Ĩĩ, Bibilia no ĩgũteithie. Motaaro maya mana ma Bibilia no magũteithie ũndũ-inĩ wĩgiĩ mathĩna ma mbeca na mathiirĩ:

1.   Banga ũrĩa ũkũhũthĩra mbeca ciaku. “Mĩbango ya mũndũ wĩ kĩyo ĩtũmaga mũndũ agĩe indo; ĩndĩ mĩbango ĩtarĩ mĩbaarĩrĩre ĩreehagĩre mũndũ ũthĩĩni.” (Thimo 21:5, The Holy Bible in Gĩkũyũ Language.) Ndũkahiũhe kũgũra kĩndũ atĩ tondũ thogora wakĩo nĩ mwega. Andĩka mbanjeti ya indo iria ũrabatara na ũmĩrũmĩrĩre.

2.   Wĩtheme mathiirĩ matarĩ ma o mũhaka. “Athĩĩni matũũraga me ngombo cia itonga, na ũrĩa ũkombaga atũũraga e ngombo ya mũmũkomberi.” (Thimo 22:7, The Holy Bible in Gĩkũyũ Language.) Angĩkorũo ũrĩ na thiirĩ na ndũngĩhota kũũrĩha kũringana na ũrĩa mwarĩkanĩire, no warie na ũrĩa wagũkombeire nĩguo mũbange ũndũ ũngĩ mwerũ. Ndũgakue ngoro. Hũthĩra ũtaaro ũyũ wa Bibilia harĩ mũndũ ũrĩa ũtaahũthĩrire ũũgĩ gũkũrũgamĩrĩra thiirĩ ũrĩa wakombete: “Thiĩ, ũkenyihie, ũmũringĩrĩrie mũno akuohore. Ndũkareke maitho maku mone toro, o na kana ũreke imone ciaku icũnge.” (Thimo 6:1-5) O na angĩkorũo ihoya rĩaku nĩ rĩaringa ihiga, thiĩ na mbere kuuga mũbange ũndũ ũngĩ mwerũ.

3.   Korũo na mawoni marĩa magĩrĩire megiĩ mbeca. “Mũndũ wa riitho iraya [kana mũkarĩ] ahiũhanagia na ũtonga, na ndakoragwo oĩ atĩ nĩ ũnyamari ũkamũkorerera.” (Thimo 28:22) Ũkoroku na ũiru no itũme mũndũ akorũo na mathĩna ma mbeca, ningĩ maũndũ make ma kĩĩroho no mathũke.

4.   Iganagĩra. “Ĩndĩ tũngĩgĩa na irio na nguo-rĩ, no tũiganio nĩcio.” (1 Timotheo 6:8) Gũkorũo mũndũ arĩ na mbeca, ti kuuga atĩ nĩ egũkorũo na gĩkeno kana akorũo aiganĩire. Andũ amwe arĩa makoragwo na gĩkeno mũno thĩinĩ wa thĩ matikoragwo na mbeca nyingĩ. Kĩrĩa marĩ nĩ wendo thĩinĩ wa famĩlĩ ciao o hamwe na arata na nĩ marĩ ũrata hamwe na Ngai.—Thimo 15:17; 1 Petero 5:6, 7.