere gũtũũra, na ndakoragwo na kĩndũ gĩtagwo muoyo gĩthiaga na mbere gũtũũra thutha wake gũkua. (Kĩambĩrĩria 2:7; Kohelethu 9:5, 10) Mũndũ ũrĩa ũriũkĩtio ti mwĩrĩ wake ũnyitithanagio na muoyo; ariũkagio agatuĩka mũndũ ũrĩ muoyo.

 Mawoni mahĩtanu: Andũ amwe makaariũkio macoke maniinwo o rĩo.

 Ũrĩa kũrĩ: Bibilia yugaga atĩ “arĩa meekaga maũndũ moru” makoimĩra “iriũkĩro rĩa gũtuĩrũo.” (Johana 5:29) O na kũrĩ ũguo, andũ acio magaatuĩrũo kũringana na maũndũ marĩa mageeka mariũkio, no ti marĩa meekire matanakua. Jesu ooigire ũũ: “Arĩa makuĩte makaaigua mũgambo wa Mũrũ wa Ngai, na arĩa mekũũthikĩrĩria nĩ magaatũũra muoyo.” (Johana 5:25) Arĩa ‘magaathikĩrĩria,’ kana mathĩkĩre maũndũ marĩa makeeruta maariũkio, marĩĩtwa mao nĩ makaandĩkwo thĩinĩ wa “gĩkũnjo kĩa muoyo.”—Kũguũrĩrio 20:12, 13.

 Mawoni mahĩtanu: Mũndũ ariũkagio na mwĩrĩ ũrĩa aarĩ naguo atanakua.

 Ũrĩa kũrĩ: Mũndũ akua mwĩrĩ wake nĩ kũbutha ũbuthaga.—Kohelethu 3:19, 20.