Ĩĩ, no etĩkĩre. Jesu nĩ onanirie atĩ arũmĩrĩri ake no metĩkĩre ũrigitani rĩrĩa oigire atĩ “andũ arĩa matarĩ arwaru matibataraga ndagĩtarĩ, no arĩa arwaru nĩo mamũbataraga.” (Mathayo 9:12) O na gũtuĩka Bibilia ti ibuku rĩa ũrigitani, nĩ ĩrĩ ithimi cia gũtongoria arĩa marenda gũkenia Ngai.

Ciũria ũbatiĩ kwĩyũria

 1. Nĩ ndĩrataũkĩrũo nĩ njĩra ĩno ya ũrigitani? Bibilia ĩtũtaaraga twethe ũhoro ũngĩhokeka handũ ha ‘gwĩtĩkia ũndũ o wothe.’—Thimo 14:15.

 2. Hihi nĩ njagĩrĩirũo gũcaria ũtaaro wa ndagĩtarĩ ũngĩ? “Aheani aingĩ a kĩrĩra” no makorũo marĩ ũteithio mũnene, makĩria angĩkorũo nĩ wĩhĩirũo nĩ mũrimũ.—Thimo 15:22.

 3. Njĩra ĩyo ya ũrigitani hihi nĩ mũgarũ na watho wa Bibilia wa ‘gwĩthema na thakame’?—Atũmwo 15:20.

 4. Hihi njĩra ya gũthimwo kana kũrigitwo nĩ ĩhutanĩtie na maũndũ ma ũgo na ũragũri? Bibilia nĩ ĩkaananĩtie “maũndũ ma ũgo.” (Agalatia 5:19-21) Nĩ getha ũmenye kana ũrigitani ũcio nĩ ũhutanĩtie na maũndũ ma ũgo, no wĩcirie ũhoro wa ciũria ici:

•   Hihi mũndũ ũrĩa ũrakũrigita nĩ ahũthagĩra ũgo?

•   Ũrigitani ũcio hihi wĩhocetie harĩ wĩtĩkio wa atĩ mũrimũ ũrehagwo nĩ ngai ciarakara, kana thũ ingĩ iria ihũthagĩra maũndũ ma ũgo?

•   Hihi kũruta magongona, kwaranĩria na maroho, ũhũthĩri wa mbũgũ kana indo ingĩ ta icio nĩ kũrahũthĩka harĩ kũhaarĩria ndawa kana gũcihũthĩra?

 5. Hihi nĩ ndĩreciria ũhoro wa ũgima wakwa wa mwĩrĩ gũkĩria njano? Bibilia ĩheanaga ũtaaro ũyũ: “Rekei ũigananĩru wanyu ũmenyekage nĩ andũ othe.” (Afilipi 4:5) Gũkorũo na ũigananĩru nĩ gũgũgũteithia kũiga meciria maku maũndũ-inĩ “marĩa ma bata makĩria,” ta maũndũ ma kĩĩroho.—Afilipi 1:10; Mathayo 5:3.